Marku 9 - Emakhuwa Bible1 Vano Yeesu aapwaherera eeraka: “Miyo kinoororomelihani weera akina ari va, kheerwa ekhwa hata vakhaani, ehinaaye woona omwene wa Muluku owaaka ni ikuru.” Otatuxiwa wa Yeesu vamwaakoni 2 Amalihaka mahuku mathannamosa, Yeesu aamurowano Pedru, Yakobe ni Yohaane, ni aahaarongha vamwaako woorakamela, weiwo yaakhanlaaya yaawo paahi. Vale Owo aatatuxiwa ohoolowaya. 3 Ikuwosawe saathatuwa sootteelaxa moota wooweera khawoworu namakattha eera awere otteeliha. 4 Yaahiixoonihera ohoolowaya Moisesi ni Eliya, wa yaawo yaatthekula ni Yeesu. 5 Vano Pedru aamweerela Yeesu: “Muhusiha, ti wooreera okhala vaava hiyo. Nrowe nipake mikottha miraru: mmoha wa Nyuwo, mukina wa Moisesi ni mukina wa Eliya.” 6 Owo khaasuwenle yeeyo yaatthuneya weera, niwoko yaahoova. 7 Vahoolowaya naahoowa nihutte nimoha ni naahaakhuneela. Wa nenne, naakhuma nsu nimoha neeraka: “Ola ti Mwanaka oosiveleya. Mmwiiwe Yoowo.” 8 Wootutuxereya, ewehakaru mukhwipi, khayaamoonnetho mukina, ahikhanle Yeesu. 9 Ekhuruwaka vamwaako, Yeesu aawooperera weera ehaaleele akina yeeyo yoonnaaya, mpaka ehuhuweene yeeyo Mwaana a mutthu aneeraawe avenyerere mookhwaani. 10 Awo yaavitha mwaha ole yaaleru, evaanyihanaka entaphulela eheeni “ovenyerera mookhwaani.” 11 Awo yaamukoha: “Heeni anamawera a nlamulo* aneeraaya weera ontthuneya toko Eliya orwa?” 12 Yeesu aawaakhula: “Mwa yeeyo, Eliya onimoowa toko ni onooreherera itthu sootheene. Vano, heeni elempwalaaya weera ontthuneya Mwaana a mutthu ohaawa vancipale ni okhoottiwa? 13 Mene Miyo kinooleelani: Eliya ohoowa, ni awo yaampakela yoowo sootheene seiyo yaatthunaaya, ntoko elempwalaaya mwaha wa yoowo.” Yeesu onimulamiha mmiravo orino munepa woonanara 14 Yaaphiyalaaya weiwo yaaraayawo oohusera akina, yaawoona atthu ancipalexa yaarukureenreene ni anamawera a nlamulo* evaanyihanaka ni yaawo. 15 Emoonakaru Yeesu, atthu ancipale yaatikhina ni yaamutthimakela weera yamuulumihe. 16 Yeesu aahaakoha: “Eheeni mumvaanyihanaanyu?” 17 Mulopwana mmoha eriyari ya atthu ancipale aamwaakhula: “Muhusiha, kihoowiiherani mwanaka orino munepa onimuhiiha wuuluma. 18 Imaara sootheene munepa onimvaraaya, onoomvonyera vathi. Owo onnakhuma nimpheru mmwaano, onnakhuuriha maino, ni erutthwaawe ennakhala yoowuuma. Kohaavekela oohuseraanyu weera yoomole munepa, mene yaahooceela.” 19 Yeesu aawaakhula: “Ekhapira yoohiroromela! Ihuhu ihayi kineeraaka kikhale ni nyuwo? Mpaka yaakhani kineeraaka koovileleni? Mukiwiihere mmiravo.” 20 Vano awo yaangwiihera. Omoonakaru munepa Yeesu, woowaakuveya waamuthukumeliha mwaana. Mwaana ole aamorela vathi ni aapacera wuupuruwa, akhumihaka nimpheru mmwaano. 21 Yeesu aahaakoha atithawe mwaana: “Opacenre yaakhani eeraka hiiha?” Awo yaamwaakhula: “Opacenre areene mwaana. 22 Imaara sincipale munepa wannamvonyera mmooroni ni mmaahini weera omwiive. Mwawera opaka etthu, munimorele ikharari ni munikhavihere.” 23 “Mwawera?” Yeesu aamweerela. “Sootheene singwereya wa yoowo onroromela.” 24 Woowaakuveya atithawe mwaana yaakhuwela: “Koororomela, mukikhavihere owina ohiroromelawaka.” 25 Yeesu awoonaka atthu ancipale ekhuveelaka, aahiiha munepa woonanara, eeraka: “Munepa woohuuluma ni woohiiwa, Miyo kinoolamula weera okhume wa yoowo, ni ohimvolowetho mwaana ola.” 26 Munepa waakhuwela, onamutatha, onavenya. Mwaana aakhala ntoko muttembo, moota wooweera atthu ancipale yaaheera: “Ohookhwa.” 27 Yeesutho aamvara ntata, anamvenxa, ni owo aneemela. 28 Yeesu avolowaka mpaani, oohuseraawe yaamukoha wiiphiini: “Heeni nihiwenraahu woomola?” 29 Yeesu aawaakhula: “Moota ola omvenya paahi ni ovekela.” 30 Awo yaavenya nipuro nne ni yaaheetteetta oGalileiya. Yeesu khaatthuna weera akina ehikhale oosuwela weiwo yaaraayawo, 31 niwoko eera aahusihaka oohuseraawe. Vano aaweerela: “Mwaana a mutthu anaavahereriwe mmatatani mwa atthu. Awo eniimwiive, ni akhwiyeene mahuku mararu, anaavenyerere.” 32 Mene awosa khayiiwexenxe yeeyo aatthunaawe ohima, ni yaamuhovela omukoha. Mutokweene taani? 33 Yaaphiya oKafaranawu. Areene owaani, aahaakoha: “Eheeni mwaavaanyihanaanyu mphironi?” 34 Mene awosa yaamaala, niwoko mphironi yaavaanyihana mwaha wa mutokweene taani? 35 Aakilaanthaawe, Yeesu aawiitthana muloko neeli aweerelaka: “Akhala mukina ontthuna okhala oopacera, akhaleke oomalihera, ni murumeiyi a atthu ootheene.” 36 Vano, amukuxaka mwaana, aamweemexa eriyaraaya. Amukhubaaraka, aaweerela: 37 “Yoowo ommwaakhela mwaana mmoha ntoko ola mwa Nsinanaka, onkaakhela Miyo. Ni yoowo onkaakhela Miyo, khankaakhela Miyo, mene Yaale akiruminghe.” Amwiittana ni asinthamwene 38 Yohaane aamweerela Yeesu: “Muhusiha, naamoona mutthu oomolaka minepa soonanara mwa Nsinananyu. Naaheerera omooceeliha, niwoko owo khahiyono awihu.” 39 Yeesu aamweerela: “Muhimooceelihe. Khaawo ompaka yootikhiniha mwa Nsinanaka, ongwera okuulumela vahoolo vakhaani. 40 Vano, yoowo ohiittanne ni hiyo, onoonikhalela hiyo. 41 Miyo kinooleelani ekhaikhai: yoowo onoovahani ekoomixi emoha ya maahi mwa Nsinanaka niwoko muri aKristu, vekhaikhai kharwa ayeleela ntthuvelonawe. Yootthekiha 42 Akhala mukina onimutthekiha mmoha a asikhaani ala ankiroromela Miyo, waari fataari ovonyeriwa mphareiyani ni nluku ntokotoko ntthukeleliweene vaxiko. 43 Ntatananyu nootthekihani, mukwituleke. Fataari ovolowa mookumini oorakaleene, ohikhanle mureeneno matata meeli orowa mmooroni, weiwo mooro ohimmalaaya. 45 Nnaawonanyu nootthekihani, mukwitule. Fataari ovolowa mookumini oorakaleene, ohikhanle mureeneno inaawo piili ovonyeriwa mmooroni. 47 Niithonanyu nootthekihani, muzoole. Fataari ovolowa moomweneni wa Muluku ni niitho nimoha paahi, ohikhanle mureeneno maitho meeli, ovonyeriwa mmooroni, 48 weiwo nyuungusaya sihinkhwaayawo ni mooro ohinciphaayawo. 49 Ootheene eniyeeleeliwe ni mooro. 50 Maakha ti ooreera. Osivawayatho wamala, eniyeeleeliwe hai maakha ale? Mukhalane maakha mwa nyuwo muneenaanyu, ni mukhale ni murettele mukina ni mukhwaawe.” |
Makhua Shirima Bible © Christelike Lektuurmaatskappy NPC, 2021.
CHRISTELIKE LEKTUURMAATSKAPPY NPC