Levitiku 27 - Emakhuwa Bible

Woopoliwa wa yaale ari a Yave

¹ Yave aamweerela Moisesi:

² “Mwaaleele ha aYixrayeli: ‘Mukina aroromeliha aatteeliheraka atthu mwa Yave apakeke attharihaka nlivo nintthuneya;

³ avareleke muteko moota ola: wa asilopana variyari wa iyaakha miloko miili ni miloko mithannamosa okhuma oyariwawaya aliveke ixekeli* miloko mithanu, ettharaka exekeli* ya Nipuro Nootteela*;

⁴ ni nlivo na muthiyana nikhaleke ixekeli* miloko miraru.

⁵ Asilopwana variyari wa iyaakha ithanu ni a iyaakha miloko miili okhuma oyariwawaya, nlivo na mulopwana nikhaleke ixekeli* miloko miili ni na muthiyana ixekeli* muloko.

⁶ Wa atthu variyari wa mweeri mmoha ni iyaakha ithanu okhuma oyariwawaya, nlivo na mulopwana nikhaleke ixekeli* ithanu sa eparatha* ni na muthiyana ixekeli* tthaaru sa eparatha*.

⁷ Atthu arino iyaakha miloko mithannamosa wookela muhoolo okhuma oyariwawaya, nlivo na mulopwana nikhaleke ixekeli* muloko niithanu ni na muthiyana ixekeli* muloko.

⁸ Yoowo onroromeliha akhala oohaawaxa ahiweraka oliva nlivo nenenenno, owo amwaattameleke musaserdoti* ni musaserdoti* owo onoomuleela nlivo attharihaka yeeyo mulopwana ongweraawe oliva.

⁹ Yeeyo ororomelinghaawe akhala mwaamunama oowaakhuleleya wa Yave ntoko yooveleela, mwaamunama owo oovahiwa wa Yave onoothatuwa ootteela.

¹⁰ Owo ahiceendyiweke hata ahimwaakakhanyihe ooreera ni oonanara naari oonanara ni ooreera; owo amwaakakhanyiha mwaamunama mmoha ni mukina, ooweeli awo anoothatuwa ootteela.

¹¹ Mwaamunama owo omuroromelinghaawe akhala oohitteela– mmoha oohaakhuleleya ntoko yooveleela wa Yave – vano mwaamunama owo ooniheriweke wa musaserdoti*,

¹² mwa yoowo anaamoone makhalelowaawe. Moonelo wa musaserdoti* onoohima otthuneya wa mwaamunama owo.

¹³ Muneene a mwaamunama atthuna omoopola mwaamunama owo, owo aandyeerereke mpatta wanaathanu ni nlivo nno.

¹⁴ Mulopwana amutteelihera empaawe Yave, musaserdoti* ahimeke makhalelo a empa. Moonelo wa musaserdoti* ti oneera ohime muttengwaaya.

¹⁵ Mulopwana otteelinghe empaawe atthuna woopola yeeyo, owo aandyeerereke mpatta wanaathanu ni nlivo nno. Vano empa eyo enoohokoleela okhala yawawe.

¹⁶ Mulopwana amutteelihera Yave mpatta wa ettima ya amusaawe; nlivonaya niphimiweke oottharihiwaka mmiso mpatta ontthuneya – ixekeli* miloko mithanu wa ikiilu* macira ni miloko mithannararu sa mmiso wa esevada*.

¹⁷ Owo atteeliha ettimaawe vaYaakhani ya Otthapa, nlivo nipwaherereke nennoweene.

¹⁸ Vaheera atteeliha ettima vahoolo wa Eyaakha ya Otthapa, musaserdoti* aphimeke nlivo attharihaka waatta wa iyaakha singhala mpaka Eyaakha ya Otthapa onttharelana, ni nlivonawe nnoovukuliwa.

¹⁹ Mulopwana ontteeliha ettimaawe atthuna woopola, owo aandyeerereke mpatta wanaathanu wa nlivo nno, ni ettimeene yeeyo enoohokoleela okhala yawawe.

²⁰ Wa soothesene, owo aahoopola ettima hoye hoye athumiha, khoongwereya woopolatho.

²¹ Ettima yaatapuxiwa vaYaakhani ya Otthapa, enoothatuwa yootteela, ntoko ettima yootteeliheriwa Yave; enoothatuwa ettima ya asaserdoti*.

²² Mulopwana amutteelihera Yave ettima othummaawe, eyo ehikhanle ya mpatta wa amusaawe,

²³ musaserdoti* akhaliheke nlivonaya mpaka Eyaakha ya Otthapa onttharelana ni mulopwana aliveke nihuku nenenenno ntoko etthu yootteeliheriwa Yave.

²⁴ vaYaakhani ya Otthapa ittima sihokoloxeriweke wa yoole aathumihale.

²⁵ Nlivo nootheene niphimiweke ettharihiwaka exekeli* ya Nipuro Nootteela*, mwa yeeyo enlemela igrama* muloko ni piili.

²⁶ Ahikhaleru aneera atteelihe ntthaara na muhuwo, yeenre matthaara ootheene ekhalaka a Yave; ekhalaka emobe hoye hoye epuri naari ekhondoolo, ti a Yave.

²⁷ Akhala mmoha a mwaamunama oohitteela, owo oopoliweke ni nlivo nna nikhalihingwe waandyeereriwaka mpatta wanaathanu wa nlivo nno. Owo aahoopola, mwaamunama owo athumihiwe ni nlivo nikhalihingwe.

²⁸ Wa soothesene ehikhaleru etthu orinaawe mutthu ni omutteelihenraawe Yave, okhuma mutthu, etthu eri ya mulopwana omutteelihenre Yave – akhalaka mutthu, mwaamunama hoye hoye ettima yawaweene eneera ethumihiwe naari eniyoopoliwe; itthu sootheene sitteelihingwe ti sootteelaxa wa Yave.

²⁹ Mutthu otteeliheriwe ophwatiwa; ahoopoliweke; owo iiviweke.

³⁰ Mpatta wanaamuloko wa sootheene siri mulaponi – ekhalaka etrigu hoye hoye soowiima sa nyiri – ti sa Yave; ti sootteeliheriwa Yave.

³¹ Mulopwana atthuna woopola mpatta wanaamulokwaawe, owo aandyeerereke mpatta wanaathanu wa nlivonawe.

³² Mpatta wanaamuloko wootheene wa mihuwo sootheene – khula mwaamunama anaamuloko amvira vathi wa ekopo ya mukukhuli – onookhala ootteela wa Yave.

³³ Muneene ahaavenxeke ooreerela eriyari ya oonanarela hata ahiwaakakhanyihe. Owo awaakakhanyiha, axinama eeli awosa, ooweeli anoothatuwa ootteela wa Yave ni khoongwereya owoopola.’”

³⁴ Iya ti ikano, malamulo ni soolamula Yave aakhalinghaawe vamwaako oSinayi variyari wa Yoowo ni aYixrayeli mwa Moisesi.