Luuka 9 - Emakhuwa Bible

Yeesu onaarumiha 12

¹ Awiitthanaka Yeesu oohusera muloko neeli, Owo aahaavaha ikuru ni owera woomola minepa soonanara ni olamiha iretta.

² Aahaarumiha weera elaleiye omwene wa Muluku ni yaalamihe aretta,

³ eeraka: “Muhikuxe naari etthu mphironi: hata ttootto, hata nrupa, hata yooca, hata musurukhu, naari mukaandyo mukina.

⁴ Empa muneeraanyu mwavolowe, mwakhale mwemmo mpaka opwaha.

⁵ Yakhala akina eneera ehiwaakheleni, mwavenye esidade ele, mwatathe ntthupi na inaawosanyu ntoko eneneero ya nthorihelonaya.”

⁶ Hiiho awo yaavenya ni yaarowa mmittettheni, elaleiyaka masu ooreeraxa ni elamihaka mweelaponi yootheene.

⁷ Herodi tetrarkha* aahiiwa suulummwaka sa itthu sootheene seereiye ni aatikhina, niwoko akina yeera weera Yohaane oovenyerera mookhwaani.

⁸ Akina yeera weera Eliya aahiixoonihera, ni akinatho weera mmoha a maprofeeti a khalayi aahokoleela mookumini.

⁹ Heroditho aaheera: “Miyo koomuhita Yohaane. Vano, taani Ola mwa Yoowo kiniiwaaka itthu iya?” Ni aamwaasaasa weera amoone.

Yeesu onaandyeerera ipaawu

¹⁰ Ehokolowaka, arummwa yaamuthalihera yeeyo yaapankaaya. Vano Yeesu aahaarowano arummwa meekhaayaru ni yaarowa esidade yiitthaniwa Betsayida.

¹¹ Atthu ancipaletho yaahoonelela nipuronawe ni yaamutthara. Vano Owo aawaakhelela ni aahaaleela mwaha wa omwene wa Muluku, ni aahaalamiha yaawo yaatthuna olama.

¹² Wooxekuwani, oohusera muloko neeli yaamwaattamela Yoowo ni yaamweerela: “Mwaaleele atthu ancipale weera ettimule erowe mmamattani ni mmittettheni soowaattamana, weera yaphwanye yooca ni mapuro ookona, niwoko va nri nipuro noothowa itthu.”

¹³ Wa soothesene, Owo aawaakhula: “Mwaavahe nyuwo etthu weera ece.” Awo yaamweerela: “Nrino va ipaawu ithanu ni ihopa piili paahi, ohikhanle weera nirowe naathumele sooca atthu ancipale ala.”

¹⁴ Vano, yaari iwe waattamela macira miloko mithanu asilopwanaru. Vano Owo aaweerela oohuseraawe: “Mwaalamule weera ekilaathi wa mapuro-mapuro a miloko mithanu mithanu.”

¹⁵ Oohusera yaapaka yeeyo, ni ootheene yaakilaathi.

¹⁶ Akuxaka ipaawu ithanu ni ihopa piili ni awehaka osulu, aareeliha ni aameyanyiha. Vahoolowaya aahaavaherera oohusera weera yaakawele atthu ancipale.

¹⁷ Ootheene yaahooca ni yaavona. Oohusera yaathukumanyiha mipapara muloko ni miili soosareya ni mivithe.

Ohima wa Pedru

¹⁸ Emaara emoha Yeesu eera avekelaka meekhaawe. Vano, oohuseraawe yaari ni Yoowo, ni aahaakoha: “Atthu ankeerela Miyo taani?”

¹⁹ Awo yaamwaakhula: “Akina aneera Yohaane mpatisa, akina Eliya ni akinatho weera mmoha a maprofeeti a khalayi oovenyerera.”

²⁰ “Ankha nyuwo,” aahaakoha, “Munkeerela Miyo taani?” Pedru aamwaakhula: “Kristu a Muluku.”

²¹ Yeesu aawoopereraxa oohuseraawe weera ehaaleele akina yeeyo.

²² Aaweerela: “Ontthuneya weera Mwaana a mutthu ahaawe itthu sincipale, akhoottiwe ni asitokweene a muloko, ahooleli a asaserdoti* ni anamawera a nlamulo*, akhwe ni avenyerere nihuku nanaararu.”

²³ Yeesu aaweerela ootheene: “Akhala mukina ontthuna okitthara Miyo, iikhootte muneenaawe, akuxe muttandaawe khula nihuku ni akitthare.

²⁴ Vano, yoowo ontthuna ovuluxa okumaawe, anaayeleele, mene yoowo ongyeleela okumaawe niwoko na Miyo, anaavuluxe.

²⁵ Yooreera heeni ophwanya elapo ya vathi yootheene, aphwataka hoye hoye ayeleelaka muneenaawe?

²⁶ Akhala mukina aneera uuliwe muru niwoko na Miyo ni maswaaka, Mwaana a mutthu anuuliwetho muru wa yoowo aawaaka moovuwanimwawe ni moovuwani mwa Atithawe ni mwa andyelo ootteela.

²⁷ Miyo kinoororomelihani weera akina ari va kheerwa ekhwa ehinaaye woona omwene wa Muluku.”

Otatuxiwa wa Yeesu

²⁸ Eviraka mahuku mathannamararu vahoolo woohima itthu iye, Yeesu aamurowano Pedru, Yakobe ni Yohaane ni aawela vamwaakoni weera avekele.

²⁹ Avekelaka hiihaale, ekhalelo ya ekhovaawe yaathatuwa, ni ikuwosawe saakhala sootteela ntoko waara wa overinya.

³⁰ Atthu eeli, Moisesi ni Eliya, yaahiixoonihera ni yaapacera wuuluma ni Yeesu.

³¹ Yaahiixoonihera moovuwani ni yaahuuluma mwaha wa ovenyawawe Owo eeraawe akwanihere oYerusaleemu.

³² Pedru ni asikhwaawe yaamooseela, ni evenyaka, yaahoona ovuwa wa Yeesu ni atthu eeli yaari ni Yoowo.

³³ Atthu eeli ale yeeraka epwahe, Pedru aamweerela Yeesu: “Muhusiha, ti wooreera okhala vaava hiyo. Nrowe nipake mikottha miraru: mmoha wa Nyuwo, mukina wa Moisesi ni mukina wa Eliya.” Owo khaasuwenle yeeyo aahimmaawe.

³⁴ Owo uulumaawe, naahoowa nihutte ni naahaakhuneela, ni awo evolowaka munihutteni, yaahoova.

³⁵ Naakhuma munihutteni nsu neenre: “Ola ti Mwanaka Oothanliwa, mmwiiwe Yoola!”

³⁶ Emalihaka wiiwa nsu, oohusera yaahoona weera aahanle Yeesu paahi. Awo yaathokorora yeeyo mmurimanimwaya. Wa mahuku ale khayaathalihera akina yeeyo yoonnaaya.

Olamihiwa wa mmiravo aarino munepa woonanara

³⁷ Oxaawaya, ekhuruwaka vamwaakoni, atthu ancipale yaahoowa okumana ni Yeesu.

³⁸ Mulopwana mmoha variyari wa atthu ancipale aakhuwela: “Muhusiha, kinoodyoonttelelani weera mungwehe mwanaka, niwoko ori mmoharu kirinaaka.

³⁹ Munepa onnamvara ni woowaakuveya onnakhuwela. Vano munepa onnamutatha ni onnamukhumiha nipheru. Munepa mahuku ootheene onnalekela omuhiya ni onnamuhaaxa.

⁴⁰ Kohaadyoonttelela oohuseraanyu weera yoomole, mene khayaawenre.”

⁴¹ Yeesu aamwaakhula: “Ekhapira yoohiroromela ni yoonanara! Mpaka yaakhani kineeraaka kikhale ni koovileleni? Mukiwiihere va mwaninyu.”

⁴² Mmiravo awaaka, munepa waamvonyera vatthayani omthukumelihaka. Yeesutho aahiiha munepa woonanara, anamulamiha mmiravo, anamvaherera wa atithawe.

⁴³ Ootheene yaatikhina niwoko na otokweenaawe Muluku. Ereene ootheene ootikhina mwaha wa sootheene Yeesu aapakaawe, Owo aaweerela oohuseraawe:

⁴⁴ “Mwiiwe nnenesene itthu kineeraaka kooleeleni: Mwaana a mutthu anaavarihiwe mmatatani mwa alopwana.”

⁴⁵ Vaheera awo khayiiwexenxe etaphuleloweene yeele. Yaahiipithihiwa wa yaawo weera ehiiwexexe. Awo yaahoova omukoha mwaha wa yeeyo.

Mutokweene taani?

⁴⁶ Oohusera yaapacera waakhulana mwaha wa mutokweene taani.

⁴⁷ Yeesu, asuwelaka soowuupuwelasaya, aamukuxa mwaana ni aamweemexa mukhwipimwawe.

⁴⁸ Vano aaweerela: “Mutthu ommwaakhela mwaana ola mwa Nsinanaka, onkaakhelatho Miyo. Ni yoowo onkaakhela Miyo, ommwaakhelatho Yoole okiruminghe. Vano, yoole oyevanxe variyariwanyu, anaakhale mutokweene.”

⁴⁹ Yohaane aamweerela: “Muhusiha, naamoona mulopwana oomolaka minepa soonanara mwa Nsinananyu ni naamooceeliha, niwoko owo khahiyono awihu.”

⁵⁰ Yeesu aamweerela: “Muhimooceelihe, niwoko yoole ohiinanne ni nyuwo, anaakhale ni nyuwo.”

Amwiittana a oSamariya

⁵¹ Ekhuveelaka ehuhu Yeesu eeraawe awelihiwe wiirimu, Owo aalakela ni murima wootheene orowa oYerusaleemu.

⁵² Aahaarumiha arumeiyi ohoolowawe. Arumeiyi yaarowa mmuttettheni wa oSamariya weera yamurehererele.

⁵³ Mulokotho wa atthu ale, yoonaka weera Yeesu aatthuna orowa oYerusaleemu, khayaatthunne omwaakhela.

⁵⁴ Yoonaka yeeyo, Yakobe ni Yohaane yaamukoha: “Apwiya, muntthuna weera hiyo niitthane mooro wa wiirimu weera waananarihe?”

⁵⁵ Yeesutho aarukunuwa anaahiiha,

⁵⁶ anarowa mmuttettheni mukina.

Omutthara Yeesu ti woorika!

⁵⁷ Yeettaka mphironi, mutthu mmoha aamweerela: “Miyo kinimoottharani mapuro ootheene Nyuwo muntthunaanyu orowa.”

⁵⁸ Yeesu aamwaakhula: “Akhwatte aakhalano inyattasaya, ni apalame a wiirimu aakhalano ipuurusaya, mene Mwaana a mutthu khanono nipuro noowiiyaathi muru.”

⁵⁹ Aamweerela mukina: “Mukitthare.” Mene mulopwana aamwaakhula: “Apwiya, mukihiye toko kaavithe atithaka.”

⁶⁰ Yeesu aamweerela: “Mwaahiye akhwiiye evithaneke yaaworu. Wa soothesene, nyuwo murowe ni mwalaleiye omwene wa Muluku.”

⁶¹ Mukinatho aamweerela: “Kinimoottharani, Apwiya, mene mukihiye kihokolowe ni karaxele toko emusaaka.”

⁶² Yeesu aamwaakhula: “Yoole omvara ehipa awehaka ottuli, khamphwanela omwene wa Muluku.”