Levitiku 21 - Emakhuwa Bible

Ikano mwaha wa asaserdoti*

¹ Yave aamweerela Moisesi: “Mwaaleele ha asaserdoti*, anamwane asilopwana a Aharoni: ‘Musaserdoti* ahithatuwe oohitteela niwoko na mukina a mulokwaawe aneera akhwe,

² ohikhanle mwaha wa mmusaawe xaxaxa ntoko amayawe, atithawe, mwanawe mulopwana hoye hoye muthiyana, munneiye,

³ hoye hoye murokoriye oowiikosoopa, oohitheliwa, onkhaviheriwa ni musaserdoteene yoowo. Owo ti anaamutatuxe oohitteela.

⁴ Musaserdoti* ahithatuwe oohitteela, iivalihaka mwaha wa otheliwa wa mmusi.

⁵ Asaserdoti* ehicemele naari ehicemelele ireru, hata ehiithikilase.

⁶ Asaserdoti* ekhaleke ootteela wa Mulukwaaya ehiveihaka Nsina na Mulukwaaya. Awosa ekhaleke ootteela, niwoko ampaka soomveleelela Yave soorehereriwe vayikho; sooveleela siri sooca wa Mulukwaaya.

⁷ Awosa ehimutheleke puuta, mwaamwali oohiikosoopa hoye hoye muthiyana omwalanne ni aiyawe, niwoko asaserdoti* ekhaleke ootteela wa Mulukwaaya.

⁸ Mmoonele okhala ootteela, niwoko awosa anreherera sooca sa Mulukwaanyu. Mmoonele okhala ootteela, niwoko Miyo, Yave kinootteelihani, kiri ootteela.

⁹ Mwaana muthiyana a musaserdoti* iiveiha athatuwaka puuta, owo onaaveiha atithawe; ahisiweke mpaka okhwa.

¹⁰ Mutokweene a asaserdoti*, mulopwana yoole eriyari ya axunneiye mwa yoowo ottikittheliwe makhura mmurumwawe ni okhalihiwe weera aware ikuwo sa esaserdoti aheette ni mayihi capurukhwa hata ahaahule ikuwosawe ooniheraka wiinanela.

¹¹ Owo ahivolowe oraayamo muttembo. Ahiitatuxe oohitteela – naari mwaha wa atithawe hoye hoye amayawe,

¹² hata ahihiye Nipuro Nootteela* na Mulukwaawe hoye hoye ahiveihe nno, niwoko owo ootteeliheriwa ni makhura oottikitthelano wa Mulukwaawe. Miyo ti Yave.

¹³ Muthiyana aneeraawe amuthele akhaleke oowiikosoopa.

¹⁴ Owo ahimuthele naamukhweli, muthiyana omwalanne hoye hoye muthiyana oohiikosoopa, hata puuta, mene akhaleke mwaamwali oowiikosoopa a mulokwaawe

¹⁵ weera ahiveihe ekhapiraawe eriyari ya mulokwaawe. Miyo ti Yave kinimutteeliha.

¹⁶ Yave aamweerela Moisesi:

¹⁷ “Mwamuleele Aharoni: ‘Wa ikhapira sootheene sa muhoolo ahikhaleru a mukhapiranimwanyu orakanle aneera aruuhe yooveleela eri yooca Yave Mulukwaanyu.

¹⁸ Ahikhaleru mulopwana orakanle anaakhuveele: akhalaka oohoona, ooheetta, orino ekhove yoorakala hoye hoye naari erutthu yoovirikana;

¹⁹ mulopwana orino ntata hoye hoye nnaawo noorakala,

²⁰ hoye hoye orino namaangara hoye hoye ookhuveyaxa, naari eevaasi, hata orino ithuku sootathareya naari oniittheya hoye hoye orino ikhapwembwe.

²¹ Ahikhaleru mulopwana oorakala a ekhapira ya Aharoni, musaserdoti*, aneera amwaattamele Yave weera ampakele sooveleela soorehereriwa vayikho. Owo ti oorakala; ahimuruuheleru Mulukwaawe.

²² Owo aceeke yooca yootteelaxa ya Mulukwaawe nitho yooca yootteela ekina.

²³ Vaheera, niwoko na orakalawawe, ahaattamele eluttu hoye hoye altaari* weera ahiveihe Nipuronaka Nootteela*. Miyo ti Yave kinaatteeliha.’”

²⁴ Vano Moisesi aamuthalihera itthu seiya Aharoni, anamwanaawe nitho aYixrayeli ootheene.