Luuka 16 - Emakhuwa Bible

Nakoso a miruku sa mweelaponi

¹ Yeesu aaweerela oohuseraawe: “Aakhala mulopwana oopuha. Mutthu aawehaweha sooreelasawe namapuha, aahootheriwa weera aananariha sooreelasawe.

² Vano namapuha aamwiitthana ni aamukoha: ‘Yeeyo kiniiwaaka mwaha wa weyo ekhaikhai? Okithalihere mukhalelo wa owehawehawawo, niwoko khoongwera opwaherera okhala namawehaweha.’

³ Namawehaweha aahiixeerela: ‘Apwiyaaka anookiraxela. Keereke hai? Weera kithipe – nkingwera ni miyo okuuliha muru ovekela soovahiwa.

⁴ Koosuwela kineeraaka kipake weera kaakhumaka muteko va, atthu ekaakhele mmawannyaya.’

⁵ Vano aawiitthana anamakopa ootheene a apwiyaawe. Aamukoha oopacera: ‘Weyo waakopenle hai apwiyaaka?’

⁶ Owo amwaakhula: ‘Miphimo ncira sa makhura.’ Namawehaweha aamweerela: ‘Okuxe epaphelo ya yookopelaawo, okilaathi waakuveke ni olepe miloko mithanu.’

⁷ Vahoolowaya aamukoha anaaveeli: ‘Ni weyo, okompe hai?’ Owo aamwaakhula: ‘Ilata ncira sa etrigu.’ Owo aamweerela: ‘Okuxe epaphelo ya yookopelaawo ni olepe miloko mithannamiraru.’

⁸ Apwiya yaamuulumela nnene mwaha wa namawehaweha oolokottha niwoko na mirukusawe sa mweelaponi. Vano, anamwane a elapo ya vathi ammweetta nakoso mukina ni mukhwaawe ekhalanaka miruku sooratta waapwaha anamwane a waara.

⁹ Tivawo Miyo kinooleelani: muvarele mihakhu sa elapo ya vathi weera mukhalane asinthamwene, moota wooweera saamalaka mihakhu iyo, mwaakhuleliwe muheemani soohimala.

¹⁰ Yoole ori oororomeleya ni vakhaani ori oororomeleyatho ni vancipale. Yoole ori oolokottha ni vakhaani, ori oolokotthatho ni vancipale.

¹¹ Nyuwo mwaahikhala oororomeleya ni mihakhu sa elapo ya vathi, eniyoororomeleni taani ni mihakhu sa ekhaikhai?

¹² Nyuwo mwaahikhala oororomeleya ni itthu sa akina, eniyoovaheeni taani itthu siri sawinyu?

¹³ Khawowo murumeiyi naari mmoha ongwera waarumeela asipwiiya eeli, niwoko mmoha onoomuthanya ni mukina onoomusivela, naari oopacera onoomurumeela ni nthiti, mene anaaveeli onoomuramusa. Nyuwo khamungwera omurumeela Muluku nitho musurukhu.”

¹⁴ aFarisi*, yaasiveliwa ni musurukhu, yaahiiwa sootheene iye ni yaamutheiya Yeesu.

¹⁵ Owo aaweerela: “Nyuwo ti yaale aniitaphula asineenaaya vamaithoni wa atthu, mene Muluku oosuwela mirimasanyu. Yeeyo eri yoottittimiheyaxa wa atthu, ti yoothanyeya vamaithoni wa Muluku.

Mahusiho makina

¹⁶ Malamulo ni maprofeeti aakhala mpaka Yohaane. Evenyero vaavaale mpaka ohoolo, masu ooreeraxa a omwene wa Muluku anoolaleiwa, ni ootheene animweerera wiilipiha ovolowa moomweneni owo.

¹⁷ Wiirimu ni vathi onoolakaseya ehinaaye omora yoolempwa ekhaani ya malamulo.

¹⁸ Yoowo ommwalana ni mwaariye ni onimuthela muthiyana mukina, onooraruwa, ni mulopwana onimuthela muthiyana oohiiwa ni aiyawe, onooraruwatho.

Namapuha ni Lazaru

¹⁹ Aakhala mulopwana oopuha aawara soowara sooxeera ni ikuwo soorikaxa, ni aakhala ni mihakhu mahuku ootheene.

²⁰ Aakhalatho namahaawa iitthaniwa Lazaru, oosareya ni ithuku, aakhovelela okilaathi vaate vamulako wa namapuha.

²¹ Owo annahaawela oca seiye saamora vameesa ya namapuha. Mpaka alapwa yannawa omulata ithukusawe.

²² Naaphiya nihuku na okhwawawe namahaawa, ni andyelo yaamukuxa mpaka vakakasani wa Abrahaamu. Namapuha aahookhwatho ni aavithiwa.

²³ oHadesi* weiwo aattaruxiwaawe, owo aaweha osulu ni aamoona Abrahaamu ottaiwene, ni Lazaru mukhwipimwawe.

²⁴ Vano aawiitthana: ‘Tiithi Abrahaamu, mukimoreleke ikharari miyo, ni munrume Lazaru anaanihe okhwipi wa ekathaawe mmaahini weera ariirihe nluminaka, niwoko kinnahaawaxa mmooroni ola.’

²⁵ Abrahaamutho aamwaakhula: ‘Mwaana, muupuwelele weera mookuminimwanyu, nyuwo mwaahaakhela itthu sooreera, Lazarutho itthu soonanara. Wa soothesene, owo ori vaanaano oopepesiwa, ni nyuwo muri moohaawani.

²⁶ Ohiya toko yeeyo, eriyari wa nyuwo ni hiyo wookhala wiixeraxa, moota wooweera yaale antthuna ovira erwaka wa hiyo mpaka nyuwo, hoye hoye wa nyuwo mpaka va, khaangwera.’

²⁷ Owo aamwaakhula: ‘Vano, miyo kinoodyoottelelani, tiithi: munrume Lazaru arowe vaate wa atithaka,

²⁸ niwoko kookhalanowo axunna athanu. Munrume weera owo awooperere axunnaka, weera awo ehiwetho vanipuroni nna na ohaawaxa.’

²⁹ Abrahaamu aamwaakhula: ‘Awo aakhalano Moisesi ni maprofeeti – ewiiweleleke.’

³⁰ Owo aaheera: ‘Hoye, tiithi Abrahaamu, mmoha a akhwiiye arowa wa yaawo, awo yaamurukunxa murima.’

³¹ Abrahaamu aamwaakhula: ‘Awo yaahimwiiwelela Moisesi ni maprofeeti, khaanrowatho omwiiwelela hata mmoha awaaka mookhwaani.’”