Luuka 19 - Emakhuwa Bible

Namaliviha a musoko Zakaiyo

¹ Aavolowaawe oYeriko, Yeesu aavira musidadeni.

² Aakhala weiwo mutthu mmoha iitthaniwa Zakaiyo, aari namapuha, mutokweene a anamaliviha a musoko.

³ Owo aatthuna omoona taani Yeesu, mene areene ookhuveya, aahooceela niwoko na atthu ancipale.

⁴ Hiiho aatthimakela ohoolo ni aawela mmwirini wa efiigu weera amoone, niwoko Yeesu eera avire vaavaale.

⁵ Aaphiyalaawe Yeesu nipuro nne, aaweha musulu ni aamweerela: “Zakaiyo, mukhuruwe woowaakuveya. Ontthuneya weera olelo Miyo kikhale owannyinyu.”

⁶ Vano, aakhuruwa woowaakuveya ni aamwaakhela Yeesu ni ohakalalaxa.

⁷ Muloko wa atthu wootheene waahoona yeeyo ni waapacera ottaandawula: “Owo onoophiyera vaate wa namattheka!”

⁸ Zakaiyo aavenya ni aaweerela Apwiya: “Moone, Apwiya, kinimwaavaha atthu oohaawa eriyari ya sooreelasaka, ni kaamwiiyenre mutthu etthu emoha, kinoomuhokoloxera imaara ixexetho.”

⁹ Yeesu aamweerela: “Olelo woophiya ovuluwa wa empa ela, niwoko mulopwana ola oritho mwaana a Abrahaamu.

¹⁰ Vano, Mwaana a mutthu aaweenle owaasaasa ni waavuluxa yaale yaariheiye.”

Yoolikanyiha ya makhoobiri muloko

¹¹ Awo emwiiwaka Yeesu, Owo aahaathalihera yoolikanyiha emoha, niwoko aari vakhiviru wa oYerusaleemu ni muloko wa atthu wuupuwela weera omwene wa Muluku waarowa wooniheriwa woowaakuveya.

¹² Owo aaheera: “Mutthu mmoha oottittimiheya aarowa elapo yoorakamela weera avariwe omwene ni vahoolo ahokolowe.

¹³ Vano aawiitthana arumeiyaawe muloko ni aahaavaha makhoobiri muloko. Owo aaweerela: ‘Mumpakele nakoso musurukhu ola mpaka miyo kineeraaka kihokolowe.’

¹⁴ Arumeiyaawetho yaamuthanya, ni yaahaarumiha atthu oovaanela ottuliwawe yeeraka: ‘Khanintthuna weera mulopwana ola akhale mwenaahu.’

¹⁵ Wa soothesene, aavariwa omwene ni aahokolowa. Vano aarumiha owiitthana arumeiyi aavanghaawe musurukhu weera asuwele misurukhu mihayi yaawinnaaya.

¹⁶ Oopacera aahoowa ni aaweerela: ‘Apwiya, nikhoobirinanyu noowina makina muloko.’

¹⁷ Apwiyaawe yaamwaakhula: ‘Ti wooreera, murumeiyaaka ooreera! Hapo waari oororomeleya wa vakhaani, olamuleke isidade muloko.’

¹⁸ Anaaveeli aahoowa ni aaweerela: ‘Apwiya, nikhoobirinanyu noowina makina mathanu.’

¹⁹ Apwiyaawe yaamwaakhula: ‘Weyotho, olamuleke isidade ithanu.’

²⁰ Vano aahoowa murumeiyi mukina ni aaweerela: ‘Apwiya, nikhoobirinanyu nri va. Miyo koothokorora kaatthunkaka vakuwoni.

²¹ Kaangwoovani, niwoko nyuwo muri oottaruxa. Mumvenxa yeeyo mwahiikaathiyaanyu ni munghepha yeeyo muhaanlaanyu.’

²² Apwiyaawe yaamwaakhula: ‘Miyo kinimoothoriha ni maswaawo muneenaawo, murumeiyi oonanara! Waasuwela weera miyo oottaruxa, kivenxaka yeeyo kihihenlaaka ni kihephaka yeeyo kihaanlaaka.

²³ Vano, heeni waahaavaherenraawo musurukhwaaka atthu oothokorora musurukhu? Hiiho, miyo kihokolowaka, saano kaakhenleene musurukhu ni owina vakhaani.’

²⁴ Vanonto, aaweerela yaawo yaari weiwe: ‘Mmwaakhe nikhoobirinawe, ni mumvahe yoowo orino muloko.’

²⁵ Awo yaamweerela: ‘Apwiya, owo ookhalano muloko!’

²⁶ Awo yaawaakhula: ‘Miyo kinooleelani weera wa yoowo okhalanne, anaavahiwetho, mene wa yoowo ohikhalanne, mpaka yeeyo vakhaani orinaawe, eniivenxiwe.

²⁷ Mwaha wa amwiittanaaka, yaale yahaatthuna weera miyo kaalamule, mwaaruuhe va ni ngwiive vamaithoniwaka.’”

Ovolowa oYerusaleemu

²⁸ Amalihaka wuuluma yeeyo, Yeesu aapwahera ohoolo, arowaka oYerusaleemu.

²⁹ Yaakhuveelaaya oBetefage ni oBetaniya, vakhiviru wa mwaako oniitthaniwa Sooliveira, aahaarumiha eeli a oohuseraawe aweerelaka:

³⁰ “Murowe mmuttettheni ori ohoolowanyu. Mwaavolowakaru, munoomphwanya buuru mwaaxaana atthukiweene, mwa yoowo khaawo otonke ongwela. Mwamutaphule ni mukiwiihere va.

³¹ Mukina ookohani: ‘Munimutaphulela heeni?’ mwamuleele: ‘Apwiya anoomutthuna yoowo.’

³² Yaarumihiwe yaarowa ni yaaphwanya enama ntoko aaleenlaawe.

³³ Emutaphulaka buuru muxaana, asineene a buuru yaahaakoha: “Munimutaphulela heeni buuru?”

³⁴ Awo yaawaakhula:“Apwiya anoomutthuna ola.”

³⁵ Yaamuronghela buuru Yeesu, yaamvonyera mikaandyosaya vabuuruni ni yaangweliha Yeesu.

³⁶ Eettaka hiiho Yeesu, muloko wa atthu waahaatala mikaandyosaya mphironi.

³⁷ Akhuveelaka omukhuruweloni wa mwaako wa Sooliveira, atthu ancipale ootheene a oohusera yaapacera omvuwiha Muluku, ekhuwelaka ni ohakalalaxa niwoko na sootikhiniha sootheene yoonaaya. Yaakhuwela:

³⁸ “Ooreelihiwa ti Mwene ongwa mwa Nsina na Apwiya! Murettele wiirimu ni ovuwa musulusulu.”

³⁹ Akina a aFarisi* yaari variyari wa atthu ancipale yaamweerela Yeesu: “Muhusiha, mwaahiihe oohuseraanyu!”

⁴⁰ Owo aawaakhula: “Miyo kinooleelani: awo yamaala, maluku eniikhuwele.”

Olalamika niwoko na oYerusaleemu

⁴¹ Aakhuveelaawe ni oonaka esidade, Yeesu aahiinlela yeele

⁴² eeraka: “Weera weyotho olelo wiiwexexe yeeyo entthuneya oruuha murettele! Eyotho ti yoovitheya vamaithoniwawo.

⁴³ Eniiwe mahuku amwiittanaawo eniyoothipele malitti matokotoko, eniyoorukureere nitho eniiwaamelelihe weyo mipatta sootheene.

⁴⁴ Eniyoovonyere vatthayani ni eniiwiive anamwanaawo ari mpuwa mwa exiraawo. Kheerwa ehiya nluku vanluku, niwoko weyo khawiisuwenle ehuhu Muluku aarwaawe wooxekurera.”

Yeesu ontteeliha Empa ya Muluku

⁴⁵ Vano aavolowa Mpaani mwa Muluku ni aapacera owoomola yaawo yaathumiha.

⁴⁶ Aaweerela: “Yoolempwa: ‘Empaaka eniikhale Empa ya mavekelo,’ mene nyuwo mootatuxa ela nikhuku na anamwiiya!”

⁴⁷ Mahuku ootheene owo annaxuttiha Mpaani mwa Muluku. Ahooleli a asaserdotitho* vamoha ni anamawera a nlamulo* ni asitokweene a muloko yannaasaasa moota woomwiiva.

⁴⁸ Wa soothesene, khayaawera moota woopaka yeeyo, niwoko muloko wa atthu wootheene waatikhina ni maswaawe.