Luuka 24 - Emakhuwa Bible

Ovenyerera wa Yeesu

¹ Vanihukuni noopacera na esimana, oyaaka ni oxa, asithiyana yaakuxa itthu iye soowunkhelaxa yaareherenraaya ni yaarowa onihiyeni.

² Yaaphwanya nluku ntokotoko na nihiye nikakhiweene,

³ mene evolowaka, khayaaphwannye muttembo wa Yeesu.

⁴ Etikhinaka hiihaale, vano wootutuxereya asilopwana eeli ni ikuwo saanre ntoko nsuwa yaawaattamela yaawo.

⁵ Awo yaahuuramiha nyurusaya ni woova, ni asilopwana yaaweerela: “Heeni mummwaasaasaanyu variyari wa akhwiiye Yoole ori ni okumi?

⁶ Owo khamomo! Oovenyerera! Muupuwelele yeeyo ooleenlaaweni nlelo areene ni nyuwo oGalileiya.

⁷ ‘Ontthuneya weera Mwaana a mutthu avahereriwe mmatatani a anamattheka, akhomeliwe ni avenyerere nihuku nanaararu.’”

⁸ Vano yaahuupuwelela maswaawe.

⁹ Yaahokolowaaya onihiyeni, yaahaathalihera itthu sootheene seiye oohusera muloko nimmoha, nitho wa akina ootheene.

¹⁰ Yaathalihenre itthu seiya arummwa yaari Mariya oMagadalene, Yohana, Mariya amayawe Yakobe, ni akina yaari ni yaawo.

¹¹ Awo khayaaroromenle asithiyana. Wa yaawo, maswaaya yaari ntoko masu a anepa.

¹² Wa soothesene, Pedru aaheemela, anatthimakela onihiyeni. Uuramaka, oonne esaanda paahi. Aapwaha ni aahokolowa ootikhineene ni yeeyo yaakhumelenle.

Mphironi ya wEmawusi

¹³ Nihuku nenenenne, eeli a yaawo yeera erowaka wa muttetthe wiitthaniwa Emawusi, waarakamela ikilomeetru* muloko niimoha oYerusaleemu.

¹⁴ Mphironi, yaanuuluma mwaha wa sootheene saakhumelenle.

¹⁵ Yuulumaka ni etthekulaka hiihaale, Yeesu muneenaawe aawaattamela, anapacera weetta ni yaawo,

¹⁶ mene maithwaaya yaahooceelihiwa omusuwela.

¹⁷ Owo aahaakoha: “Muntthekulela eheeni mweettaka?” Awo yaaheemela ni ikhovesaya soothanana.

¹⁸ Mmoha a yaawo, iitthaniwa Kleyopa, aamukoha: “Nyuwo muri namarwa mmoharu oYerusaleemu, ahisuwelaka itthu sikhumelenlewo wa mahuku yaala?”

¹⁹ “Itthu heeni?” Owo aamukoha. Awo yaamwaakhula: “Seiye simukhumelenle Yeesu muNasarete. Aari Mprofeeti oowera ni masu ni miteko ohoolo wa Muluku ni muloko wa atthu wootheene.

²⁰ Ahooleli a asaserdoti* ni asitokweenaahu anlamula yaamvaherera weera athoriheliwe okhwa, ni yaamuthomeya.

²¹ Hiyo naaweherera weera eera akhale Yoowo aneera aruuhe ovuluwa wa oYixrayeli. Olelo nri nihuku nanaararu okhuma sootheene seiye seereiye.

²² Vano, asithiyana akina variyariwahu aanitutuxa olelo. Yaarowa onihiyeni oyaaka ni oxa,

²³ ni khaaphwannye erutthwaawe. Yaahokolowa yeeraka weera yaahiixooniherawo andyelo eweerelaka weera Yeesu ori ni okumi.

²⁴ Vanonto, asikhwiihu akina yaarowawo onihiyeni, ni yaaphwanya sootheene ntoko asithiyana yaahimalaaya, mene khaamoonne Yoowo.”

²⁵ Owo aaweerela: “Nyuwo onnoohaleelani wiiwexexa ni munnalekela ororomela sootheene seiyo yaalokolenlaaya maprofeeti.

²⁶ Khawaatthuneya weera Kristu ahaawe itthusene seiyo ni avolowe moovuwanimwawe?”

²⁷ Vano, okhuma Moisesi ni maprofeeti ootheene, aahaathalihera sootheene saalempwa sa Yooworu.

²⁸ Yaattamelaka muttetthe yaarowaayawo, Yeesu aakhala ntoko aatthuna opwaherera muhoolo.

²⁹ Vano awo yaamunyesereraxa yeeraka: “Mukhale ni hiyo va, niwoko oneera wiilaka, othana ohanle vakhaani omala.” Vano Owo aavolowa weera akhale ni yaawo.

³⁰ Areene vameesa ni yaawo, aakuxa ipaawu, anatthapela, anameyanyiha, anaavaha.

³¹ Vano maithwaaya yaahuliwa ni yaamusuwela, ni Owo aalakaseya ohoolowaya.

³² Awo yaakohana: “Mirimasahu khasivinghe olelo mphironi Owo uulumaka ni hiyo, anithaliheraka Yoolempwa*?”

³³ Yaavenya ni yaahokoleela woowaakuveya oYerusaleemu. Weiwo yaahaaphwanya muloko nimmoha, ni awo yaathukumanne ni yaawo,

³⁴ enaweerela: “Ekhaikhai! Apwiya aavenyerera ni ahiixoonihera wa Simeyoni!”

³⁵ Eeli ale yaahaathalihera seiyo seereiye mphironi, ni moota yaamusuwenlaaya Yeesu Owo ameyanyihaka ipaawu.

Yeesu oniixoonihera wa oohuseraawe

³⁶ Yuulumaka hiihaale, Yeesu muneenaawe aahiixoonihera wa yaawo ni aaweerela: “Murettele okhale ni nyuwo.”

³⁷ Awo yaatuthuwa ni yaahoova, yuupuwelaka weera yoona munepa.

³⁸ Owo aaweerela: “Heeni muntuthuwaanyu ni munghovelaanyu mmurimanimwanyu?

³⁹ Moone mmatatanimwaka ni inaawosaka. Ti Yoomi! Mukitave ni moone. Munepa khoonono erutthu, hata makhuva ntoko munoonaanyu Miyo kikhalannaaka.”

⁴⁰ Ahimakaru yeeyo, aawoonihera matata ni inaawo.

⁴¹ Ehiroromelaka nlelo niwoko na ohakalala ni otikhina, aahaakoha: “Nyuwo mookhalano etthu yooca weera kice?”

⁴² Yaamvaha mpatta mmoha wa ehopa yoowooxiwa,

⁴³ ni aakhuura awosa yoonaka.

⁴⁴ Vano aaweerela: “Ti yeeyo kooleenlaakani kireene nlelo ni nyuwo: ‘Waatthuneya weera sikwaniheriwe sootheene silempwe mwaha wa Miyo mmalamuloni a Moisesi, mmaprofeetini ni mulivuruni ya icipo.’”

⁴⁵ Vano Owo aahaahulela soowuupuwelasaya weera awo ewere wiiwexexa Yoolempwa*.

⁴⁶ Aaweerela: “Yoolempwa weera Kristu aarwa ohaawa ni ovenyerera mookhwaani nihuku nanaararu,

⁴⁷ nitho weera mwa Nsinanawe waatthuneya olaleiwa orukunxa murima wa miloko sootheene, okhuma oYerusaleemu, weera yaakhele elevelelo ya soottheka.

⁴⁸ Nyuwo muri anamoona a itthu seiya.

⁴⁹ Miyo kinimoorumihelani Yoowo yoororomelihiwa ya Atithaka, mene mukhale musidadeni mpaka muneeraanyu mwaakhele ikuru sa musulusulu.”

Owelihiwa wa Yeesu

⁵⁰ Aaronghiwaawe mpaka vakhiviru wa oBetaniya, Yeesu aaheemexa matata ni aahaareeliha.

⁵¹ Aareelihaka hiihaale, aahaahiya ni aawelihiwa wiirimu.

⁵² Vano awo yaamulapa ni yaahokoleela oYerusaleemu ni ohakalalaxa,

⁵³ ni yannakhala Mpaani mwa Muluku ehuhu yootheene emuttottopelaka Muluku.