Marku 13 - Emakhuwa Bible

Ineneero sa emalihero ya ihuhu

¹ Akhumaka Mpaani mwa Muluku, mmoha a oohuseraawe aamweerela: “Muhusiha, moone maluku matokotoko ni soopakiwa sooreeraxa!”

² Yeesu aamukoha: “Munimoona sootheene soopakiwa sooreeraxa iya?” Va khanirwa nikhala nluku vasulu vanluku – sootheene nsiphwatiwe.”

³ Yeesu akilaathiyeene vamwaakoni wa Sooliveira ohoolo wa Empa ya Muluku, Pedru, Yakobe, Yohaane ni Andreiya yaamukoha vakhwipi:

⁴ “Munileele yaakhani sineeraaya seereiye itthu iya? Ni eniikhale eneneero heeni yoowoonihera weera sootheene iyo sihanle vakhaani okwaniheriwa?”

⁵ Yeesu aaweerela: “Mwiipasoope weera ahikhale aneera oolokottheni.

⁶ Ancipale animoowa mwa Nsinanaka yeeraka: ‘Ti miyo,’ ni eniyaalokotthe ancipale.

⁷ Mwiiwaka sa ikhotto ni suulummwaka sa ikhotto, muhoove. Ontthuneya weera itthu iyo seereiye, mene nlelo khoohiyono ommaleloni.

⁸ Elapo ni elapo eniiwane, aani omwene ni omwene. Onuukhale otetereiya mmapuroni makina, nitho etala. Itthu iyo siri epacerero ya ovoreiya wa oyara.

⁹ Nnene, niwoko munoovahereriwa wa alipa oowuuluma milattu ni munoomaniwa muSinagogani*. Nyuwo munooronghiwa ohoolo wa asitokweene ni mamwene niwoko na Miyo weera mwaakhalele onamoona yaawo.

¹⁰ Ni ontthuneya toko weera masu ooreeraxa ekhale oolaleiwa wa miloko sootheene.

¹¹ Imaara sootheene muneeraanyu muvonyeriwe okaliposo ni muronghiwe woothorihiwani, muheeteteele yeeyo muneeraanyu mwahime. Mwahime paahi yeeyo muneeraanyu mwavahiwe ehuhuweene yeeyo, niwoko khamuhiyono nyuwo muneera muulume, mene Munepa Wootteela.

¹² Munna mmoha anaamvarihe munneiye, amvahereraka mookhwaani, ni mooteene yoowo anaapake tiithi ni mwanawe. Anamwane eniiwane ni asinaangolo, ni mpaka eniiwiive.

¹³ Mmwithanyiwe ni atthu ootheene niwoko na Nsinanaka, mene yoowo anaavilele mpaka ommaleloni onoovuluxiwa.

¹⁴ Nyuwo moonaka etthu yoonanaraxa yoowuulihaxa muru yiikaathiweene vanipuroni ehintthunihiwaaya – namasoma, iiwexexe – vano yaawo eneera ekhale oYudeiya, etthawele nnyaakoni.

¹⁵ Yoowo aneera akhale vanipathoni na empaawe, ahikhuruwe, hata ahivolowe weera akuxe etthwaawe mwemmo.

¹⁶ Yoowo aneera akhale omatta, ahihokolowe weera akuxe mukaandyowaawe.

¹⁷ Hapo oowoopihaxa eniikhale mahukweene yaawo wa yaale asimaayi eniirupale ni wa asimaayi eneera yaamwiheke!

¹⁸ Muvekele weera itthu iyo siheereiye ehuhu ya mulaala,

¹⁹ niwoko mahukweene yaawo eniikhale mahuku a ohaawaxa ntoko kheeneereiye okhuma ehuhuweene yeele Muluku aapattunxaawe elapo ya vathi mpaka vaanaano vaava, hata kheerwa yeereiyatho.

²⁰ Yahaavukunle Apwiya mahuku awo, khaawo eera avuluxiwe. Vano, niwoko na oothanliwa Awo yaathanlalaaya, Apwiya yaavukula ehuhuweene yeeyo.

²¹ Akhala mukina aneera aweereleni: ‘Mmoone, Kristu ori va!,’ hoye hoye ‘mmoone, ori vale!,’ muhimuroromele!

²² Vano, eniikhumelele akristu ni maprofeeti oowootha eneera epake ineneero ni sootikhiniha weera, wawereya, yaalokotthe mpaka oothanliwa.

²³ Tivawo, nnene. Miyo koowoopererani ehinaaye.

²⁴ Wa mahukweene yaawo, waamalaka ohaawaxa iwo, ‘nsuwa khanirwa noopa, ni mweeri khoorwa waaratho.

²⁵ Ithenyeeri nsimore wiirimu, ni ikuru sa wiirimu nsittikinyeye.’

²⁶ Ehuhuweene yeeyo anooniwe Mwaana a mutthu awaaka mmahutteni ni ikuru sitokotoko ni ovuwaxa,

²⁷ ni Owo anaarumihe andyelowaawe ni eniyaathukumanyihe oothanliwaawe wa ilapo sootheene, okhuma ekotenle elapo ya vathi mpaka ekotenle erimu.

²⁸ Muxuttere wa mwiri wa efiigu osoma wu: iphandisaya sakhala sikithi ni makukhwaaya yaaphuwaka, munoosuwela weera eyiita yookhuveela.

²⁹ Hiihotho, moonaka itthu iyo seereiyaka, musuwele weera Owo ori vakhiviru – vamulako!

³⁰ Miyo kinoororomelihani: ekhapira ela kheenrowa ovira mpaka sootheene iyo seereiye.

³¹ Wiirimu ni vathi onuuvire; maswaakatho kheerwa evira.

Nihuku ni ehuhu kheesuweliwe

³² Mwaha wa nihuku nno ni ewoora eyo khaawo onsuwela, hata andyelo a wiirimu, hata Mwaana, ehikhanle Atiithi paahi.

³³ Nnene! Mwiipasoope! Nyuwo khamusuwenle eneeraaya erwe ehuhuweene yeeyo.

³⁴ Ori ntoko mulopwana ompwaha ni mukwahaawe. Owo onghiya empaawe, amuhiyeraka murumeiyi ti murumeiyi ni mutekwaawe, ni onimulamula namalipelela milako weera alipelele.

³⁵ Tivawo, mulipelele, niwoko khamusuwenle ewoora heeni mwaneene a vaate aneeraawe awe – hata okhalaka wiilaka, naari ohiyu eriyari, naari oyaaka ni oxa, hata oxeexelo.

³⁶ Owo awa Wootutuxereya, ahoophwanyeni mukonaka!

³⁷ Yeeyo kinooleelaakani, kinaaleelatho ootheene: mwiipasoope!”