Levitiku 12 - Emakhuwa Bible

Otteelihiwa wa athiyana vahoolo wa oyara

¹ Yave aamweerela Moisesi:

² “Mwaaleele aYixrayeli: ‘Muthiyana arupula, anamuyara mwaana mulopwana, muthiyana owo onookhala oohitteela wa mahuku mathannameeli mooteene yoowo onaatalelaawe.

³ Vanihukuni nanaathannamararu mwaana mulopwana owo iineliweke.

⁴ Vahoolowaya muthiyana aweherereke mahuku miloko miraru ni mararu weera atteelihiwe ngwiinanelanimwawe. Owo ahitave etthu yootteela naari ahiroweru wa Nipuro Nootteela* mpaka okwanela mahuku a otteelihiwawawe.

⁵ Muthiyana amuyara mwaana muthiyana, muthiyana owo onookhala oohitteela wa isimana piili, mooteene yoowo onaatalelaawe. Vahoolowaya owo aweherereke mahuku miloko mithannamosa ni mathannamosa weera atteelihiwe ngwiinanelanimwawe.

⁶ Yakwanela mahuku a ootteelihiwawawe vahoolo wa omuyara mwaana mulopwana hoye hoye muthiyana, owo amuruuheleke musaserdoti* vamulako wa Eheema ya Muthukumano* eputtiputthi ya eyaakha emoha ntoko yooveleela yoohisa ni nikhinda hoye hoye mwaansiya ntoko yooveleelela soottheka.

⁷ Owo amveleeleleke Yave sooveleela iyo weera amurehererele wiiwanana ni Yave, ni muthiyana owo onookhala ootteelihiwa ngwiinanelanimwawe. Iya ikano mwaha wa muthiyana anaamuyare mwaana mulopwana hoye hoye muthiyana.

⁸ Owo aahikhalano meerelo oophwanya eputtiputthi, aruuheke aximasiya meeli hoye hoye makhinda meeli – nimoha wa yooveleela yoohisa ni nikina wa yooveleelela yoottheka. Moota hiiho musaserdoti* onoomurehererela wiiwanana ni Yave, ni onookhala ootteelihiwa.’”