Malekiya 3 - Emakhuwa Bible

Namutthenga arwaaka

¹ “Moone, Miyo kinoomurumiha namutthengaaka, anaareherere ephiro ohoolowaka. Hiiho, woowaakuveya Yave mummwaasaanyu onoorowa Mpaanimwawe; namutthenga a wiiraana, mwa yoowo nyuwosa munimuhaawelaanyu onimoorwa,” oneera Yave a ikuru sootheene.

² Vaheera, taani anaavilele nihuku na orwawawe? Ni taani aneemele ohoolowawe aarwaaka? Niwoko Owo anaakhale ntoko mooro ontteeliha ni ntoko sabawu oomukatthela.

³ Owo onookilaathi ntoko namatotoxa ni namatteeliha a eparatha*; onimwaatteeliha aLeevi aareherereke ntoko eyuuma yoorikaxa ni eparatha*. Hiiho, anookhala atthu eniimuruuhele Yave sooveleela moororomeleyani.

⁴ Vano sooveleela sa oYuda ni oYerusaleemu sinoomusiveliha Yave, ntoko mmahukuni avinre, aani ntoko mweehuhuni ya khalayi.

⁵ “Miyo kinimoorwa wa nyuwosa ntoko Mphuki. Woohipisa, kinookhalela onamoona mwaha wa akhwiri, anamararuwa, anlipela vasiiyoniwene ni wa yaale angwiiyera anamiteko ngwaalivani, anaahasula akwaasuni ni asinaamukhweli, ehooniheraka soophwanela wa anamarwa, ni ahinkittittimiha Miyo,” oneera Yave a ikuru sootheene.

⁶ “Mwa yeeyo, Miyo, Yave, nkinceendya. Tivawo nyuwosa, ekhapira ya Yakobe, muhiphwatiwaanyu.

⁷ Okhuma ehuhu ya makholowaanyu, nyuwosa moohiya ikanosaka, muhiiwelelaka. Muhokoleele wa Miyo, ni Miyo kinoohokoleela wa nyuwosa,” oneera Yave a ikuru sootheene. “Vaheera nyuwosa munkoha: ‘Nnihokolowe hai?’”

Muhimwiiyere Muluku

⁸ “Mutthu onoowera omwiiyera Muluku?” Wa soothesene nyuwosa munnakiiyera. Vano munkohatho: ‘Niwiiyenreni moota heeni?’ Mookiiyera sanaamuloko ni soovaha.

⁹ Nyuwosa moosareya malapho, niwoko muloko wootheene nyuwosa munnakiiyera.

¹⁰ Muruuhe sanaamuloko sootheene onsungiwa muhakhu weera ekhale yooca owannyaka. Mukooteno murima yeeyo,” oneera Yave a ikuru sootheene, “ni moone kaahihula milako sa wiirimu kooyeeherakani mareeliho mpaka muneeraanyu muhikhaleno woosungawo.

¹¹ Kinimooceeliha mahooxo ohonona soohepha, ni iwuuva* sinimwiima soowiimasaya mweehuhunimwaya,” oneera Yave a ikuru sootheene.

¹² “Hiiho miloko sootheene sinooweerelani ooreelihiwa, niwoko elapwaanyu enookhala yootikhiniheya,” oneera Yave a ikuru sootheene.

¹³ “Nyuwosa munnakuulumela masu oolipaxa,” oneera Yave. “Orookhalaru hiiho, munkoha: ‘Yoonanara heeni niwuulumenlaahuni?’

¹⁴ Nyuwosa mweenre: ‘Khoomvareleya muteko omurumeela Muluku. Ningwinani niiwelelaka ikanosawe ni olalamika ohoolo wa Yave a ikuru sootheene?

¹⁵ Tivawo, vano ningwoonelaahu okhala oohakalala anamwiixoona, niwoko sinnaweettelaxa nnene yaawo ampaka yoonanara. Mpaka yaawosa aningwanano Muluku animoopowa!’”

Ntthuvelo na oororomeleya

¹⁶ Vanonto yaale yaamoova Yave yaatthekula mukina ni mukhwaawe, ni Yave annaawiriyanela. Yaalempwa elivuru ntoko eyuupuxero vamaithoniwawe mwaha wa yaawo yaamoova Yave ni anttittimiha Nsinanawe.

¹⁷ “Vanihukuni kineeraaka kireherere muhakhwaaka” oneera Yave a ikuru sootheene, “awosa anookhala yawaka xaxaxa. Miyo kinoowuurela ntoko tiithi onimuurelaawe mwaniye ommwiiwelela.

¹⁸ Hiiho, nyuwosa munimoonatho ovirikana eriyai ya oororomeleya ni mutakhali, eriyari ya yaawo animurumeela Muluku, ni ahinimurumeela.”