Levitiku 24 - Emakhuwa Bible

Onyaari

¹ Yave aamweerela Moisesi:

² “Mwaalamule aYixrayeli weera yooruuheleni makhura ooreera a sooliveira* oowaamiwa yeereliwaka omwaleelela weera onyaari okhaleke epattelo.

³ Omokoni wa eluttu ya Namoona, Muheemani mwa Muthukumano, Aharoni apwaherereke opattiha onyaari ohoolo wa Yave ekhumelo woosiilo mpaka oxa. Nna nikhale nlamulo noohimala wa ikhapirasanyu sootheene mmapuroni ootheene muneeraanyu mukhale.

⁴ Onyaari orino nyetto sa eyuuma yoorikaxa yooreera onkhala ohoolo wa Yave okhaleke epattelo.

⁵ Mukuxe ephepa yooxiliwa nnenesene ni mpake ipaawu muloko ni piili, muvarelaka muteko ikiilu* ixexe wa khula epaawu.

⁶ Muthateke mmiserani miili; khula musera ipaawu ithannamosa, vameesa a eyuuma yooreeraxa vamaithoni wa Yave.

⁷ Muhele erubani* yootteela khula musera ntoko mpatta woowuupuwelela vanipuroni na ipaawu ni weera ekhale yooveleela yoomurehererela vayikho Yave.

⁸ Ipaawu iyo sireherereliweke Yave khula eSaabadu yeereliwaka aYixrayeli ntoko wiiraana woohimala.

⁹ Iyo ti sa Aharoni ni anamwanaawe asilopwana mwa yaawo eneera eceleke vaNipuroni Nootteela*, niwoko ti mpatta wootteelaxa wa mipattasaya sa khula nihuku sa sooveleela soomurehererela vayikho Yave. Ti ekano yoohimala.”

Nlapho ni nttaruxonaya

¹⁰ Vano, mwaana mulopwana a muYixrayeli muthiyana ni ngwExipitu mulopwana aarowa eriyari ya aYixrayeli ni waakonelingwe waakhala munyakunyaku owo ni muYixrayeli.

¹¹ Mwaana mulopwana a muYixrayeli muthiyana owo aaveiha Nsina na Yave ni nlapho; tivawo yaamuronghenlaaya Moisesi. Nsina na amayawe naari Xelomiti, mwaana muthiyana a Dibri, muDani.

¹² Yaamutthuka mpaka yeeraaya yaakhele otthuna wa Yave mwaha wa yoowo.

¹³ Yave aamweerela Moisesi:

¹⁴ “Munkhumihere vaate wa okonelingwe. Ootheene yaawo amwiiwale emwiikaathereke matata vamuruwawe ni muthukumano wootheene omvonyeke maluku.

¹⁵ Mwaaleele aYixrayeli: ‘Akhala mukina aneera amulaphe Mulukwaawe, onookhalano nthowa na yootthekaawe;

¹⁶ ootheene anlapha Nsina na Yave yiiviweke. Muthukumano wootheene omvonyeke maluku. Okhuma neethi mpaka namarwa – alapha Nsina na Yave, iiviweke.

¹⁷ Akhala mutthu aneera amwiive mukina, owo iiviweke.

¹⁸ Yoole aneera amwiive mwaamunama a mukina amulivanyiheke – okumi mwa okumi.

¹⁹ Mukina amvulaliha mukhwaawe, anamurakaliha, apakiweke moota yoowo opankaawe:

²⁰ nikhwatta nnikhwatta; niitho nniitho; niino nniino; mooteene yoowo omvulalihalaawe mukina amurakalihaka, hiihotho owo avulalihiweke.

²¹ Yoole aneera amwiive mwaamunama amulivanyiheke, vaheera yoole aneera amwiive mutthu, iiviweke.

²² Malamulo ala ti wa namarwa nitho muYixrayeli. Miyo ti Yave Mulukwaanyu.’”

²³ Vano Moisesi uulumaleene ni aYixrayeli, awosa yaamukhumihera vaate namalapha owo, enamvonya maluku. aYixrayeli yaapaka yeeyo Yave aamulamulenlaawe Moisesi.