Levitiku 19 - Emakhuwa Bible

Ikano mwaha wa sookhovelela soohiyanahiyana

¹ Yave aamwerela Moisesi:

² “Mwaleele muthukumano wootheene wa aYixrayeli: ‘Mukhale ootteela niwoko Miyo, Yave Mulukwaanyu, ti Ootteela.

³ Khula mutthu a nyuwosa aattittimihe amayawe ni atithawe nitho iSaabadusaka. Miyo ti Yave Mulukwaanyu.

⁴ Muhitthare miluku soowootha naari muhiipakele miluku sa iyuuma soohaniwa. Miyo ti Yave Mulukwaanyu.

⁵ Mwaampakelaka Yave yooveleelela murettele, mpake yeeyo weera yaakhuleliwe mweereliwaka nyuwo.

⁶ Eyo ekhuuriwe munihukuni mumveleelaanyu hoye hoye waaxiiye; seiyo sineera sihale mpaka nihuku nanaararu sihisiweke.

⁷ Sakhalaru sa seiyo sineera sikhuuriwe vanihukuni nanaararu, sinookhala soohitteela ni khasaakhuleleya.

⁸ Yoowo aneera akhuure seiyo onoohaawa mootakhalanimwawe niwoko ooveiha yeeyo eri yootteela wa Yave; mutthu owo onoomalamalihiwa mmulokonimwawe.

⁹ Nyuwosa mwaahephaka mmattamwanyu, muhihephe mpaka mukotihenraanyu olima naari muhittottattotte simmoramora sa ohephawanyu.

¹⁰ Muhihephe emattaanyu ya iwuuva* emaara yanaaveeli naari muhittottattotte iwuuva* simmoramora. Munghiyereke oohaawa ni namarwa. Miyo ti Yave Mulukwaanyu.

¹¹ Muhiiye, muhoothe; muhilokotthane.

¹² Muhilipele moota woolokotheya mwa Nsinanaka muveihaka hiiho Nsina na Mulukwaanyu. Miyo ti Yave.

¹³ Muhimuhooxe mukhwiinyu naari muhimwiiyere. Muliveke nlivo na namuteko onaakhela vanihukuni muhimpisihereke mpaka waaxiiye.

¹⁴ Muhimulaphe oohiiwa hoye hoye muhimwiikaathere nluku nninkwakwathula oohoona, mene mmoove Mulukwaanyu. Miyo ti Yave.

¹⁵ Muhivirikanyihe ekhaikhai mwaathorihaka, muhimuthorihele oohaawa ni nthalu naari muhaathorihele asitokweene ni nthalu, mene munthorihele mukhwiinyu ni ekhaikhai.

¹⁶ Muhimwaramwaxe soowaapa eriyari ya mulokwaanyu. Muhipakeru etthu enoopopiha okumi wa mukhwiinyu. Miyo ti Yave.

¹⁷ Muhimuthanye munninyu mmurimanimwanyu. Munghiihe mwaattamwanaanyu mweekhaikhaiyini weera muhikhalanetho nthowa.

¹⁸ Muhaasaase wiinlela ikukuttula naari muhimunyoonyeriwe mukina a mulokwaanyu, vaheera munsivele mukhwiinyu ntoko muniisivelaanyu. Miyo ti Yave.

¹⁹ Mwiiwelele ikanosaka. Muhaathelanyihe axinama oovirikana. Muhaale izo nyoota miili mmattamwanyu. Muhiware ekuwo yoovaxavaxiwa.

²⁰ Mulopwana akonano epottha ethiyana etthomeriwe ni mulopwana mukina, mene ehoopoliwe hata ehitapuxiwe, vano attaruxiweke moota ontthuneyaaya. Vaheera awosa ehiiviwe, niwoko epottha eyo khayaatapuxiwe.

²¹ Wa soothesene mulopwana owo amuruuheleke Yave napunci vamulako wa Eheema ya Muthukumano ntoko yooveleelela nthowa.

²² Musaserdoti* amukuxeke napunci a yooveleelela nthowa amurehererelaka wiiwanana ni Yave vamaithoni wa Yoowo mwa yoottheka opankaawe, ni yootthekaawe enooleveleliwa.

²³ Mwaavolowaka mweelaponi, munaphatteya wakhalaru mwiri wa soowiima, moonele weera soowiimasaya ti soohitthuniheriwa. Moonele seiyo ntoko soohitthuniheriwa wa iyaakha tthaaru; iyo sihiciweru.

²⁴ Vayaakhani yanaaxexe soowiimasaya sootheene sinookhala sootteela; sooveleela sa omuttottopela Yave.

²⁵ Vaheera vayaakhani yanaathanu muceeke soowiimasaya. Moota hiiho soohephasanyu sinimwaandyerereya. Miyo ti Yave Mulukwaanyu.

²⁶ Muhikhuureru enama ni ephome. Muhaase ihako hoye hoye itthu sa okhwiri.

²⁷ Muhicemele hata muhicemelele ireru.

²⁸ Muhiithikilase niwoko na anamakhwa naari muhiipophe. Miyo ti Yave.

²⁹ Muhimuverule mwaninyu muthiyana muntatuxaka puuta niwoko hiiho elapo enoohokoleela opuuta, esareyakano sootakhala.

³⁰ Muthokorore iSaabadusaka ni muttittimihe Nipuronaka Nootteela*. Miyo ti Yave.

³¹ Muhiwaasaaseru yaale anaahera ihako hoye hoye anuuluma ni anamakhwa, niwoko munoovalihiwa ni yaawosa. Miyo ti Yave Mulukwaanyu.

³² Ngweemelele anamuuluvala ni mwaattittimihe asitokweene a muloko; mmoove Mulukwaanyu. Miyo ti Yave.

³³ Namarwa aakhalaka mweelaponimwanyu, muhimuhasule.

³⁴ Namarwa onkhala ni nyuwosa mmoonelekemo ntoko muYixrayeli. Munsivele ntoko muniisivelaanyu niwoko mwaari anamarwa wExipitu. Miyo ti Yave Mulukwaanyu.

³⁵ Mwaaphimaka orakama, olemela hoye hoye waattawaya, mvarele muteko muringo wa ekhaikhai.

³⁶ Mvareleke muteko miringo sa ekhaikhai mwaaphimaka soolemela sa irooro, mpaka sa maahi maahi. Miyo ti Yave Mulukwaanyu kookhumihaleni wExipitu.

³⁷ Mwiiwelele ikanosaka sootheene ni malamulowaaka ootheene ni mutthareke yaawo. Miyo ti Yave.’”