Marku 15 - Emakhuwa Bible

Yeesu ohoolo wa Pilatu

¹ Oyaaka ni oxa ahooleli a asaserdoti*, asitokweene a muloko, anamawera a nlamulo* ni ootheene a eSineedriyu* yaaphiya woovaanelani. Emutthukaka Yeesu, yaamukuxa ni yaamvaherera Pilatu.

² Pilatu aamukoha: “Nyuwo muri mwene a aYuda?” Yeesu aamwaakhula: “Nyuwo muneera yeeyo.”

³ Ahooleli a asaserdoti* yaamoothera Yeesu itthu sincipale.

⁴ Vano Pilatu aamukohatho: “Nyuwo khamunaakhula? Moone itthu sincipale awo angwootheraayani?”

⁵ Yeesutho khaakhunle hata nsu nimoha, ni Pilatu aatikhina.

⁶ Vanonto, wa ehuhu ya efesta yaari ekhovelelo yoomutaphula namatthukiwa mmoha, mwa yoowo muloko wa atthu waamvekelaaya.

⁷ Mulopwana mmoha iitthaniwa Baraba aari okaliposo vamoha ni anamatthukiwa akina yaawiivale atthu moowanani ni atthu ancipale.

⁸ Atthu ancipale yaaphiya wa Pilatu ni yaamvekela weera apake yeeyo aakhovelelaawe opaka.

⁹ Pilatu aahaakoha: “Muntthuna weera miyo kimutaphule Mwene a aYuda?”

¹⁰ Aasuwela weera ahooleli a asaserdoti* yaamvaherera wa yoowo Yeesu niwoko na nrima.

¹¹ Mene ahooleli a asaserdoti* yaahaasesera atthu ancipale omvekela Pilatu weera amutaphule Baraba, ahikhanle Yeesu.

¹² Vano Pilatu aahaakoha: “Nkeereke hai ni Yoole nyuwo mummwiitthanaanyu Mwene a aYuda?”

¹³ Awo yaakhuwela: “Munkhomele!”

¹⁴ Pilatu aahaakoha: “Niwoko heeni? Mulattu heeni otthenkaawe?” Vano awosa yaatepa okhuwela: “Munkhomele!”

¹⁵ Atthunaka waasiveliha atthu ancipale, Pilatu aahaataphulela Baraba ni aalamulela weera Yeesu awaxuliwe, ni aamwinnyerera weera akhomeliwe.

Anakhotto animpuhera Yeesu

¹⁶ Anakhotto yaamurongha Yeesu mpaani mwa Pilatu, eyo tiiyo oPretoriyu, ni yaahaathukumanya anakhotto ootheene.

¹⁷ Yaangwariha Yeesu mukaandyo wooxeera ni yaapaka ecireemba ya nyiiwa ni yaangwariha Yoowo.

¹⁸ Yaapacera omuulumiha yeeraka: “Salaama, Mwene a aYuda!”

¹⁹ Yannammana mmuru ni ekopo ni yannamusenyela. Vano yaamukokhorela ni yaamuttottopela.

²⁰ Emalihaka omutheiya, yaamurula mukaandyo wooxeera ni yaangwariha ikuwosawe enamukhumihera vaate weera emukhomele.

Othomeiwa wa Yeesu

²¹ Mulopwana mmoha a oKireene, iitthaniwa Simeyoni, atithawe Alesandere ni Rufo, aavira weiwo akhumaka omatta. Yaamunyeserera weera akuxe muttanda.

²² Yaamurongha Yeesu vanipuroni niitthaniwa Golgota, entaphulela nipuro na nikarakasa.

²³ Yaamvaha eviinyu yootakansiwa ni emira*, vaheera Owo khaawunre.

²⁴ Vano yaamukhomela. Yaakawana ikuwosawe, epakaka macitta weera esuwele ni mpatta heeni wa ikuwo khula mutthu eeraawe akhaleno.

²⁵ Yaari ewoora yanaararu awo yaamukhomenlaaya.

²⁶ Ni yoomootheraaya yaalempwale yaari ela: “Mwene a aYuda.”

²⁷ Yaahaakhomela anamwiiya eeli vamoha ni Yoowo – mmoha moonowaawe mulopwana ni mukina muthiyana.

²⁹ Yaawo yaavira, yaamuruwana, yiinihaka nyuru, yeeraka: “Khuu! Weyo waarowa ophwata Empa ya Muluku ni waateka wa mahuku mararu,

³⁰ wiivuluxeke ni okhuruwe vamuttandani!”

³¹ Mooteene yoowo ahooleli a asaserdoti* ni anamawera a nlamulo* yaamutheiya yaaworu yeeraka: “Aahaavuluxa akina, mene khangwera wiivuluxa!

³² Kristu, Mwene a aYixrayeli! Akhuruwe vamuttandani weera noone ni nimuroromele.” Yaale yaathomeiwe vamoha ni Yoowo yaamuruwanatho.

Okhwa wa Yeesu

³³ Okhuma nsuwa vamuru yaakhala epiphi mweelaponi yootheene wookwana iwoora tthaaru.

³⁴ Sikwanakaru iwoora tthaaru, Yeesu aakhuwela vancipale: “Eloyi, Eloyi, lama sabaktani?” entaphulela: “Mulukwaaka, Mulukwaaka, heeni mukihingyaanyu?”

³⁵ Akina yaari weiwe, yiiwalaaya yeeyo, yaaheera: “Mmwiiwe! Owo onimwiitthana Eliya.”

³⁶ Mmoha a yaale, aatthimaka, anaruweiya nttapwatta mviinyuni yoonyuunya, aniikaathi okhwipi wa ekopo, anamvaha Yeesu weera awure, eeraka: “Noone Eliya awa omvenxa.”

³⁷ Vano Yeesu aahookhwa, akhuwelaka ni nsu ntokotoko.

³⁸ Ekuwo etokotoko ya Mpaani mwa Muluku yaahaahuwa, enakawanyeiya okhuma vasulu mpaka vathi.

³⁹ Iiwaka kenturiyoni* aari ohoolo wa Yeesu okhuwelawawe, ni amoonaka moota Yeesu aakhwaawe, aaheera: “Vekhaikhai, Mulopwana Ola aari Mwaana a Muluku.”

⁴⁰ Asithiyana akina yeera ewehaka ottaiwene. Variyariwaya aari Mariya oMagadalene, Mariya amayawe Yakobe mukhaani ni Yoseete, ni Salome.

⁴¹ Ereene oGalileiya, awo yaamutthara Yeesu ni yaamurumeela. Asithiyana ancipale akina yaarwiiye ni Yoowo oYerusaleemu, yaaritho weiwo.

Ovithiwa wa Yeesu

⁴² Naari nihuku na oreherera, eyo tiiyo, nihinaaye ophiya nihuku na eSaabadu. Wiilaka,

⁴³ Yoseefe a wArimatheiya, mutokweene mmoha oosuwanyeyaxa a eSineedriyu*, mwa yoowo aawehereratho omwene wa Muluku, aalipiha murimaawe ni aarowa wa Pilatu amvekelaka muttembo wa Yeesu.

⁴⁴ Pilatu aatikhina iiwalaawe weera Owo ohookhwa. Amwiitthanaka kenturiyoni*, aamukoha weera Yeesu aahookhwa.

⁴⁵ Aleeliwaka ni kenturiyoni*, aamvaherera Yoseefe muttembo.

⁴⁶ Vano Yoseefe aathuma esaanda, anakuruxa muttembo vamuttandani, anavitikelela muttembo ni esaanda, ni aniikaathi munihiyeni, noothipiwa vamwala. Vahoolowaya aahiikaathi nluku ntokotoko vamulako wa nihiye.

⁴⁷ Mariya oMagadelene ni Mariya amayawe Yoseete yaahoona weiwo Owo aavithiwaawe.