Luuka 13 - Emakhuwa Bible

Orukunxa murima, hoye hoye okhwa

¹ Ehuhuweene yeele, akina yaari vaavaale yaamuthalihera Yeesu moota heeni Pilatu aatakansenraawe ephome ya aGalileiya akina ni sooveleelasaya.

² Yeesu aawaakhula: “Munuupuwela weera aGalileiya awo yaari anamattheka waapwaha ootheene akina niwoko na ohaawa moota ola?

³ Miyo kinooleelani weera hoye! Mwaahirukunxatho murima, nyuwo ootheene munooriheya.

⁴ Munuupuwelatho weera atthu muloko ni athannaararu akhwiiye ehuhuweene yeele yaamorenle wa yaawo etoore* ya Silowami yaari ni milattu waapwaha ootheene akina a oYerusaleemu?

⁵ Miyo kinooleelani weera hoye! Mwaahirukunxatho murima, nyuwo ootheene munooriheya.”

⁶ Vano aahaathalihera yoolikanyiha ela: “Mulopwana mmoha aakhalano mwiri wa efiigu waaphatteiwe mmattamwawe ya iwuuva*. Aarowa waasaasa soowiima mwemmwe, vaheera khaaphwannyeru naari emoha.

⁷ Tivawo aamweerenlaawe yoole aawehaweha ematta ya iwuuva*: ‘Sookwana iyaakha tthaaru miyo kaasaasaka soowiima muumu, ni nkimphwanya. Wuuhe! Niwoko na heeni nneeraahu nihiye owuwuraka etthaya ela siiyoweene?’

⁸ Namawehaweha ole aamwaakhula: ‘Apwiya, muhiye ola mpaka mwaahiyu, ni miyo nkithipe mukerekheremwaya ni kinoohela ethaadyira.

⁹ Mwaahiyu wiima, onooreera. Waahiima, muuheke.’”

Muthiyana mmoha onlamihiwa eSaabadu

¹⁰ eSaabadu emoha Yeesu eera axuttihaka muSinagogani* emoha,

¹¹ ni vale aakhala muthiyana mmoha aarino munepa waamvoreiha wa iyaakha muloko niithanatthaaru. Owo anneetta oowuurameene, nitho khaawera wiinuwa.

¹² Amoonaka, Yeesu aamwiitthana vahoolo ni aamweerela: “Muthiyana, nyuwo mohoopowa ni erettaanyu.”

¹³ Vano aamwiiyaathera matataawe, ni woowaakuveya owo aahiinuwa ni aamuttottopela Muluku.

¹⁴ Mutokweene a eSinagoga*, anyoonyiweene niwoko Yeesu aalamihalaawe nihuku na eSaabadu, aaheerela muloko wa atthu: “Aakhala mahuku mathannamosa vasimanani antthuneya ovara muteko. Ngwe mahukweene yaawo weera mulamihiwe, ohikhanle eSaabadu!”

¹⁵ Apwiya yaamwaakhula: “Anamwiixeera! Ootheene a nyuwo munnataphula eSaabadu emombe, hoye hoye buuru a munikhoolani ni munnakuxa muronghaka ovaha maahi.

¹⁶ Vano, khoontthuneya weera muthiyana ola, mwaana a Abrahaamu, aatthukiwe ni Satana wa iyaakha muloko niithanatthaaru, otaphuliwa eSaabadu mwa yeeyo aatthukeliwaawe?”

¹⁷ Eerakaru hiiho, amwiittanaawe ootheene yaahuuliwa muru, mene muloko wa atthu wannahakalala niwoko na sootikhiniha sootheene Owo aapakaawe.

Soolikanyiha sa mmiso wa emostarda* ni sa eferementu

¹⁸ Vano Yeesu aakoha: “Omwene wa Muluku onlikana ni eheeni? Kilikanxeke ni eheeni?

¹⁹ Ori ntoko enuku ya emostarda* mutthu aakuxalaawe ni aanlaawe ottimbeniwawe. Ele yaahunnuwa ni yaathatuwa mwiri, ni apalame a wiirimu yaapaka ipuurusaya mphandinimwaya.”

²⁰ Owo aakohatho: “Kilikanxe ni eheeni omwene wa Muluku?

²¹ Ori ntoko eferementu aakuxalaawe muthiyana ni aatakansalaawe ni ephepa yincipale mpaka onyaruwa yootheene.”

Mulako woophureya

²² Vano Yeesu aarowa axuttihaka musidadeni ni mmittettheni, apwahereraka mpatta wa oYerusaleemu.

²³ Mukina aamukoha: “Apwiya, yaale eniivuluxiwe ari vakhaani?” Owo aamweerela:

²⁴ “Mwiilipihe vancipale ovolowa mulako woophureya, niwoko Miyo kinooleelani weera ancipale eniyeerere ovolowa, mene kheerwa ewera.

²⁵ Vano, mwaneene a vaate aavenyaka ni aawalaka mulako, nyuwo mmwikhale vaate mmanaka nsele mwaavekelaka: ‘Apwiya, munihulele nsele!’ Wa sootheene awo eniyaakhule: ‘Nkoosuwenleni, hata nkisuwenle munkhumaanyuwo.’

²⁶ Vano nyuwo mmweere: ‘Naahooca ni naawura vamoha ni Nyuwo ni mwaaxuttiha mmisewenimwahu.’

²⁷ Mene awo eniyaakhule: ‘Nkoosuwenleni, hata nkisuwenle munkhumaanyuwo. Mususeke wa Miyo, ootheene nyuwo mumpaka soonanara!’

²⁸ Vale onuukhale wiinla, ni okhuuriha maino nyuwo muneeraanyu mmoone Abrahaamu, Isaaki ni Yakobe ni maprofeeti ootheene moomweneni wa Muluku, mureenetho nyuwo vaate.

²⁹ Atthu eniiwe ninkhuma nsuwa, ninkela nsuwa, ottuthuwani ni ohitto, ni eniikilaathi vameesa moomweneni wa Muluku.

³⁰ Mwa yeeyo, aakhala ookisera eniikhale oopacera, ni oopacera eniikhale ookisera.”

Yeesu onlalamika niwoko na oYerusaleemu

³¹ Ehuhuweene yeele akina a aFarisi* yaamwaattamela Yeesu ni yaamweerela: “Mvenye va ni murowe elapo ekina, niwoko Herodi ontthuna owiivani.”

³² Owo aawaakhula: “Mwamuleele khwatte owo: kinimoomola minepa soonanara ni kinoolamiha muloko wa atthu olelo ni omaalo, ni nihuku nanaararu kinookwanihera mutekwaaka.

³³ Ontthuneyatho opwaherera olelo, omaalo ni omurotto, niwoko vekhaikhai khoongwereya wuupuwela weera naari mprofeeti mmoha akhwe vanipuroni nikina, ohikhanle oYerusaleemu.

³⁴ Yerusaleemu, Yerusaleemu, weyo ongwiiva maprofeeti ni onaavonya maluku yaawo orumiheliwaawo: Imaara ihayi Miyo kaatthunaaka waathukumanya anamwaniinyu ntoko nttehi ninaathukumanyaaya axaanaaya mmapuphani, mene khoontthuna!

³⁵ Moone, empaawo yoohiiwa yoothaamiwa. Miyo kinooleela weera weyo khoorwa okoonatho mpaka ehuhu oneeraawo weere: ‘Ooreelihiwa ti Yoowo ongwa mwa Nsina na Apwiya.’”