Malekiya 1 - Emakhuwa Bible

Masu oopacera

¹ Wooperera wa masu a Yave mwa Malekiya mwaha wa aYixrayeli:

² “Miyo kohoosivelani mahuku ootheene,” oneera Yave. “Vaheera nyuwosa munkoha: ‘Munisivenle moota heeni?’ Khaahiyono Esawu munneiye Yakobe?” onghima Yave. “Wa soothesene, Miyo koomusivela Yakobe,

³ mene koomukhootta Esawu. Nyaakosawe kootatuxa munikareni noothaamiwa ni koohiya ilapo sa yoohiyeriwaawe moomakamo akhwatte a munikareni.”

⁴ Naari Edomi eeraka: “Noottikitthiwa, mene nnoorasela milepe.” Yave, a ikuru sootheene oneera: “Mutekeke, mene Miyo kinookurumula. Eyo enimwiitthaniwa elapo yooriheya, muloko wa yoowo Yave onyoonyeringwaawe wa mahuku ootheene.

⁵ Nyuwosa munimoona yeeyo ni maithwaanyu, mweereke: ‘Yave ti Mutokweene, mpakatho opwaha nyiinano sa oYixrayeli!’”

Osaserdoti* woonanarihiwa

⁶ “Mwaana onaattittimiha atithawe, ni murumeiyi onimuttittimiha pwiiyaawe. Miyo kaareene Tiithi, okittittimihawanyu ori woowi? Miyo kaareene Pwiiya, okoovawanyu ori woowi? Onookohani ti Yave, a ikuru sootheene. Ti nyuwo asaserdoti* munnyoosa Nsinanaka! Vaheera nyuwosa munkoha: ‘Ninyoosale moota heeni Nsinananyu?’

⁷ Munruuha valtaariniwaka* yooca yoohitteela! Orookhalaru hiiho, munkoha: ‘Nihoottittimihaleni moota heeni?’ Muneera weera khoontthuneya ottittimiha meesa a Yave!

⁸ Mweehuhuni yoowaaruuha axinama oohoona weera mwaapake yooveleela, nyuwosa khamunoonaru yakhalaru yoonanara. Mwaaruuhaka axinama oorakala ni oovoreiwa ntoko yooveleela, khamunona weera yoonanara! Mweerere omuvaha hiiho guvernadoraanyu! Weeraka owo onimoohakalalelani? Weeraka onoowaakhulani?” onkoha Yave a ikuru sootheene.

⁹ “Vano asaserdoti*, mweerere omukurunuxa Muluku weera animorele ikharari! Weeraka ni moota wa yoovaheene yeela mwa matataanyu Owo onoowaakhulani?” onkoha Yave a ikuru sootheene.

¹⁰ “Ii! Mmoha a nyuwosa aawanle milako sa Empa ya Yave! Hiiho naari mano mwaamupattiha vasiiyoniwene mooro valtaariniwaka*. Nkoohakalalenleni,” oneera Yave a ikuru sootheene, “ni nkinaakhulela soovahasanyu.

¹¹ Vano okhuma ninkhuma nsuwa mpaka ninkelaayawo, eriyari ya miloko, Nsinanaka nnookhala noottittimihiwaxa. Mipatta sootheene erubani* soovaha sootteela sinoohiseriwa Nsinanaka, niwoko Nsinanaka nnookhala noottittimihiwaxa eriyari ya miloko,” oneera Yave a ikuru sootheene.

¹² “Vaheera nyuwosa munghiiriha mweeraka weera meesa a Yave ti oohitteela, ni yoocaawe ti yoonyooseya.

¹³ Muneeratho: ‘Yoonilemelela! Muntheya munyoosaka,’ oneera Yave, a ikuru sootheene. ‘Mwaaruuhaka axinama oowiiyiwa, oorakala ni oovoreiwa mwaapakaka yooveleela, hiiho, kiwaakhulelekeni?’” onkoha Yave.

¹⁴ “Oolaphiwa akhale yoowo onkilokottha, areeneno mmuhuwoni napunci oohirakala, onroromeliha omveleela, vahoolowaya, anakiveleelela mwaamunama oorakala,” oneera Yave, a ikuru sootheene. “Vano Miyo ti Mwene Mutokweene, ni Nsinanaka nnooviwa eriyari ya miloko.”