Luuka 11 - Emakhuwa Bible

Nihusiho na Yeesu mwaha wa ovekela

¹ Nihuku nimoha Yeesu eera avekelaka vanipuroni nimoha. Amalihaka, mmoha a oohuseraawe aamweerela: “Apwiya, munixuttihe ovekela ntoko Yohaane aaxuttinghaawe oohuseraawe.”

² Owo aaweerela: “Nyuwo mwaavekelaka, mweereke: ‘Atiithi, Nsinananyu ntteelihiwe. Omwenaanyu orwe.

³ Munivahe yoocaahu ya khula nihuku.

⁴ Munilevelele sootthekasahu, niwoko hiyo nnaalevelela yaawo annitthekela. Muhinihiye neereriwaka.’”

⁵ Vano aaweerela: “Noone ha weera mmoha a nyuwo akhalanneene nthamwene, ni onoorowa empaawe ohiyu eriyari amweerelaka: ‘Nthamwenaaka, mukoolihe ipaawu tthaaru,

⁶ niwoko nthamwenaaka mmoha oohoowa ni mukwahaawe, ni miyo nkinono etthu yoomvaha.’

⁷ Vano owo ori mpaani ommwaakhula: ‘Muhikixupe. Nsele noowaliwa ni anamwanaaka anookona ni miyo. Nkingwera ovenya weera koovaheeni yeeyo mukivekenlaanyu.’

⁸ Miyo kinooleelani: Naari ahivenyaka weera amvahe ipaawu niwoko ori nthamwenaawe, owo anaavenye ni anaamvahe sootheene ontthunaawe niwoko na ovilelawawe woohuuliwa muru.

⁹ Tivawo kinooleelani: Muvekele, ni munoovahiwa. Mwaasaase, ni munoophwanya; Mmane nsele, ni munoohuleliwa.

¹⁰ Ootheene amvekela, animwaakhela; yoole onaasaasa, onoophwanya; ni wa yoole ommana nsele, onoohuleliwa.

¹¹ Tiithi heeni a nyuwo, mwaninyu oovekelani ehopa, onoomvaha enowa?

¹² Hoye hoye avekela nooce, onoomvaha walisi?

¹³ Waari weera nyuwo murookhalaru atthu onanara murima munsuwela waavaha itthu sooreera anamwaniinyu, Atithinyu ari wiirimu anootepaxa waavaha Munepa Wootteela yaawo anaavekela!”

Yeesu ni Beelzebuli

¹⁴ Yeesu eera oomolaka munepa woonanara wa mutthu aari oohuuluma. Okhumakaru munepa woonanara, mutthu oohuuluma aahuuluma, ni muloko wa atthu ancipale waatikhina.

¹⁵ Akinatho a yaawo yaaheera: “Owo ongwera woomola minepa soonanara ni ekhavihero ya Beelzebuli, mwaneene a minepa soonanara.”

¹⁶ Akinatho yaamweerera, emvekelaka eneneero ya wiirimu.

¹⁷ Asuwelaka soowuupuwelasaya, Yeesu aaweerela: “Omwene wootheene wookawanyeya muneenaayaru onoomalela mmilepeni, ni empa emoha yookawanyeya eneenaayaru, enoopittuwa.

¹⁸ Satana iikawanyiha muneenaawe, moota heeni omwenaawe oneeraaya okhale? Miyo kinghima yeeyo niwoko mweenraanyu weera Miyo kinoomola minepa soonanara ni ekhavihero ya Beelzebuli.

¹⁹ Miyo koomola minepa soonanara ni ekhavihero ya Beelzebuli, anamwaniinyu anoomola minepa soonanara ni nsina nawani? Tivawo, awo asineenaaya eniikhale aphukaanyu.

²⁰ Waaritho weera Miyo kinoomola minepa soonanara ni ekatha ya Muluku, vano, omwene wa Muluku wohoorweelani.

²¹ Mulopwana mmoha a ikuru, ni awanreene ni iyuuma sa ekhotto, alipelelaka empaawe, itthusawe nsikhale soolipa.

²² Mukinatho oolipaxa angwanano ni angwina, onoomwaakha iyuuma iye owo aaroromelaawe, ni anaakawe mihakhusawe.

²³ Yoole ohikhanle ni Miyo, onookiinanano, ni yoole ohintakansa vamoha ni Miyo, onoomwaramwaxa.

²⁴ Munepa woonanara wakhuma wa mutthu, omvira mmapuroni a nikare, waasaasaka wiitthuuwa. Waahiphwanya, oneera: ‘Kinoohokoleela empa miyo kaakhumelenlaaka.’

²⁵ Waaphiyaka, onoophwanya empa yookwesiwa ni yoorehereriwa.

²⁶ Vano munepa ole onrowa ni onruuha minepa mithannamiili siri sootepaxa onanara. Sivolowaka mmo, sinkhala mwemmo. Hiiho ehuhu yoomalihera ya mutthu ole eniikhale yoonanaraxa opwaha yoopacera.”

²⁷ Yeesu aahimaawe masu ale, muthiyana mmoha a atthu ancipale aakhuwela: “Ooreelihiwa ti muthiyana ooyanreni ni owaamwihaleni.”

²⁸ Owo aamwaakhula: “Ooreelihiwa oophwaha ti yaale aniiwa masu a Muluku ni aniiwelela.”

Eneneero ya Yoonasi

²⁹ Yaandyeerereyaka atthu, Yeesu aapacera ohima: “Ekhapira ela ti ekhapira yoonanara. Ela ennavekela eneneero yootikhiniheiya, mene kheewowo eneneero eneeraaya evahiwe, ehikhanle eneneero ya Yoonasi.

³⁰ Vano, ntoko Yoonasi aaraawe eneneero wa atthu a oNinive, hiihotho Mwaana a mutthu anaakhale eneneero wa ekhapira ela.

³¹ Apwiyamwene a ohitto eniivenye nihuku na othorihiwa vamoha ni atthu a ekhapira ela ni awo eniithorihele ela, niwoko awo yaaweenle ottaiwenexa weera yiiwe miruku sa Salomoni. Vano Yoowo ori va ti mutokweene ompwaha Salomoni.

³² Atthu a oNinive eniivenye nihuku na othorihiwa vamoha ni ekhapira ela ni eniithorihele ela, niwoko yiiwaka olaleiya wa Yoonasi, yaarukunxa murima. Vano Yoowo ori va ti mutokweene ompwaha Yoonasi.

Onyaari wa erutthu

³³ Khaawo ompattiha onyaari ni oniikaathi nipuro noowiipitheya, naari vathi va laata. Ohiyanawaya, oniikaathi nipuro nootthuneya weera yaawo amvolowa, yooneke waara.

³⁴ Maitho ari waara wa erutthu. Maithwaanyu yaakhalaka ooreera, erutthwaanyutho eniisareiye waara. Maithwaanyutho yaakhalaka oonanara, erutthwaanyutho eniisareiye epiphi.

³⁵ Tivawo, mwiipasoope weera waara ori mpuwamwanyu ohikhale epiphi.

³⁶ Erutthwaanyu yootheene yasareya waara, ehikhalanaka mpatta mukina mpiphini, munoomwaleeliwa nnenesene ntoko waara wa onyaari onoomwaleelani.”

Yeesu onimwaahiiha aFarisi* ni anamawera a nlamulo*

³⁷ Yeesu amalihaka wuuluma, muFarisi* mmoha aamwiitthanela yooca. Vano Yeesu aarowa ni aakilaathi vameesa.

³⁸ muFarisi*, oonaka weera Yeesu khaanyangwe ahinaaye oca, aatikhina.

³⁹ Vano Apwiya yaamweerela: “Nyuwo aFarisi* munrapiha omokoni wa ekoomixi ni wa esasaani, mpuwatho moosareya ohaawela mihakhu ni onanara.

⁴⁰ Alolo! Yoowo opanke omokoni, khapanketho mpuwa?

⁴¹ Mwaavahetho yeeyo eri mpuwa wa esasaani oohaawa,ni mmoone weera sootheene moorapiheliwa.

⁴² Ii! Munoohaawa, nyuwo aFarisi*! Niwoko munimvaha Muluku anaamuloko a sooreerela sooreeraxa, aruda* ni a makukhu oohiyanahiyana a maphuwa ootheene a mutuphini, mene khamumpwatthela ekhaikhai ni osivela wa Muluku. Ontthuneya weera nyuwo mukwanihereke yeeyo, muhaahiyaka anaamuloko.

⁴³ Ii! Munoohaawa, nyuwo aFarisi*, niwoko nyuwo munnasivela mapuro oopacera muSinagogani* ni wuulumihiwa mwaatthuni.

⁴⁴ Ii! Munoohaawa nyuwo, niwoko muri ntoko mahiye ahinooneya, mwa yaawo atthu amviramo ehisuwelaka.”

⁴⁵ Namawera a nlamulo* mmoha aamwaakhula: “Muhusiha, mwaahimaka itthusene seiyo, munniruwanatho hiyo.”

⁴⁶ Yeesu aamwaakhula: “Ii! Munoohaawa nyuwotho, anamawera a nlamulo*, niwoko munnaathateliha atthu ni soolemela awo ahingweraaya okuxa, ni nyuwo asineenaanyu khamunaakhavihera oteexa naari ni ekatha emoha.

⁴⁷ Ii! Munoohaawa nyuwo, niwoko munootekela mahiye a maprofeeti, ereenetho makholowaanyu asineenaanyu yaawiivale.

⁴⁸ Hiiho nyuwo munkhalela onamoona weera munaakhulela yeeyo makholowaanyu yaapankaaya. Awo yaawiiva maprofeeti ni nyuwo munaatekela mahiyaaya.

⁴⁹ Tivawo Muluku eenraawe ni mirukusawe: ‘Miyo kinimoorumihelani maprofeeti ni arummwa. Vano awo eniiwiive akina ni eniyaasoonde akinatho.’

⁵⁰ Tivawo ekhapira ela eniikhalihiwe ni mulattu wa ephome ya maprofeeti ootheene eyeehiwe okhuma ompacereroni wa elapo ya vathi:

⁵¹ okhuma ephome ya Abeli mpaka ya Zakariya, iiviwe variyari wa altaari* ni Empa ya Muluku. Aani, Miyo kinooleelani weera ekhapira ela eniikhalihiwe ni mulattu wa sootheene seiye.

⁵² Ii! Munoohaawa, nyuwo anamawera a nlamulo*, niwoko moovenxa exaavi ya esuwelo. Nyuwo asineenaanyu khamvolongwe, ni mowooceeliha yaale yeera evolowe.”

⁵³ Avenyaka vaavaale Yeesu, aFarisi* ni anamawera a nlamulo* yaapacera wiinanano vancipale ni omukohakoha sincipale,

⁵⁴ yeereraka weera emvare ni masu eeraawe uulume.