Marku 12 - Emakhuwa Bible

Yoolikanyiha ya anamalima

¹ Owo aapacera waaleela ni soolikanyiha: “Mutthu mmoha aaphatteiya ematta ya iwuuva*. Aapaka mukuso orukureenreene. Aapakatho nipuro noovotta iwuuva*. Vahoolowaya aapaka nipuro na anamalipelela. Vano aawooliha ematta ya iwuuva* anamalima akina, anarowa ni mukwahaawe.

² Yaaphiyalaaya ehuhu ya ohepha, aamurumiha murumeiyi mmoha wa anamalima weera aakhele mpatta mmoha wa iwuuva*.

³ Vano awo yaamvara, enammana, enamoomola woohikuxa etthu.

⁴ Vano aahaarumihela murumeiyi mukina, ni yaammana mmurumwawe ni yaamuhasula.

⁵ Nlelo aahaarumihela mukina, vaheera yaamwiiva. Annaarumiha akina ancipale – akina anamalima yaahaamana, akina yaawiiva.

⁶ Muneene aahalanotho mmoha weera amurumihe: mwanawe oosiveleya. Woomaliha aamurumiha mwanawe, uupuwelaka: ‘Eniimuttittimihe mwanaka.’

⁷ Anamalimatho yaaheerelana yaaworu: ‘Ola ti namarandela a mwaneene. Ngwe, nrowe nimwiive, ni emattaawe eniikhale yawihu.’

⁸ Hiiho awo yaamvara, enamwiiva, enamvonyera okerekhere wa ematta ya iwuuva*.

⁹ Vano, anaapake eheeni mwaneene a ematta ya iwuuva*? Anaawe ni anaawiive anamalima ale, ni anaavahe akina ematta ya iwuuva*.

¹⁰ Khamunasome mBibiliyani: ‘Nluku anamateka yaakhoonttaaya naathatuwa nluku noottittimiheyaxa.

¹¹ Apwiya yaapanke yeeyo ni ti yootikhiniha vamaithoniwahu.’”

¹² Vano yaapacera waasaasa mukhalelo weera yaamvare, niwoko yaasuwela weera aahima yaale athalihaka yoolikanyiha ele. Yaahoovatho muloko wa atthu, tivawo yaamuhiyalaaya ni yaattimula.

Oliva musoko wa Seesari

¹³ Vahoolowaya yaamurumihela Yeesu akina a aFarisi* ni a Herodi weera emvare Yeesu ni maswaawe.

¹⁴ Awo yaamwaattamela Yoowo ni yaamweerela: “Muhusiha, noosuwela weera muri Oororomeleya ni khamumviriyeliwa ni akina niwoko khamunthalu, mene munxuttiha ephiro ya Muluku mweekhaikhaiyini. Ontthuneya oliva musoko wa Seesari, naari hoye? Niliveke, hoye hoye naari?”

¹⁵ Yeesutho, asuwelaka wiixeerawaya, aahaakoha: “Heeni muneereraanyu okiphariha mutaphani? Mukiwiihere edinaariyu* emoha weera Miyo koone.”

¹⁶ Awo yaangwiihera nikhoobiri, ni Owo aahaakoha: “Ecaambulo ela ni yoolempwa ela yawani?” Awo yaamwaakhula: “Ya Seesari.”

¹⁷ Vano Yeesu aaweerela: “Ya Seesari, mumvahe Seesari, ni ya Muluku, mumvahe Muluku.” Ni yaatikhina mwaha wa Yoowo.

Ekhaikhai ya ovenyerera

¹⁸ Vano aSaduki*, aneera weera khoowowo ovenyerera, yaamwaattamela Yoowo ni yookoha ela:

¹⁹ “Muhusiha, Moisesi aalepa weera, munna a mulopwana akhwa ni aahiya amwaariye oohikhalano mwaana mulopwana, munneiye owo athelane ni naamukhweli owo weera amuyarele munneiye anamwane asilopwana.

²⁰ Yaakhala axunna athanneeli. Oopacera aathela ni aahookhwa woohimuhiya mwaana mulopwana.

²¹ Anaaveeli aathelanatho ni naamukhweli, menetho aahookhwa woohimuhiya mwaana mulopwana. Mooteene yoowo yaamukhumelelatho anaararu.

²² Wa athanneeli khaawo aamuhingye mwaana mulopwana. Woomalihera, aahookhwatho naamukhweli.

²³ Moovenyererani, muthiyana owo anaakhale mwaara a taani a asilopwana athanneeli, awo yeenre athanneeli ootheene yamuthelaka yoowo?”

²⁴ Yeesu aawaakhula: “Nyuwo mootapanya, niwoko khamusuwenle Yoolempwa*, hata ikuru sa Muluku.

²⁵ Moovenyererani, atthu khaanthela, hata khaanthelana, mene ari ntoko andyelo a wiirimu.

²⁶ Mwaha wa ovenyerera akhwiiye, nyuwo khamusomme elivuru ya Moisesi, mwaandiisini a niphuwa, moota Muluku aamweerenlaawe Moisesi: ‘Miyo ti Muluku a Abrahaamu, Isaaki ni Yakobe’?

²⁷ Owo khahiyono Muluku a akhwiiye, mene a akumi. Nyuwo mootapanya vancipale!”

Nlamulo noottittimiheyaxa

²⁸ Mmoha a anamawera a nlamulo* aamwaattamela ni aawiiwa evaanyihanaka. Uupuwelaka weera Yeesu aawaakhula nnene, aamukoha: “Nlamulo heeni noottittimiheyaxa noopwaha ootheene?”

²⁹ Yeesu aamwaakhula: “Noopwaha ootheene ti nna: ‘Mwiiwe aYixrayeli, Apwiya Mulukwaahu ti Apwiya amoharu.

³⁰ Mwaasivele Apwiya Mulukwaanyu ni murimaanyu wootheene, okumaanyu wootheene, wuupuwelawanyu wootheene ni ikurusanyu sootheene.’

³¹ Nanaaveeli ti nna: ‘Munsivele mukhwiinyu ntoko muniisivelaanyu.’ Khaawowo malamulo makina oopwaha yaala.”

³² Mulopwana aamweerela: “Ti wooreera, Muhusiha! Ti ekhaikhai mweenraanyu weera Muluku ti mmoharu, ni khawowo mukina, ahikhanle Yoowo.

³³ Omusivela Muluku ni murimaanyu wootheene, wuupuwelawanyu wootheene ni ikurusanyu sootheene, ni omusivela mukhwiinyu ntoko muniisivelaanyu, ti wootthuneyaxa oopwaha sooveleela soohisiwa ni soovaha sootheene.”

³⁴ Uupuwelaka weera owo aahaakhula ni miruku, Yeesu aamweerela: “Khamukhanle ottai wa omwene wa wiirimu.” Evenyero vaavaale mpaka muhoolo, khaawo yeerenre omukohatho.

Kristu ti Apwiya a Davide

³⁵ Axuttihaka Mpaani mwa Muluku, Yeesu aahaakoha: “Niwoko heeni anamawera a nlamulo* aneeraaya weera Kristu ti mwaana a Davide?

³⁶ Davide muneenaawe, eettihiwaka ni Munepa Wootteela, aaheera: ‘Apwiya yaaweerela Apwiyaaka: ‘Mukilaathi moonowaaka mulopwana mpaka Miyo kineeraaka kiwiikaathi amwiittanaanyu vathi wa inaawosanyu.’

³⁷ Davide muneenaawe ommwiitthana ‘Apwiya.’ Moota heeni aneeraawe akhale Kristu mwanawe?” Ni atthu ancipalexa yaamwiiwa ni ohakalala.

³⁸ Axuttihaka, Yeesu aaheera: “Mwiipasoope ni anamawera a nlamulo*. Awo antthuna weetta ni soowara sooreeraxa ni wuulumihiwa mwaatthuni.

³⁹ Antthunatho waakamela mapuro ootthuneyaxa muSinagogani* ni mapuro oottittimiheya a ifesta.

⁴⁰ Awo anca impa sa asinaamukhweli, ni amvekelaxa moota woowiixeera. Awo eniyaakhele nthorihelo noonanaraxa.”

Yoovaha ya naamukhweli

⁴¹ Yeesu aakilaathi ohoolo wa maala mwemmwe saaheliwaaya soovaha. Aahaaweha atthu ancipale ehelaka musurukhu mmaalani mwa soovaha. Anamapuha ancipale yaavonyeramo musurukhu mwincipale.

⁴² Vano naamukhweli mmoha oohaawa aaphiya, anahela makhoobiri meeli ooyevaxa, eyo tiiyo, waari musurukhu vakhaani woohitthuneyaxa.

⁴³ Awiitthanaka wa Yoowo oohuseraawe, Yeesu aaweerela: “Kinooleelani weera naamukhweli ola oohaawa oohela mmaalani a soovaha vancipale woowaapwaha akina.

⁴⁴ Ootheene aavonyera mwemmo paahi mpatta wa musurukhwaaya mwincipale, vaheera ola oovonyeramo moohaawanimwawe sootheene aarinaawe weera akhale.”