Marku 6 - Emakhuwa Bible

Mprofeeti ohinttittimihiwa mweelaponimwawe

¹ Yeesu aavenya vaavaale ni aarowa wa esidadaawe, ahooliwaka ni oohuseraawe.

² Niphiyakaru nihuku na eSaabadu, aapacera oxuttiha muSinagogani*, ni ancipale yaamwiiwale, yaatikhina. Awo yannakohana: “Itthu seiya ophwannye woowi Mulopwana Ola? Miruku heeni ovahiwaawe weera mpaka apake sootikhiniha?

³ Khahiyono Ola kalipinteiro, Mwaana a Mariya ni munna a Yakobe, Yoseete, Yudasi ni Simeyoni? Axirokoriye khaakhanle va ni hiyo?” Ni awo yaamunyoonyeriwa Yoowo.

⁴ Yeesu aaweerela: “Paahi mweelaponimwawe muneenaawe, variyari wa emusaawe ni vaatewawe, mprofeeti khanttittimiheya.”

⁵ Ni khaawera opaka weiwo sootikhiniha, ohikhanle owiikaathera matata oovoreiwa akina ni waalamiha.

⁶ Ni Yeesu aatikhina mwaha wa ohiroromelawaya. Vano Yeesu aavenya eetteettaka mmittettheni, axuttihaka.

Yeesu onaarumiha muloko neeli

⁷ Awiitthanaka muloko neeli wa Yoowo, aahaarumiha eeli-eeli, ni aahaavaha ikuru soolamula minepa soonanara.

⁸ Malamulowaawe yaari ala: “Muhikuxe naari etthu mphironi, ahikhanle ttootto. Muhikuxe yooca, hata esaakho, naari musurukhu mmahotthanimwanyu.

⁹ Ngwareke ikwakwaatta, muhikuxetho mukaandyo wanaaveeli.

¹⁰ Imaara sootheene muneeraanyu mwavolowe vatthokoni, mwakhale weiwo mpaka ovenyawanyu.

¹¹ Wakhala muttetthe wakhalaru oneera ohiwaakheleni, naari ohiwiiweni, mwatathe ntthupi na inaawosanyu, mwaavenyaka ntoko eneneero ya nthorihelonaya.”

¹² Awo yaavenya ni yaalaleiya weera muloko orukunxe mirimasaya.

¹³ Yaahoomola minepa soonanara sincipale ni yaahaattikitthela aretta ancipale ni makhura, ni yaahaalamiha.

Ohitiwa wa Yohaane mpatisa

¹⁴ Mwene Herodi aahiiwa suulummwaka itthu iye, niwoko Nsina na Yeesu naasuwanyeyaxa. Atthu akina yeera: “Yohaane mpatisa oovenyerera mookhwaani. Tivawo simpakeyaaya mwa yoowo ikuru sootikhiniheiya.”

¹⁵ Akina yeeratho: “Owo ti Eliya,” ni akinatho yaanaakhulela yeeraka: “Owo ti mprofeeti ntoko maprofeeti a khalayi.”

¹⁶ Iiwalaawetho Herodi itthu iye, aaheera: “Yohaane – mulopwana kaamuhitalaaka – oovenyerera mookhwaani.”

¹⁷ Ti Herodi muneenaawe aavanghe nlamulo weera emvare Yohaane, emutthuke, ni engwalele mukaliposo, niwoko Herodi aathelanne ni Herodiya, mwaara a munneiye iitthaniwa Filipe.

¹⁸ Vano, waari niwoko Yohaane aamweerenlaawe Herodi: “Khamuntthuniheriwa okhala ni mwaara a munninyu.”

¹⁹ Hiiho, Herodiya aamuthanya ni aatthuna omwiiva, mene khaawera opaka,

²⁰ niwoko Herodi aamoova Yohaane ni aamwaakiha, asuwelaka weera aari mulopwana oororomeleya ni ootteela. Aamwiiwaawe Yohaane, aatikhinaxa. Waarookhalaru hiiho, annatthuna omwiiwa.

²¹ Nihuku nimoha yaaphiya ehuhu yootthuneya. Nihuku na wuupuwelela oyariwawawe, Herodi aahaavaha yooca ya efesta etokotoko ahooleli oottittimiheyaxa, ahooleli a anakhotto ni atthu oosunwanyeiyaxa a mweelaponi ya oGalileiya.

²² Avolowaka mwaana muthiyana a Herodiya ni iinalaawe, aamusiveliha Herodi ni oolattuliwa. Mwene aamweerela mwaamwali ole: “Okivekeleke yakhalaru etthu ontthunaawo, ni miyo kinimoovaha.”

²³ Ni aamuroromeliha ni olipela: “Yakhalaru etthu oneeraawo okivekele, miyo kinimoovaha, mpaka mpatta wa eriyari ya omwenaaka.”

²⁴ Owo aavenya ni aahaavekela amayawe: “Kivekele eheeni?” Awo yaamwaakhula: “Muru wa Yohaane mpatisa.”

²⁵ Woowaakuveya mwaamwali aahaakuveya weera amuleele mwene yeeyo aatthunaawe, eeraka: “Kintthuna vaanaano vaava weera mukivahe muru wa Yohaane mpatisa musasaanini.”

²⁶ Mwene aathananaxa vancipale, mene niwoko na olipela ni na oolattuliwa, khaatthunne okhootta yoovekela ya mwaamwali.

²⁷ Hiiho aamurumiha nakhotto oowiiva weera amuruuhele muru wa Yohaane. Mulopwana aarowa, anamuhita Yohaane mukaliposo,

²⁸ anaruuha muruwaawe musasaanini. Owo aamvaha muru mwaamwali ni owo aahaavaha amayawe.

²⁹ Yiiwalaaya yeeyo, oohusera a Yohaane yaahoowa, yaakuxa muttembwaawe ni yaavitha munihiyeni.

Yeesu onaaciha atthu macira miloko mithanu

³⁰ Arummwa yaathukumana ni Yeesu ni yaamuthalihera sootheene yaapankaaya ni yaaxuttinghaaya.

³¹ Yaakhala atthu ancipale erowaka ni erwaaka, moota wooweera awo khayaarino ehuhu weera ece. Yeesu aaweerela: “Ngwe ni Miyo vanipuroni na wiiphiini, ni mwiitthuuwe vakhaani.”

³² Hiiho awo yaasusa munikulani mpaka nipuro na wiiphiini.

³³ Ancipaletho a yaale yaawoonne evenyaka, emusuwelaka Yeesu, yaatthimakela isidade sootheene ni yaaphiya weiwe Yeesu ahinaaye.

³⁴ Avenyaka Yeesu munikulani ni awoonaka atthu ancipale, aahaamorela ikharari, niwoko yaari ntoko ikhondoolo soohikhalano mukukhuli. Vano aapacera waaxuttiha itthu sincipale.

³⁵ Waari oxekuwa, tivawo oohuseraawe yaamwaattamenlaaya Yoowo, emweerelaka: “Nna nri nipuro na ottaiwene, ni wooxekuwa.

³⁶ Mwaarumihe atthu weera erowe mmawaani ni mmittettheni soowaattamana weera yathume etthu yooca.”

³⁷ Wa soothesene, Owo aawaakhula: “Mwaavahe nyuwo etthu weera ece.” Awo yaamweerela: “Eyo entthuneya idinaariyu* macira meeli! Ninanariheke musurukhu mwincipale ni ipaawu weera naavahe yooca?”

³⁸ Owo aahaakoha: “Murino ipaawu ihai? Ngwehe!” Ewehakaru, yaamweerela: “Ipaawu ithanu ni ihopa piili.”

³⁹ Vano Yeesu aahaalamula weera awo yaakilaathihe atthu ootheene mapuro mapuro munnyepuni.

⁴⁰ Hiiho awo yaakilaathi mmapuroni, ekhalaka ncira ncira, naari miloko mithanu mithanu.

⁴¹ Akuxaka ipaawu ithanu ni ihopa piili ni awehaka wiirimu, aatthapela ni aameiyanya ipaawu. Vahoolowaya aahaavaha oohuseraawe weera yaakawele atthu. Ni aahaakawelatho ihopa piili ootheene.

⁴² Ootheene yaahooca ni yaavona,

⁴³ ni oohusera yaathukumanyiha mipapara muloko ni miili soosareya mivithe sa ipaawu ni ihopa.

⁴⁴ Yaaciiye yaari asilopwanaru macira miloko mithanu.

Yeesu oneetta vasulu wa maahi

⁴⁵ Vahoolo vakhaani, Yeesu aahaanyesereriha oohuseraawe weera evolowe munikulani ni ehoolele erowaka oBetisayida, Owo aalaxeraka atthu ancipale.

⁴⁶ Aalaxenreene, Yeesu aawela vamwaakoni weera avekele.

⁴⁷ Wiilaka, nikula naari eriyari ya ephareiya, ni Yeesu aahanle meekhaawe vatthayani.

⁴⁸ Owo aawoona oohuseraawe ehaawanaka weettiha, niwoko epheyo yaaweela weiwo yaakelaayawo. Oyaaka ni oxa, Yeesu aarowa wa yaawo, eettaka vasulu wa ephareiya. Vanonto eeraka avire wa yaawosa.

⁴⁹ Awo emoonakaru eettaka vasulu wa ephareiya, yuupuwela weera aari namanxepaani. Vano yaakhuwela,

⁵⁰ niwoko ootheene yaamoona ni yaahookhwa maririmela. Woowaakuveyatho Yeesu aaweerela: “Mwiilipihere! Ti Yoomi. Muhoove!”

⁵¹ Aavolowa munikulani vamoha ni yaawo, ni epheyo yaamaala. Awo yaatikhinaxa, niwoko

⁵² khayiiwexenxe yootikhiniha ya ipaawu, woonaka weera mirimasaya saari soowuuma.

⁵³ Elapuwakaru ephareiya, yaaphiya oGenesarete, ni weiwo yaatthukelela nikula.

⁵⁴ Evenyakaru munikulani, atthu yaamusuwela Yeesu.

⁵⁵ Awo yanneetteetta elapo yootheene ele, ni yannaakuxa mmarepani aretta, yaaronghaka weiwo yiiwaaya weera Owo aakhalawo.

⁵⁶ Mapuro ootheene aakhalaawewo, hata mmittettheni, musidade, mmawaani, awo yaawiikaathi aretta mmitthekoni sa mwemmo. Yannamudyoonttelela weera naari yaatamve mmakoteloni wa mukaandyowaawe. Vano, ootheene yaamutamve, yaalama.