Marku 10 - Emakhuwa Bible

Mwaha wa omwalana

¹ Vano Yeesu aavenya vaavaale ni aarowa wa elapo ya oGalileiya ni okhopela wa oYordanu. Yaahoowatho atthu ancipale wa Yoowo, ni ntoko aakhovelenlaawe, Owo aahaaxuttiha.

² Akina a aFarisi* yaamwaattamela Yoowo weera emweerere, emukohaka: “Enootthuniheriwa wa mulopwana omwalana ni mwaariye?”

³ Yeesu aahaakoha: “Eheeni Moisesi oolamulenlaaweni?”

⁴ Awo yaamwaakhula: “Moisesi aatthunihera weera mulopwana amvahe ekaratta ya omwalana ni amoomoleke mwaariye.”

⁵ Yeesu aawaakhula: “Moisesi aalempe nlamulo nne niwoko na murimaanyu woowuuma.

⁶ Ompacereronitho wa ephattuwelo, Muluku aampaka mulopwana ni muthiyana.

⁷ Niwoko na yeeyo mulopwana anaahiye atithawe ni amayawe ni anaathukumane ni mwaariye,

⁸ ni ooweeli awo eniithatuwe mmoha paahi. Hiiho awo khaahiyono eeli, mene mmoha paahi.

⁹ Tivawo yaawo Muluku aathukumannyaawe, ahikhale mukina aneera aamwaramwaxe.”

¹⁰ Areenetho owaani, oohusera yaamukohakoha Yeesu mwaha wa yeeyo.

¹¹ Owo aawaakhula: “Khula mulopwana ommwalana ni mwaariye ni onthelana ni muthiyana mukina, anaamuraruwele muthiyana yoole oopacera,

¹² ni muthiyana amwalana ni iyawe ni atheliwa ni mulopwana mukina, anaararuwetho.

Yeesu ni anamwane

¹³ Akina yaangwiihera Yeesu anamwane weera aatave, mene oohusera yaahaahiiha.

¹⁴ Oonaka yeeyo, Yeesu aanyoonyiwa ni aaweerela: “Mwaahiyeke anamwane eweeke wa Miyo, ni muhiwooceelihe, niwoko omwene wa Muluku ori wa yaale anlikana ntoko yaawo.

¹⁵ Miyo kinooleelani ekhaikhai: Yoowo ohinaakhela omwene wa Muluku ntoko mwaana, khanrowa ovolowa moomweneni.”

¹⁶ Vahoolowaya, aahaakhubaara anamwane, anawiikaathera matata anaareeliha.

Yeesu ni namapuha

¹⁷ Yeesu eeraka avenye, mulopwana mmoha aamutthimakela Yoowo, anamukokhorela anamukoha: “Muhusiha ooreera, kipakeke eheeni weera kiphwanye okumi woohimala?”

¹⁸ Yeesu aamwaakhula: “Heeni nyuwo munkiitthanaanyu ‘ooreera’? Khaawo ooreera mukina, ahikhanle mmoha paahi, ori Muluku.

¹⁹ Nyuwo moosuwela malamulo: Muhiive, muhiraruwe, muhiiye, muhoothe, muhilokotthe, mwaattittimihe atithinyu ni amayinyu.”

²⁰ Vano owo aahima: “Muhusiha, ootheene ala kiniiwelela okhuma enamwanaaka.”

²¹ Yeesu aamuweha, aamusivela ni aamweerela: “Yohoohaleelani etthu emoha paahi. Murowe, mwathumihe sootheene murinaanyu, mwaavahe seiyo oohaawa, ni mmwikhaleno muhakhu wiirimu. Vahoolowaya, ngwe ni mukitthare.”

²² Iiwalaawe yeeyo, aathananaxa ni aasusa oohihakalala, niwoko aakhalano mihakhu sincipale.

²³ Yeesu aaweha mukhwipimwawe ni aaweerela oohuseraawe: “Ti woorikaxa anamapuha ovolowa moomweneni wa Muluku!”

²⁴ Oohusera yaatikhina ni masu ala. Yeesutho aaphitela eeraka: “Anamwane, ti woorikaxa ovolowa moomweneni wa Muluku.

²⁵ Ti wookhweiya ekamelu* ovira vamwiitheni wa singano, ohikhanle namapuha ovolowa moomweneni wa Muluku.”

²⁶ Oohusera yaatepaxa otikhina, ni yaakohana: “Vamwaheene yoola, taani aneera avuluxiwe?”

²⁷ Yeesu aahaaweha yaawo ni aahaakhula: “Wa mutthu khoongwereya, mene wa Muluku hoye! Itthu sootheene sinoowereya wa Muluku.”

²⁸ Vano Pedru aamweerela: “Hiyo noohiya sootheene ni nohoottharani.”

²⁹ Yeesu aamwaakhula: “Miyo kinooleelani ekhaikhai: ootheene ahiyale empaaya, axunnaya, axirokoraya, amayaya, atithaya, anamwanaaya ni imattasaya mwaha wa Miyo ni wa masu ooreeraxa,

³⁰ eniyaakhele hata ehuhu ya vaanaano vaava imaara ncira sa impa, axunna, axirokora, amaayi, anamwane ni imatta, ni vamoha ni seiya osoondiwa. Vano mweehuhuni mwa muhoolo eniyaakhele okumi woohimala.

³¹ Wa soothesene: ancipale ari oopacera eniikhale oomalihera, ni oomalihera oopacera.”

Yeesu onuulumatho sa okhwawawe ni ovenyererawawe

³² Awo yaarowa oYerusaleemu, ni Yeesu aahoolela. Oohusera yaatikhina, ni yaawo yaamutthara yaahoova. Owo aawiitthanatho muloko neeli vakhwipi, ni aahaaleela yeeyo yeera emukhumelele.

³³ Owo aaweerela: “Hiyo nneera nirowaka oYerusaleemu, ni Mwaana a mutthu anaavahereriwe wa ahooleli a asaserdoti* ni anamawera a nlamulo*. Awo eniimuthorihele okhwa ni eniimvaherere wa amalapo,

³⁴ mwa yaawo eniimveihe, eniimusenyele, eniingwaxule, ni eniimwiive. Yaamalaka mahuku mararu, anaavenyerere.”

Nivekelo na Yakobe ni Yohaane

³⁵ Vano Yakobe ni Yohaane, anamwane a Zebedeyo, yaamwaattamela Yoowo, yeeraka: “Muhusiha, nintthuna weera munipakele yeeyo nneeraahu noovekeleni.”

³⁶ Yeesu aahaakoha: “Muntthuna eheeni weera Miyo koopakeleni?”

³⁷ Awo yaamwaakhula: “Munitthunihere weera moovuwanimwanyu, hiyo nakilaathi mmoha moonowaanyu mulopwana ni mukina muthiyana.”

³⁸ Yeesu aaweerela: “Khamusuwenle yeeyo mumvekelaanyu. Munoowera owura ekoomixi kingwuraaka, hoye hoye opatisiwa ni opatiso Miyo kimpatisiwaaka?”

³⁹ “Ninoowera,” awo yaamwaakhula. Vano Yeesu aaweerela: “Nyuwo mmwiwure ekoomixi kingwuraaka, ni mmwipatisiwe ni opatiso Miyo kimpatisiwaaka.

⁴⁰ Okilaathitho moonowaaka mulopwana, hoye hoye muthiyana, nkihiyono Miyo kinlamula. Mapuro ala ari awaya yaale areherereliwe.”

⁴¹ Akina muloko, yiiwalaaya itthu iye, yaamunyoonyeriwa Yakobe ni Yohaane.

⁴² Yeesu aawiitthana ni aaweerela: “Nyuwo moosuwela weera yaale aniitthaniwa anamalamula a ilapo, anaalamula atthu a weiwo, ni asitokweenaaya anaanyeserera ni ikuru.

⁴³ Khoontthuneya hiiho ni nyuwo. Ohiyanawaya, yoowo ontthuna okhala mutokweene a variyariwanyu, ontthuneya weera akhale murumeiyaanyu.

⁴⁴ Yoowo ontthuna okhala oopacera, ontthuneya weera akhale epottha ya ootheene.

⁴⁵ Hata Mwaana a mutthu khaaweenle weera arumeeliwe, mene aani arumeele, ni weera avaherere okumaawe ntoko yoowoopola ancipale.”

Bartimeyo oohoona onimoona

⁴⁶ Vano yaaphiya oYeriko. Yeesu ni oohuseraawe nitho atthu ancipale akhumaka musidade, Bartimeyo, mwaana a Timaiyo, aari oohoona, eera akilaantheene mukerekhere wa musewe, avekelaka soovaha.

⁴⁷ Iiwalaawe weera aari Yeesu muNasarete, aapacera okhuwela: “Yeesu, mwaana a Davide, mukimorele ikharari!”

⁴⁸ Ancipale yaamuhiiha weera amaale, mene owo aatepa okhuwela: “Mwaana a Davide, mukimorele ikharari”!

⁴⁹ Yeesu aaheemela ni aaheera: “Mmwiitthane owo.” Ni yaamwiitthana mutthu oohoona emweerelaka: “Mulipihe murima! Muvenyeke, Owo onoowiitthanani.”

⁵⁰ Avonyeraka malayaawe okhwipi, aaheemela atuphaka ni aarowa wa Yeesu.

⁵¹ Vano Yeesu aamukoha: “Eheeni muntthunaanyu weera Miyo koopakeleni?” Mutthu oohoona aamwaakhula: “Muhusiha, miyo kintthuna woona.”

⁵² “Muroweke,” Yeesu aamweerela, “nroromelonanyu nohoolamihani.” Woowaakuveya aalama oohoona, ni aamutthara Yeesu mphironi.