Luuka 10 - Emakhuwa Bible

Yeesu onaarumiha oohusera 72

¹ Vahoolowaya, Yeesu aahaathanla oohusera miloko mithannamiili neeli ni aahaarumiha eeli-eeli vahoolowawe wa isidade sootheene ni mapuro ootheene Owo aatthunaawe orowa,

² aweerelaka: “Soohepha siri sincipale, mene anamiteko ari vakhaani. Tivawo, mwaavekele Apwiya a soohepha weera Awo yaarumihe anamiteko akinatho wa soohephasaya.

³ Murowe! Miyo kinoorumihani ntoko ikhondoolo variyari wa miici.

⁴ Muhikuxe nihottha, hata murupa, hata ikwakwaatta, ni muhimuulumihe mutthu mphironi.

⁵ Mwaavolowaka mpaani, mweerele toko: ‘Murettele wa empa ela.’

⁶ Akhala iwo mulopwana a murettele, murettelaanyu onuukhale ni yoowo; aahikhala, murettelaanyu ngwoohokoleeleni.

⁷ Mwakhale mpaani mmo, mucaaka ni muwuraka yeeyo eneeraaya yoovaheni, niwoko namuteko omphwanela nlivonawe. Muhaakakhanyihe empa ni empa.

⁸ Mwaavolowaka esidade emoha ni mwaakheliwaka nnenesene, mwaceeke yeeyo eneeraaya yawiikaathereni ohoolowanyu.

⁹ Mwaalamihe aretta ari weiwo ni mwaaleele yaawo: ‘Omwene wa Muluku wohookhuveelani.’

¹⁰ Mwaavolowaka esidade emoha ni mwaahaakheliwaka nnenesene, mwakhumele mmisewenimwaya ni mweere:

¹¹ ‘Mpaka ntthupi na esidadaanyu nri nnaawonimwahu, nootatha ntoko yoowootheriwaanyu. Musuwele nnenesene yeela: omwene wa Muluku wookhuveela.’

¹² Miyo kinooleelani: Wa nihuku nno na othorihiwa nnikhale nootepaxa esidadeene yeeyo opwaha oSodoma.

¹³ Ii! Onoohaawa weyo, Korasini, Ii! Onoohaawa weyo, Betsayida, niwoko sootikhiniha sipakiwe mwa weyo saapakiwe oTiro ni oSidoni, saano khalayi isidade iye sirukunxaleene murima, siwanreene isaakho ni siihenleene ettuura!

¹⁴ Wa nihuku na othorihiwa onuukhale woovileleya wa oTiro ni oSidoni opwaha wa weyo.

¹⁵ Ni weyo Kafarnawu, onuuwelihiwe wiirimu? Hoye! Weyo onuukhuruwele oHadesi*.

¹⁶ Yoole ongwiiwelelani, onkiiwelelatho Miyo. Yoole onookhoottani, onkikhoottatho Miyo. Vano, yoole onkikhootta, onimukhootta Yoowo okiruminghe.”

¹⁷ Oohusera miloko mithannamiili neeli yaahokolowa ni ohakalalaxa yeeraka: “Apwiya, mpaka minepa soonanara sinniiwelela hiyo mwa Nsinananyu.”

¹⁸ Owo aahaakhula: “Miyo koomoona Satana amoraka wiirimu ntoko overinya.

¹⁹ Kohoovahani ikuru weera munyikaleke inowa ni awalisi, aani, ikuru soopwaha sa sootheene seiyo sa amwiittana. Awo kheerwa yoonanarihani.

²⁰ Wa soothesene, muhihakalale niwoko minepa soonanara sinoowiiwelelani, mene muhakalale niwoko masinaanyu aalempwa wiirimu.”

²¹ Ehuhuweene yeele, Yeesu ahakalalaxaka mwa Munepa Wootteela aaheera: “Miyo kinoottottopelani Nyuwo, Atiithi, Apwiya a wiirimu ni vathi, niwoko moovitha itthu iya wa asuweli ni anamiruku, ni mohaathupululela iya asikhaani. Aani Atiithi, eyo yohoosivelihani.

²² Atithaka aakivaha itthu sootheene. Khaawo onsuwela weera Mwaana taani, ehikhanle Atiithi, ni khaawo onsuwela weera Atiithi taani, ahikhanle Mwaana ni yaale Mwaana ontthunaawe waathupululela.”

²³ Vano Owo aahaarukunuwela oohuseraawe ni aaweerela meekhaayaru: “Ooreelihiwa ti maitho anoona yeeyo munoonaanyu.

²⁴ Vano, Miyo kinooleelani weera maprofeeti ni mamwene mancipale yaatthunaxa woona yeeyo nyuwo munoonaanyu, mene khayoonne, ni wiiwa yeeyo muniiwaanyu, mene khayiiwale.”

Yoolikanyiha ya muSamariya ooreera

²⁵ Emaara emoha namawera a nlamulo* aaheemela weera amweerere Yeesu, ni aamukoha: “Muhusiha, kipake eheeni weera kiphwanye okumi woohimala?”

²⁶ Yeesu aamwaakhula: “Eheeni elempwale munlamuloni? Munsoma hai?”

²⁷ Owo aamwaakhula: “Mwaasivele Apwiya Mulukwaanyu ni murimaanyu wootheene, okumaanyu wootheene, ikurusanyu sootheene ni muupuwelowaanyu wootheene,” nitho “munsivele mukhwiinyu ntoko muniisivelaanyu muneenaanyu.”

²⁸ Yeesu aamwaakhula: “Mohaakhula nnene. Mpake yeeyo, ni munookhala ni okumi.”

²⁹ Vano owo, atthunaka wiitaphula, aamukoha Yeesu: “Taani mukhwaaka?”

³⁰ Yeesu aamwaakhula: “Mulopwana mmoha aarowa oYerusaleemu mpaka oYeriko. Mphironi aavariwa ni anamwiiya. Awo yaamurula ikuwosawe, enammana, enapwaha emuhiyaka owo ahanleene vakhaani okhwa.

³¹ Yaaheereiyatho weera aavira mphironi mmwe musaserdoti*. Amoonaka mulopwana ole, musaserdoti* aavira mpatta mukina.

³² Hiihotho muLeevi, aphiyaka vanipuroni nne ni amoonaka, aavira mpatta mukina.

³³ Vano, muSamariya, areene ni mukwahaawe, aaphiya weiwe aamphwannyaawe mulopwana. Amoonaka, aammorela ikharari.

³⁴ Aamwaattamela anamutthuka makhwatta, ahelaka eviinyu ni makhura. Aamwiikaathi mulopwana vasulu wa enamaawe, anamurongha wa empa ya aletto, anamwiikaathi nnenesene.

³⁵ Wa oxaawaya, aakhumiha idinaariyu* piili ni aamvaha mwaneene a empa ya aletto amweerelaka: ‘Munkosoope. Kaahokolowaka, kinimoolivani sootheene muneeraanyu munanarihe.’

³⁶ Munuupuwela hai? Taani a atthu araru ale aari mukhwaawe mulopwana aavariwe ni anamwiiya?”

³⁷ “Yoole aammorenle ikharari mulopwana ole,” aamwaakhula namawera a nlamulo*. Yeesu aamweerela: “Murowe ni mwapake mooteene yoowo.”

Vaate wa Marta ni Mariya

³⁸ Eettaka Yeesu ni oohuseraawe, yaaphiya mmuttettheni, weiwo muthiyana mmoha, iitthaniwa Marta, aamwaakhenlaawe owannyawe.

³⁹ Mariya, munneiye Marta, aakilaathi vanaawoni sa Apwiya iiwaka masu a Yeesu.

⁴⁰ Wa soothesene, Marta aari ni miteko sincipale saatthuneya oreherera. Owo, amwaattamelaka Yeesu, aamukoha: “Apwiya, khamumpwattha weera munnaka ookihiya meekhaaka ni miteko? Munleele weera akikhavihere!”

⁴¹ Apwiya yaamwaakhula: “Marta, Marta, munimweeteteya ni munoocecewuka ni itthu sincipale.

⁴² Vanonto, entthuneya etthu emoha paahi. Mariya oothanla mpatta wooreera, ni owo khoowa ovenxiwa wa yoowo.”