Luuka 4 - Emakhuwa Bible

Weereriwa wa Yeesu

¹ Yeesu, aasareya ni Munepa Wootteela, aahokolowa oYordanu ni aakuxiwa ni Munepa Wootteela aronghiwaka onikareni,

² weiwo eereriwaawe ni Diyabu* wa mahuku miloko mixexe. Wa ehuhuweene yeele khaaciiye naari etthu, ni amalihaka mahukweene yaale, aavoliwa etala.

³ Vano Diyabu* aamweerela: “Weyo waari Mwaana a Muluku, olamule nluku nna weera nithatuwe yooca.”

⁴ Yeesu aamwaakhula: “Yoolempwa: ‘Mutthu khankhala ni okumi niwoko na yooca paahi.”

⁵ Diyabu* aamukuxa Yeesu amuronghaka vanipuroni noorakama vancipale na osulu, ni aamoonihera khuluwi omwene wootheene wa elapo ya vathi

⁶ amweerelaka: “Kinimoovaha ovuwa wootheene ni ikuru sootheene sa omwene ole wootheene, niwoko wootheene akivanghaaya miyo, ni miyo kinoomvaha wa yoole kineeraaka kimutthune.

⁷ Vano, Weyo wakilapa, wootheene onuukhale wawawo.”

⁸ Yeesu aamwaakhula: “Yoolempwa: ‘Mwaalape Apwiya Mulukwaanyu ni mwaarumeele Yaawo paahi.’”

⁹ Diyabu* aamukuxa Yoowo amuroghaka oYerusaleemu ni aamwiikaathi vanankatthani a Empa ya Muluku, anamweerela: “Waari Mwaana a Muluku, wiivonyere vathi va,

¹⁰ niwoko yoolempwa: ‘Owo anaalamule andyelowaawe mwaha wa Weyo weera yoothokorore.

¹¹ Awo eniyoovarele mmatatanimwaya weera ohikwattuliwe ni maluku.’”

¹² Yeesu aamwaakhula: “Yoolempwatho: ‘Muhiweerere Apwiya Mulukwaanyu.’”

¹³ Amalihaka sooweerera sootheene seiye, Diyabu* aamuhiya mpaka ehuhu yootthuneya.

Yeesu onkhoottiwa oNasarete

¹⁴ Yeesu aahokoleela oGalileiya mukuruni sa Munepa, ni epilaawe yaamwaramwaxeiya mweelaponi yootheene ele.

¹⁵ Annaxuttiha muSinagogani*, attottopeliwaka ni ootheene.

¹⁶ Owo aarowa oNasarete weiwo unnuwenlaawe. Wa eSaabadu aavolowa muSinagogani* ntoko aakhovelelaawe. Vano aaheemela weera asome.

¹⁷ Aavahereriwa elivuru ya mprofeeti Yesaya. Aakhunula ni aaphwanya nipuro naalempwalaaya ha:

¹⁸ “Munepa wa Apwiya ori ni Miyo, niwoko Owo wookittikitthela weera kaalaleere masu ooreeraxa atthu oohaawa. Owo wookirumiha weera kaalaleere otaphuliwa yaale ootthukiwa ni olama atthu oohoona, ni weera kaataphule atthu oopuheriwa.

¹⁹ Wookirumihatho olaleiya eyaakha ya mahala a Apwiya.”

²⁰ Aakhuneela elivuru, anamuhokoloxera murumeiyi anakilaathi. muSinagogani* ootheene yaangwehexexa Yeesu.

²¹ Vano Owo aapacera waaleela: “Olelo yookwaniheriwa Yoolempwa* ela mwiiwalaanyu vaanaano vaava.”

²² Ootheene yuuluma nnene wa Yoowo ni yaatikhina ni masu a mahala yaakhumme mmwaanomwawe. Awo yaakohana: “Ola khahiyono mwaana a Yoseefe?”

²³ Yeesu aaweerela: “Vekhaikhai munookuupuxera miruku iya: ‘Meediku, mwiilamiheke muneenaanyu! Mpake va mweelaponimwanyu yeeyo niiwalaahu weera mwaampaka oKafaranawu!’”

²⁴ Owo aapwaherera: “Miyo kinooleelani ekhaikhai: khaawo mprofeeti onaakheliwa mweelaponimwawe.

²⁵ Kinoororomelihani weera mweehuhuni ya Eliya yaakhala asinaankhweli ancipale oYixrayeli. Ehuhuweene yeele wiirimu waawaleiya iyaakha tthaaru ni nyeeri mithannamosa, ni yaakhala etala etokotoko mweelaponi yootheene.

²⁶ Wa soothesene, Eliya khaarumiheliwe hata mmoha a yaawo, ohikhanle wa naamukhweli mmoha a oZarepeta, elapo ya oSidoni.

²⁷ Vanonto, mweehuhuni ya Eliya, mprofeeti, yaakhala anamakokho ancipale oYixrayeli. Wa soothesene, khaawo a yaawo aarapihiwe, ahikhanle Nahamani, muSiriya.”

²⁸ Wiiwalaaya yeeyo, muloko wa atthu ootheene waanyoonyiwaxa.

²⁹ Yaavenya, enamoomola Yeesu osidade enamukuxa emuronghaka mpaka vasulu wa nttumuxa, mwa nenno yaapakiwaaya esidade weera emvonyere Yeesu vathi.

³⁰ Mene Owo aavira variyariwaya ni aapwaha.

Yeesu onoomola munepa woonanara

³¹ Vano Yeesu aarowa oKafarnawu, esidade ya oGalileiya, ni eSaabadu aamweera oxuttiha muloko wa atthu.

³² Ootheene yaatikhina ni nihusihonawe, niwoko maswaawe yaari ni ikuru.

³³ muSinagogani* aakhala mutthu aarino munepa woonanara. Owo waakhuwela vancipale:

³⁴ “Khuu! Ontthuna eheeni ni hiyo, Yeesu a oNasarete?! Waaweenle weera oninanarihe? Kohoosuwela – ori Ootteela a Muluku.”

³⁵ Yeesu aahiiha eeraka: “Omaale weyo, ni okhume mwa yoowo.” Munepa waamvonyera mutthu vathi vamaithoni wa ootheene ni waakhuma wa yoowo woohimuvulaliha.

³⁶ Ootheene yaatikhina ni yaaheerelana akina ni akhwaaya: “Masu heeni ala? Owo onoolamulela ni ikuru, ni owera mpaka minepa soonanara, ni iyo sinookhuma!”

³⁷ Ni epilaawe yaamwarawareiya mweelaponi yootheene yoowaattamano.

Yeesu onaalamiha ancipale

³⁸ Yeesu aakhuma muSinagogani* ni aarowa owannyawe Simeyoni. Apwiyamwaanaawe Simeyoni yaavihaxa erutthu, ni oohusera yaamvekela Yeesu weera aakhavihere.

³⁹ Aawuuramela Yeesu apwiyamwaana ale anahiiha eretta ele, enaahiya. Awo yaavenya woowaakuveya ni yaahaarumeela yaawo.

⁴⁰ Wiilaka, muloko wa atthu waahaakuxa ootheene yaarino iretta soohiyanahiyana emuruuhelaka Yeesu, ni Owo aahaalamiha amwiiyaatheraka matata khula mutthu a yaawo.

⁴¹ Ohiya toko yeeyo, saakhuma wa atthu ancipale minepa soonanara sikhuwelaka: “Weyo Mwaana a Muluku!” Wa soothesene, Owo annahiiha ni annakhoottiha wuuluma, niwoko saasuwela weera Owo ti Kristu.

⁴² Oyaaka ni oxa, Yeesu aarowa wa nipuro na meekhaawe. Atthu ancipale yaamwaasaasa, ni ephiyaka weiwo aaraawewo, yaamunyesereriha weera ahaahiye.

⁴³ Vano Owo aaheera: “Ontthuneya weera Miyo kilaleiyetho masu ooreeraxa a omwene wa Muluku isidade sikina, niwoko kirumiheliwe niwoko na yeeyo.”

⁴⁴ Vano, annapwaherera alaleiyaka muSinagogani* sa oYudeiya.