Marku 14 - Emakhuwa Bible

Yeesu onttikittheliwa oBetaniya

¹ Yaahala mahuku meeli paahi mpaka nihuku na mPaska* ni efesta ya ipaawu soohikhalano eferementu. Ahooleli a asaserdoti* ni anamawera a nlamulo* yeera yaasaasaka mukhalelo mmoha weera emvare Yeesu ni maswaawe, ni emwiive.

² Yaaheeratho: “Mmahukuni a efesta – hoye! Weera ohikhumelele onyakuleleiya wa muloko.”

³ Areene Yeesu oBetaniya akilaantheene vameesa owannyawe mulopwana oosuweliwa ntoko Simeyoni, namakokho, aamwaattamela Yeesu muthiyana mmoha ni mukoomba woopakiwa ni alabastre, ereenemo makhura oowunkhelaxa ni oorikaxa a nardu* ootteela. Owo aapwexa mukoomba ni aamuyehera Yeesu mmuru.

⁴ Akina yaari vaavaale yaapacera ottaandawulelana yeerelanaka: “Heeni onanariheya wu wa makhura?

⁵ Makhura ala yaaheereke othumihiwa ni idinaariyu* macira mararu, ni musurukhu owo yaaheereke ovahiwa atthu oohaawa.” Ni awo yaamoopopiha vancipale.

⁶ Yeesutho aaweerela: “Munghiye mmuretteleni! Heeni munimuxupaanyu ola? Owo ookipakela etthu yooreera.

⁷ Vano, atthu oohaawa eniikhale ni nyuwo mahuku ootheene ni ehuhu yootheene mwaatthunaka munoowera waakhavihera, mene Miyo nkinkhala ni nyuwo mahuku ootheene.

⁸ Owo oopaka yeeyo owenraawe. Oorihela makhura mweerutthunimwaka ehinaaye weera areherere ovithiwawaka.

⁹ Miyo kinoororomelihani weera, mapuro ootheene yaawo weiwo masu ooreeraxa eneeraaya elaleiwe, mweelaponi yootheene, yeeyotho owo opankaawe eniithalihiwe mpaka wuupuweleliwawawe.”

¹⁰ Vano Yudasi Iskariyoti, mmoha a muloko neeli, aarowa wa ahooleli a asaserdoti* weera amvarihe Yeesu.

¹¹ Awo yaahakalala yiiwalaaya yeeyo, ni yaamuroromeliha musurukhu. Hiiho owo aasaasa ehuhu yootthuneya weera amvaherere.

Yooca yoomalihera ya Apwiya

¹² Vanihukuni noopacera na efesta ya ipaawu soohikhalano eferementu, ehuhu yookhoveleliwa wiiva eputtiputthi ya mPaska*, oohusera a Yeesu yaamukoha: “Muntthuna woowi Nyuwo weera hiyo nooreherereleni yooca ya mPaska*?”

¹³ Vano Owo aahaarumiha eeli a oohuseraawe aweerelaka: “Mwavolowe musidadeni, ni munoomphwanya mulopwana akunxeene mwaapu wa maahi. Mwamutthareke

¹⁴ ni mwamuleele mwaneene empa owo aneeraawe avolowe: ‘Muhusiha onookoha: Nri woowi nipuronaka mwa nenno Miyo kineeraaka kimuce mPaska* ni oohuseraaka?’

¹⁵ Owo onoowooniherani nipuro ntokotoko na vasulu ni meesa ni ihice, sootheene soolikana. Mwanirehererele weiwo.”

¹⁶ Oohusera yaavenya, yaavolowa musidadeni, enaphwanya sootheene ntoko Yeesu aaleenlaawe. Ni yaamureherera mPaska*.

¹⁷ Wiilaka, Yeesu aaphiya vamoha ni muloko neeli.

¹⁸ Yaacaaya ekilaantheene vameesa, Yeesu aaweerela: “Kinooleelani vekhaikhai weera mmoha a nyuwo onookivariha, mukina onca ni Miyo.”

¹⁹ Awo yaathanana ni mmoha-mmoha aamweerela: “Vekhaikhai nkihiyono miyo!?”

²⁰ Yeesu aawaakhula: “Ti mmoha a muloko neeli, yoole onruweya epaawu vamoha ni Miyo esasaani emoharu yeela.

²¹ Mwaana a mutthu anaavarihiwe ntoko elempwalaaya mwaha wa Yoowo, mene Ii! Onoohaawa yoole anaamvarihe Mwaana a mutthu! Fataari mulopwana owo ahaayariwe!”

²² Ecaaka, Yeesu aakuxa epaawu, anatthapela, anameiyanya, anaavaha oohusera eeraka: “Mukuxeke, ela ti erutthwaaka.”

²³ Vahoolowaya aakuxa ekoomixi, anatthapela, anaavaha oohusera ni ootheene yaawura.

²⁴ Ni aaweerela: “Ela ti ephomaaka ya wiiraana eyeeheriwe, mwaha wa ancipale.

²⁵ Miyo kinooleelani weera nkingwuratho wa yoowiima ya ematta ya iwuuva* mpaka nihuku nenno kineeraaka kiwure moomweneni wa Muluku.”

²⁶ Emalihaka wiipa ecipo emoha, yaakhuma erowaka omwaako wa Sooliveira.

Yeesu onghima weera Pedru anaamurune

²⁷ Yeesu aaweerela: “Ootheene nyuwo munookihiya, niwoko elempwe: ‘Kinoomuvulaliha mukukhuli, ni ikhondoolo nsimwareye.’

²⁸ Kaavenyereraka, kinoorowa ohoolowanyu oGalileiya.”

²⁹ Pedru aaheera: “Hata ootheene yoohiyeeni, miyo nkinoohiyani!”

³⁰ Yeesu aamwaakhula: “Kinoororomelihani weera olelo va, ohiyuweene yoola, ohinaaye wiipa nthupi imaara piili, munookiruna imaara tthaaru.”

³¹ Pedrutho aanyeserera, eeraka: “Hata otthuneyaka okhwa ni Nyuwo, miyo nkinoorunani.” Ni ootheene akina yaahima yeeyo.

Yeesu oGesemani

³² Vano yaarowa wa nipuro niitthaniwa Gesemani, ni Yeesu aaweerela oohuseraawe: “Mukilaathiki va, Miyo kirowaka ovekela.”

³³ Yeesu aamurowano Pedru, Yakobe ni Yohaane, ni aapacera othanana ni oripiwa murima.

³⁴ Aaweerela: “Munepaaka woosareya othananaxa omalela okhwa. Mukhaleke va ni mulipelele.”

³⁵ Arowaka vahoolo vakhaani, aahuuramela vathi ni aavekela weera wawereya, asusihiwe wa Yoowo ewooreene yeele,

³⁶ eeraka: “Aba, Tiithi, wa Nyuwo sootheene sinoowereya. Mususihe wa Miyo ekoomixi ela, wa soothesene, ohikwaniheriwe otthunawaka, mene otthunawanyu.”

³⁷ Vano aahokoleela wa oohuseraawe ni aahaaphwanya ekonaka. Owo aamweerela Pedru: “Simeyoni, nyuwo munookona? Khamungwera olipelela hata ewoora emoha?

³⁸ Mulipelele ni muvekele, weera muhivolowe ngweereriwani. Munepa ori woolikaneene, mene erutthu yoohilipa.”

³⁹ Aasusatho ni aavekela moota mmoharu.

⁴⁰ Aahokolongwaawe, aahaaphwanyatho ekonaka, niwoko yaamooseela. Awo khayaasuwenle etthu yeeraaya ehime.

⁴¹ Ahokolowaka emaara yanaararu, Owo aaweerela: “Nyuwo nlelo munookona ni munimwiitthuuwa? Wookwana! Yoophiya ehuhu. Moone, Mwaana a mutthu onoovahereriwa mmatatani mwa anamattheka.

⁴² Muvenye ni nrowe. Iwe onimoowa namavarihaaka.”

Otthukiwa wa Yeesu

⁴³ Yeesu nlelo uulumaka, aaphiya Yudasi, mmoha a muloko neeli. Vamoha ni yoowo yaari atthu ancipale ekunxeene mavaka ni ikopo, yaarumihiwe ni ahooleli a asaserdoti*, anamawera a nlamulo* ni asitokweene a muloko.

⁴⁴ Namavariha aavaanenle eneneero ni yaawo: “Yoole miyo kineeraaka kamuulumihe ni ebeecu, ti Yoowo. Mumvare ni munlipihe.”

⁴⁵ Arowaka woowaakuveya wa Yeesu, Yudasi aamweerela: “Muhusiha!” ni aambeeca.

⁴⁶ Atthu yaamvara Yeesu ni yaamulipiha.

⁴⁷ Vano mmoha a yaale aari vakhiviru aatholola ekatana ni aamvulaliha murumeiyi a mutokweenexa a asaserdoti*, amukwasaka naarunawe.

⁴⁸ Yeesu aaweerela: “Niwoko na heeni nyuwo mungwaanyu okivara mukuxaleene ikatana ni ikopo? Apaale Miyo kinaalamula atthu weera ewane ni ebooma?

⁴⁹ Mahuku ootheene Miyo kaari ni nyuwo kixuttihaka Mpaani mwa Muluku, ni nyuwo khamwaakitthunke. Ontthuneyatho weera Yoolempwa* ekwaniheriwe.”

⁵⁰ Vano ootheene yaamuhiya ni yaatthawa.

⁵¹ Mmiravo mmoha, awanreene ekuwo mweerutthuni paahi, eera amuttharaka Yeesu. Yeereraka omvara,

⁵² aatthawa pwitipwiti, ahiyaka ekuwo ottuli.

Yeesu ohoolo wa eSineedriyu*

⁵³ Yaamurongha Yeesu wa mutokweenexa a asaserdoti*, ni yaathukumanatho ahooleli a asaserdoti*, asitokweene a muloko ni anamawera a nlamulo*.

⁵⁴ Pedru aamutthara ottaiwene mpaka vaate wa mutokweenexa a asaserdoti*. Akilaantheene weiwe ni anamalipelela, eera ooraka vamooroni.

⁵⁵ Ahooleli a asaserdoti* ni ootheene a eSineedriyu* yaahaasaasa mathowa a Yeesu weera emuthorihele okhwa, mene khayaaphwannye hata nthowa nimoha.

⁵⁶ Ancipale yaakhalela onamoona mwaha wa Yoowo moota woolokottha, mene maswaaya khayeererana.

⁵⁷ Vano akina yaaheemela ni yaamoothera moota woolokottha:

⁵⁸ “Hiyo naamwiiwa eeraka: ‘Miyo kinoophwata Empa ya Muluku epakiwe ni atthu, ni wa mahuku mararu kinooteka ekina yoohipakiwa ni atthu.’”

⁵⁹ Hata hiihotho, maswaaya khayeererana.

⁶⁰ Vano aaheemela mutokweenexa a asaserdoti* ohoolowaya, ni aamukoha Yeesu: “Nyuwo khamunaakhula seiyo awo angwootheraayani nyuwo?”

⁶¹ Yeesutho aamaala ni khaamwaakhunle etthu. Mutokweenexa a asaserdoti* aamukohatho: “Nyuwo ti Kristu, Mwaana a Muluku ooreelihiwa?”

⁶² Yeesu aamwaakhula; “Ti Yoomi. Nyuwo mmwimoone Mwaana a mutthu akilaantheene moono mulopwana wa Muluku a ikuru sootheene awaaka mmahutteni a wiirimu.”

⁶³ Mutokweenexa a asaserdoti*, aahulaka ikuwosawe, aakoha: “Khaninaatthuna anamoona akina!

⁶⁴ Nyuwo mohiiwa oveiha! Munuupuwela hai?” Ootheene yaathoriha weera Yeesu omphwanela okhwa.

⁶⁵ Vano akina yaapacera omusenyela, yaamutthuka maitho ni emmanaka Yoowo, yaamweerela: “Otthome!” Ni anamalipelela yaamwaakhela Yoowo, emmanaka.

Pedru onimuruna Yeesu

⁶⁶ Pedru areene vathi, vaate, murumeiyi muthiyana mmoha a mutokweenexa a asaserdoti* aavira vaavaale.

⁶⁷ Amoonaka Pedru ooraka, aangwehexexa ni aamweerela: “Nyuwotho mwaari ni Yeesu yoole muNasarete.”

⁶⁸ Wa soothesene, owo aamuruna Yeesu eeraka: “Nkimusuwenle, hata nkisuwenle yeeyo munuulumaanyu.” Ni aavenya arowaka mmutthekoni.

⁶⁹ Amoonakatho iwe murumeiyi muthiyana ole, aaweerela yaale yaari vakhiviru: “Ola ori mmoha a yaale.”

⁷⁰ Vano aarunatho. Vahoolo vakhaani, yaale yaari vakhiviru yaamweerela: “Vekhaikhai nyuwo muri mmoha a yaale. Nyuwo muri muGalileiya.”

⁷¹ Vano aapacera onyohola ni olipela: “Nkimusuwenle Mulopwana Owo nyuwo munimuhimaanyu.”

⁷² Woowaakuveya nthupi aahiipa emaara yanaaveeli. Vano Pedru aahuupuwelela masu Yeesu aamuleenlaawe: “Ohinaaye wiipa nthupi imaara piili, nyuwo munookiruna imaara tthaaru.” Ni aahiinla vancipale.