Levitiku 15 - Emakhuwa Bible

Mwaha wa soohitteela sa mulopwana ni muthiyana

¹ Yave aamweerela Moisesi ni Aharoni:

² “Mwaaleele aYixrayeli: ‘Mulopwana iittheya, vano iwo ti ohitteela.

³ Naari apwahereraka hata ahipwahereraka, eyo enoomutatuxa oohitteela. Wiittheya iwo onoomutannyera ohitteela moota ola:

⁴ Yakhalaru ekaama onkonelaawe mulopwana owo oniittheya ti yoohitteela ni hiihotho ihice sootheene aneeraawe akilaathele.

⁵ Yoowo aneera atave ekaamaawe akatthe soowarasawe ni arapeke ni onookhala oohitteela mpaka oxekuwa.

⁶ Yoowo aneera akilaatheleru yakhalaru etthu mulopwana owo okilaathenlaawe, akatthe soowarasawe ni arapeke, ni onookhala oohitteela mpaka oxekuwa.

⁷ Yoowo aneera amutave mulopwana oniittheya, akatthe soowarasawe ni arapeke ni onookhala oohitteela mpaka oxekuwa.

⁸ Mulopwana owo oniittheya amusenyela mutthu ori ootteeleene, owo akatthe soowarasawe ni arapeke, ni onookhala oohitteela mpaka oxekuwa.

⁹ Yakhalaru etthu mulopwana oniittheya aneeraawe akilaathele angwelaka mwaamunana, enookhala yoohitteela,

¹⁰ ni yoole aneera atave yakhalaru etthu aakilaathenlaawe mulopwana oniittheya, onookhala oohitteela mpaka oxekuwa. Yoowo aneera akuxeru itthusene seiyo akatthe soowarasawe ni arapeke, ni onookhala oohitteela mpaka oxekuwa.

¹¹ Yoowo mulopwana oniittheya aneera amutave ahinanyawa, vano otavingwe akatthe soowarasawe ni arapeke ni onookhala oohitteela mpaka oxekuwa.

¹² Mulopwana owo atava mwaapu, vano mwaapu owo opwexiweke ni atava yakhalaru ekaruma ya etthaabwa, eyo erapihiweke.

¹³ Mulopwana owo oniittheya alama, aalikeleleke mahuku mathannameeli mpaka otteelihiwawawe; akatthe ikuwosawe ni arapeke mmoolokoni, ni onookhala ootteelihiwa.

¹⁴ Vanihukuni nanaathannamararu akuxeke aximasiya meeli hoye hoye makhinda meeli ni iixoonihere vamaithoni wa Yave vamulako wa Eheema ya Muthukumano* amvahaka musaserdoti*.

¹⁵ Musaserdoti* iiveke – nimoha ntoko yooveleelela yoottheka ni nikina ntoko yooveleela yoohisa. Moota ola onoomurehererela wiiwanana ni Yave vamaithoni wa Yoowo niwoko na wiittheya.

¹⁶ Mulopwana yaamukhumaka elopwana, arapeke ni onookhala oohitteela mpaka oxekuwa.

¹⁷ Yakhalaru etthu ya ekuwo hoye hoye exapala eneera ettonyeriwe elopwana, ekatthiwe ni enookhala yoohitteela mpaka oxekuwa.

¹⁸ Mulopwana amukonano muthiyana ni yamukhuma elopwana, ooweeli awo erapeke, ni anookhala oohitteela mpaka oxekuwa.

¹⁹ Muthiyana akhala ni mpingu, ohitteela wa mpingwaawe iinaneleke mahuku mathannameeli ni yoowo aneera amutave onookhala oohitteela mpaka oxekuwa.

²⁰ Yakhalaru etthu aneeraawe akonele mweehuhuni ya mpingwaawe enookhala yoohitteela ni yakhalaru etthu aneeraawe akilaathele enookhalatho yoohitteela.

²¹ Yoowo aneera atave ekaama ya muthiyana owo, akattheke ikuwosawe ni arapeke ni onookhala oohitteela mpaka oxekuwa.

²² Yoowo aneera atave yakhalaru etthu aakilaathenlaawe muthiyana owo, akattheke ikuwosawe ni arapeke ni onookhala oohitteela mpaka oxekuwa.

²³ Hata ekhalaka ekaama naari yakhalaru etthu muthiyana owo aakilaathenlaawe – mukina atavaru yeeyo, onookhala oohitteela mpaka oxekuwa.

²⁴ Mulopwana amukonano muthiyana owo ni mweeraawe onamuttonyera, onookhala oohitteela wa mahuku mathannameeli; yakhalaru ekaama aneeraawe akonele enookhala yoohitteela.

²⁵ Muthiyana yamukhuma ephome wa mahuku mancipale ohikhanle mpingwaawe hoye hoye opwahaxa ehuhuwaawe ya mpingwaawe, onookhala oohitteela mmahukuni mwa okhumawawe ephome, ntoko mweehuhuni ya mpingwaawe.

²⁶ Yakhalaru ekaama aneeraawe akonele mweehuhuni mwa okhummwawawe ephome, enookhala yoohitteela, ntoko eneereyaaya ni ekaamaawe mweehuhuni ya mpingwaawe ni yakhalaru etthu aneeraawe akilaathele, enookhalatho yoohitteela, ntoko mweehuhuni ya mpingwaawe.

²⁷ Yoowo aneera atave yakhalaru etthu ya seiyo onookhala oohitteela; akattheke ikuwosawe ni arapeke, ni onookhala oohitteela mpaka oxekuwa.

²⁸ Vano waamalaka okhummwawawe ephome, aalikeleleke mahuku mathannameeli ni vahoolowaya onootteelihiwa.

²⁹ Vanihukuni nanaathannamararu owo akuxeke aximasiya meeli hoye hoye makhinda meeli ni amurongheleke musaserdoti* vamulako wa Eheema ya Muthukumano*.

³⁰ Musaserdoti* iiveke – nimoha ntoko yooveleelela yoottheka ni nikina ntoko yooveleela yoohisa. Moota ola onoomurehererela wiiwanana ni Yave vamaithoni wa Yoowo niwoko na ohitteela wa okhummwawawe ephome.

³¹ Nyuwo mwaalamule aYixrayeli weera ekhale ottai wa itthu sineera saatatuxe oohitteela weera ehikhwe moohitteelanimwaya enanarihaka Nipuronaka kimankaaka variyariwaya.’”

³² Iya ikano mwaha wa mulopwana oniittheya ni yoowo enimukhuma elopwana emutatuxaka oohitteela,

³³ wa muthiyana munpingunimwawe, wa mulopwana hoye hoye muthiyana oniittheya ni wa mulopwana onimukonano muthiyana ori oohitteela.