Luuka 5 - Emakhuwa Bible

Yeesu ongwiitthana oohusera oopacera

¹ Nihuku nimoha Yeesu aari vakhiviru wa enyandya ya oGenesarete. Atthu ancipale yaahaamaana emurukureenreene weera yiiwe masu a Muluku.

² Aahoona mukerekhere wa enyandya makula meeli ehiiweene vale, ni anamakoka erapihaka itthavisaya.

³ Aavolowa munikulani nimoha naari na Simeyoni, ni aamvekela weera asuse vakhaani wa mukerekhere. Vano, akilaantheene munikulani, aaxuttiha muloko wa atthu.

⁴ Amalihaka wuuluma, Yeesu aamweerela Simeyoni: “Murowe mpaka weiwo wiixalaaya, ni mwavonyere itthavi weera mvare ihopa.”

⁵ Simeyoni aamwaakhula: “Muhusiha noheerera vancipale ohiyu wootheene ni khanivanre etthu. Woonakatho weera ti Nyuwo munghima yeeyo, miyo kinkela ovonyera itthavi.”

⁶ Apakaka yeeyo, yaavara ihopa sincipale, moota wooweera itthavi saapacera waahuwa.

⁷ Vano awo yaawoonihera ni ineneero asikhwaaya yaari munikulani nikina weera ewe ni yaakhavihere. Yaahoowa ni yaasariha makula oomeeli mpaka yaahanle vakhaani ottatta.

⁸ Oonaka yeeyo, Simeyoni Pedru aakokhorela inaawo sa Yeesu anamweerela: “Mususe wa miyo, Apwiya, niwoko miyo namattheka!”

⁹ Vano owo ni asikhwaawe ootheene yaatikhina ni ihopa sincipale yaavanraaya.

¹⁰ Eeli a yaawo yaatikhinne yaari Yakobe ni Yohaane, anamwane a Zebedeyo, ni asikhwaawe Simeyoni. Vano Yeesu aamweerela Simeyoni: “Muhoove, okhuma olelo vaava mpaka ohoolo, mmwikhale namakoka a atthu.”

¹¹ Hiiho yaapurulela mukerekhere makula, enahiya sootheene enamutthara.

Olamihiwa wa namakokho

¹² Yeesu areene esidade emoha, aahoowa namakokho oosareya makokho. Amoonaka Yeesu, aahuuramihela ekhovaawe vathi, anamudyoonttelela: “Apwiya, mwatthuna, munoowera okilamiha.”

¹³ Yeesu aahookola moono anamwiiyaathera, eeraka: “Kinootthuna. Mukhale oolamihiwa.” Woowaakuveya makokho yaamuhiya.

¹⁴ Vano Yeesu aamulamulela: “Muhaaleele akina, murowetho ni mwiixoonihere wa musaserdoti*, ni mwavahe sooveleela mwaha wa orapihiwawanyu, seiye Moisesi aalamulenlaawe, weera iyo sikhale eneneero wa atthu.”

¹⁵ Wa soothesene, ihaali mwaha wa Yoowo saatepaxa omwaramwareiya, moota wooweera atthu ancipale yaahoowa weera emwiiwe ni elamihiwe irettasaya.

¹⁶ Yeesutho aarowa wa mapuro a meekhaawe anavekela.

Yeesu onimulamiha mutthu ooheetta

¹⁷ Nihuku nimoha Yeesu eera axuttihaka, yaakilaathi vaavaale aFarisi* ni anamawera a nlamulo* akina yaaweenle mittetthe sootheene sa oGalileiya, oYudeiya ni soowaattamana oYerusaleemu. Vano, ikuru sa Apwiya saari ni Yoowo weera aalamihe.

¹⁸ Yaahoowa atthu akina engwiiheraka Yoowo mutthu ooheetta munrepani. Yaaheerera ovolowa mpaani weera emwiikaathi ohoolo wa Yeesu.

¹⁹ Ehiweraka ophwanya moota woovolowa niwoko na atthu ancipale, yaawela vanipathoni, ni emvirihaka variyari vanlakani, yaamukuruxa munrepani mpaka eriyari ya atthu ancipale ohooloxa wa Yeesu.

²⁰ Oonaka Yeesu nroromelonaya, aamweerela ooheetta: “Mulopwana, sootthekasanyu sooleveleliwa.”

²¹ aFarisi* ni anamawera a nlamulo* yaapacera wuupuwela asineenaaya moota ola: “Taani Ola omveiha? Taani ongwera olevelela soottheka, ahikhanle Muluku paahi?”

²² Asuwelaka yeeyo awo yuupuwenlaaya, Yeesu aahaakoha: “Heeni muupuwenlaanyu hiiho?

²³ Yookhweiya eheeni weera: ‘Sootthekasanyu sooleveleliwa,’ hoye hoye ‘Muvenye ni mweette’?

²⁴ Weeratho musuwele weera Mwaana a mutthu ookhalano mweelaponimu ikuru weera alevelele soottheka” – vano aamweerela mutthu ooheetta: “Miyo kinooleelani: muvenye, mukuxe nrepananyu ni muroweke owaani.”

²⁵ Woowaakuveya owo aavenya vahoolowaya, aakuxa nrepa mwa nenno aataleliwaawe, ni aarowa owannyawe amuttottopelaka Muluku.

²⁶ Ootheene yaatikhinaxa ni yaamvuwiha Muluku, ni esareiyeene woova, yaaheera: “Olelo nohoona itthu sootikhiniheiya.”

Wiitthaniwa wa Leevi

²⁷ Vahoolowaya Yeesu aavenya ni aamoona namaliviha a musoko iitthaniwa Leevi, akilaantheene vanipuroni naalivihiwa musoko, ni aamweerela: “Mukitthare!”

²⁸ Leevi aavenya, anahiya sootheene anamutthara.

²⁹ Vano, Leevi aamwiitthanela Yeesu efesta etokotoko owannyawe. Yaakhala atthu ancipale ecaaka vamoha ni yaawo: anamaliviha a musoko ni atthu akina.

³⁰ Vano aFarisi* ni anamawera a nlamulo* yaari a aFarisi*tho yaahaattaandawula oohuseraawe Yeesu yeeraka: “Heeni muncaanyu ni mungwuraanyu vamoha ni anamaliviha a musoko ni anamattheka?”

³¹ Yeesu aawaakhula: “Khaahiyono yaale arino okumi animuhaawela meediku, mene aani oovoreiwa.

³² Miyo nkaaweenle owiitthana oororomeleya, mene aani anamattheka weera erukunxe murima.”

Yeesu onkohakohiwa mwaha wa otthuka

³³ Awo yaamweerela: “Oohusera a Yohaane annatthuka ni annavekela imaara sincipale ntokotho, oohusera a aFarisi*, vano oohuseraanyu annaca ni annawura.”

³⁴ Yeesu aawaakhula: “Nyuwo munoowera waanyeserera otthuka oolattuliwa a namatthomera owo areene nlelo ni yaawo?

³⁵ Eniiwetho mahuku namatthomera aneeraawe avenxiwe wa yaawo. Mahuku awo eniitthuke oolattuliwa.”

³⁶ Vano aahaathalihera yoolikanyiha ela: “Khaawo onaahula nipareyo na ekuwo enyowani ni onghela mukuwoni ya khalayi. Apaka yeeyo, onoonanariha ekuwo enyowani nitho nipareyo na ekuwo enyowani khaninkhala nnene mukuwoni ya khalayi.

³⁷ Ni khaawo onghela eviinyu enyowani munrupani wa exapala ya khalayi. Apaka yeeyo, eviinyu enyowani enoophula murupa wa exapala, enoorihiwa, ni murupa onoonanariheya.

³⁸ Ohiyanawaya, entthuneya weera eviinyu enyowani eheliwe munrupani munyowani.

³⁹ Khaawo oneera amaliha owura eviinyu ya khalayi ontthunatho eviinyu enyowani. Vano oneera: Fataari eviinyu ya khalayi!”