Luuka 21 - Emakhuwa Bible

Yooveleela ya naamukhweli

¹ Awelihaka maitho, Yeesu aawoona anamapuha ehelaka soovahasaya mmaalani a soovaha.

² Aamoonatho naamukhweli oohaawa ahelaka makhoobiri meeli ooyevaxa a eyuuma.

³ Vano aaheera: “Kinoororomelihani weera naamukhweli ola oohaawa oohela vancipale waapwaha akina ootheene.

⁴ Ootheene ale aahela wa yeeyo yaahalanaaya, mene owo, ni ohaawawawe, oovaha sootheene aarinaawe weera akhale.”

Eneneero ya emalihero ya ihuhu

⁵ Akina a oohuseraawe yeera yuulumaka sa moota Empa ya Muluku yaarehereriwaaya ni maluku ooreera ni soovahiwa sootteeliheriwa Muluku. Yeesutho aaweerela:

⁶ “Mwaha wa seiya nyuwo munoonaanyu, eniiwe mahuku nneeraaya nihikhale nluku vanluku. Sootheene sinoophwatiwa.”

⁷ Awo yaamukoha: “Muhusiha, yaakhani sineeraaya seereiye itthu iyo? Ni eheeni eniikhale eneneero weera itthu iyo sihanle vakhaani weereiya?”

⁸ Owo aawaakhula: “Mwiipasoope weera muhilokotthiwe. Vano, ancipale eniiwe mwa Nsinanaka yeeraka: ‘Ti miyo’ ni ‘ehuhu yookhuveela.’ Muhaatthare.

⁹ Mwiiwaka mwaha wa itkhotto ni owana, muhoove. Ontthuneya weera sikhumelele toko itthu iyo, mene khoonaaye okhuveelaxa ommaleloni.”

¹⁰ Vano aaweerela: “Eniiwane elapo ni elapo nitho omwene ni omwene.

¹¹ Onuukhale otetereya otokotoko, itala ni ikwerere mmapuroni oohiyanahiyana. Nsikhaletho sookhumelela soowoopiha ni ineneero sitokotoko siweelaka wiirimu.

¹² Sihinaayetho sootheene iyo, animootthukani okaliposo ni animoottharattharani. Awo eniyoovaherereni muSinagogani* ni mukaliposo, ni mmwironghiwe ohoolo wa mamwene ni maguvernadori niwoko na Nsinanaka.

¹³ Eniikhale ehuhuwaanyu weera mukhalele onamoona.

¹⁴ Mulakele khuluwi ehinaaye, weera muhirwe mweeteteiya ni yeeyo muneeraanyu muhime weera mwiixaakihe.

¹⁵ Vano, Miyo nkoovaheeni masu ni miruku moota wooweera khaawo mmoha a amwiittanaanyu aneera awere otapanyiha, naari ovaanyiha.

¹⁶ Nyuwo mmwivarihiwe mpaka ni asitithi, axunna, asinaangolo ni asinthamwene, ni awo eniyaavaherere mookhwaani akina a nyuwo.

¹⁷ Ootheene eniyoothanyeeni niwoko na Nsinanaka.

¹⁸ Wa soothesene, hata niihi nimoha na muruwaanyu khanirwa niriheya.

¹⁹ Moovilelani, nyuwo mmwiwine okumi.

²⁰ Moonaka oYerusaleemu orukureeriweene ni anakhotto, mmwisuwele weera othaamiwawaya wookhuveela.

²¹ Vano, awo eniikhale oYudeiya, etthawele nnyaakoni; awo eniikhale musidadeni, evenye; ni awo eniikhale omatta, ehivolowe musidadeni.

²² Awo eniikhale mahuku a ikuhu weera sikwaniheriwe sootheene silempwale.

²³ Hapo eniikhale oowoopiha mahuku awo wa asimaayi oorupala ni wa yaale anaamwiha. Onuukhale ohooxa otokotoko mweelaponi, ni isara ni muloko wa atthu ola.

²⁴ Akina eniyiiviwe ni ikatana, ni akina eniironghiwe okaliposo mweelaponi sootheene. oYerusaleemu onuunyikaliwe ni amalapo mpaka ihuhusaya sineeraaya sikwaniheriwe.

²⁵ Nsikhale ineneero vansuwani, vamweerini ni vathinyeerini. Vathi miloko nsikhale ni woova ni otuthuwa niwoko na yooruma ni owali wa ephareiya.

²⁶ Atthu eniikomoke, yoovaka yeeyo eneera ekhumelele ni elapo ya vathi yootheene. Ikuru sa wiirimu nsittikinyeye.

²⁷ Vano eniimoone Mwaana a mutthu awaaka munihutteni ni ikuru ni ovuwa otokotoko.

²⁸ Saapaceraka okhumelela itthu iyo, mweemele ni mweemexe nyurusanyu, niwoko ovuluxiwawanyu wookhuveela.”

²⁹ Owo aahaathalihera yoolikanyiha ela: “Ngwehe mwiri wa efiigu ni nyiri sootheene.

³⁰ Saaphuwaka, nyuwo asineenaanyu munoosuwela weera elimwe yookhuveela.

³¹ Hiihotho, moonaka itthu iyo sikhumelelaka, musuwele weera omwene wa Muluku wookhuveela.

³² Kinooleelani ekhaikhai: Kheerwa evira ekhapira ela mpaka sootheene iyo seereye.

³³ Wiirimu ni vathi onuuvire, maswaakatho kheerwa evira.

³⁴ Mwiipasoope weera mirimasanyu sihilemeliwe ni wiipeliwa, ohapaliwa, naari ni sooweeteteela sa okumi, weeratho nihuku nno nihoophiyereni wootutuxereya,

³⁵ niwoko nno nniwe wa atthu ootheene ankhala mweelaponi yootheene.

³⁶ Mukhale oowehaweha mahuku ootheene, ni mvekele weera moopowe sootheene sineera sikhumelele, ni weera mweemele vamaithoni wa Mwaana a mutthu.”

³⁷ Yeesu annaxuttiha khula nihuku Mpaani mwa Muluku, ni wiilaka, aavenya arowaka vamwaakoni wiitthaniwa Sooliveira weera avirihewo ohiyu wootheene.

³⁸ Muloko wa atthu wootheene waarowa oxeexelo Mpaani mwa Muluku weera yamwiiwe.