Levitiku 11 - Emakhuwa Bible

Sooca sootteela ni soohitteela

¹ Yave aamweerela Moisesi ni Aharoni:

² “Mwaaleele aYixrayeli: ‘Variyari wa axinama ootheene a mulaponi muneeraanyu mwakhuureke ti ala:

³ Akhalaru mwaamunama orino inaawo soothaleya makharu meeli ni oncukhula, munkhuureke.

⁴ Aakhala akina ancukhula paahi ehikhalanne inaawo soothaleya sa makharu meeli hoye hoye arino inaawo soothaleya sa makharu meeli, mene khaancukhula – muhaakhuure. Haaci, onoocukhularu, khathaleiye inaawo sa makharu meeli; ti yoohitteela wa nyuwo.

⁵ Matthika onoocukhularu, khathaleiye inaawo makharu meeli, ti oohitteela wa nyuwo.

⁶ Hukula, onoocukhularu, khathaleye inaawo makharu meeli, ti oohitteela wa nyuwo.

⁷ Ekuluwe eroothaleyaru inaawo makharu meeli kheencukhula, ti yoohitteela wa nyuwo.

⁸ Muhikhuure inamasene seiyo hata muhitaveru sookhwasaya, ti soohitteela wa nyuwo.

⁹ Sa soopattuxiwa sootheene sinkhala mmaahini nyuwosa mukhuureke seiyo sirino malakhalakha ni makamba.

¹⁰ Vaheera sootheene iyo sihikhalanne malakhalakha ni makamba – sikhalaka sa soopattuxiwa sikhaani sootheene, sikhalaka sa sikina iyo sinkhala mmaahini – muthanyeke.

¹¹ Weenre otthuneyaka othanya, muhikhuure inamasaya ni muthanye sookhwasaya.

¹² Soopattuxiwa sootheene sinkhala mmaahini sihikhalanne malakhalakha ni makamba ti sa mwiikho wa nyuwosa.

¹³ Ipalame siri soohitteela wa nyuwo mwa seiyo muneeraanyu muhikhuureke niwoko sookhoottiheriwa ti iya: xaaka, enaka, nrepo,

¹⁴ xaattula makula, ni ikhalelo sootheene sa nttawo,

¹⁵ ikhalelo sootheene sa anakhuku,

¹⁶ nikhakanttore, namame, haamaama, ikhalelo sootheene sa ahaamaama,

¹⁷ esiisi, engwasi, nikunkhuni,

¹⁸ mwaacaace, mwaacaace a mmakareni, khuruwela,

¹⁹ ntiki, ikhalelo sootheene sa antiki, kokotthi ni nantuuthu.

²⁰ Aciitthu ootheene amvava yeettaka nyetto mixexe mwaathanyeke.

²¹ Wa soothesene variyariwaya mwaakhuureke arino miphonyoongo sootuphano.

²² Variyariwaya mootthuniheriwa okhuura wakhalaru moota wa misoope.

²³ Vaheera ikhalelo sootheene sirino mapupha ni nyetto mixexe sikhaleke sa mwiikho wa nyuwo.

²⁴ Ikhalelosene seiyo sinimootatuxani oohitteela; yoole aneera atave sookhwasaya onookhala oohitteela mpaka oxekuwa.

²⁵ Yoole aneera akuxe yakhalaru yookhwa emoha ya seiyo, acapeke soowarasawe ni onookhala oohitteela mpaka oxekuwa.

²⁶ Akhalaru mwaamunama oohikawanyeya inaawo ni makharu meeli hoye hoye ohincukhula ti oohitteela wa nyuwo. Yoole aneera atave yookhwa emoha ya seiyo onookhala oohitteela.

²⁷ Variyari wa axinama ootheene aneetta ni nyetto mixexe, yaawo aneetta ni inaawo ti oohitteela wa nyuwo; yoole aneera atave sookhwasaya onookhala oohitteela mpaka oxekuwa.

²⁸ Yoole aneera akuxe yakhalaru yookhwa emoha ya seiyo, acapeke soowarasawe ni onookhala oohitteela mpaka oxekuwa. Seiyo ti soohitteela wa nyuwo.

²⁹ Eriyari ya axinama aniipurula ari oohitteela wa nyuwo ti ala: nawili, nikhule ni sakhalaru ikhalelo sa makoottwa,

³⁰ nimara, naakoonkho munengele, hala, naakoonkho a mweehaavani ni namanriya.

³¹ Eriyari ya axinama aniipurula ti ari oohitteela wa nyuwo. Yoole aneera amutave ookhwa mmoha a yaawo onookhala oohitteela mpaka oxekuwa.

³² Mmoha a yaawo akhwiiyeene amorela vasulu wa yakhalaru ekaruma emvareliwa muteko, vano etthweene yeeyo enookhala yoohitteela. Ekaruma eyo, hata ekhalaka etthu ya itthaabwa, ekuwo, exapala hata esaakho, ti yoohitteela. Eruweiweke – enookhala yoohitteela mpaka oxekuwa ni vahoolowaya enootteela.

³³ Mmoha a yaawo amorela mmwaapuni, sootheene siri mwemmo sinookhala soohitteela ni nyuwo mpwexeke.

³⁴ Yakhalaru yooca eniittonyeriwe ni maahi awo enookhala yoohitteela ni yakhalaru yoowura eniikhale mmwaapuni mmo enookhalatho yoohitteela.

³⁵ Yakhalaru etthu eneera emoreliwe ni akhalaru mwaamunama ookhwa a yaawo enoothatuwa yoohitteela. Akhala ttukuttha hoye hoye moota wa niikho na oloko mpwexeke. Ti soohitteela ni nyuwosa moonele okhala soohitteela.

³⁶ Wa soothesene naattuuttu hoye hoye ehime ya maahi enoopwaherera okhala yootteela, mene yoole aneera atave sookhwasaya onookhala oohitteela.

³⁷ Mwaamunama ookhwa amorela vammisoni oneera waaliwe, vano owo onoopwaherera okhala wootteela;

³⁸ vaheera yariheliwa maahi vammisoni ti woohitteela wa nyuwo.

³⁹ Akhwa mwaamunama onkhuuriwa, vano yoole aneera amutave ookhwa a yoowo, onookhala oohitteela mpaka oxekuwa.

⁴⁰ Yoole aneera amukhuure mwaamunama oowiikhwela, acapeke soowarasawe ni onookhala oohitteela mpaka oxekuwa. Yoole aneera amukuxe mwaamunama ookhwa, acapeke soowarasawe ni onookhala oohitteela mpaka oxekuwa.

⁴¹ Ikhalelo sootheene siniipurula ti sa mwiikho wa nyuwo; khamuntthuniheriwa okhuura.

⁴² Khamuntthuniheriwa okhuura yakhalaru ekhalelo eniipurula, ekhalaka ni erukulu, ekhalaka ni nyetto mixexe hoye hoye nyetto sincipale; sootheene iyo ti sa mwiikho wa nyuwo.

⁴³ Muhiivalihe ni ikhalelosene seiyo. Muhiitatuxe oohitteela ni seiyo ni sihootatuxeni oohitteela.

⁴⁴ Miyo ti Yave, Mulukwaanyu; mwiitteelihe ni mukhaleke ootteela niwoko Miyo ti Ootteela. Muhiivalihe ni yakhalaru ekhalelo eniipurula.

⁴⁵ Miyo ti Yave ookhumihaleni wExipitu weera kikhale Mulukwaanyu; tivawo: mukhaleke ootteela niwoko Miyo ti Ootteela.

⁴⁶ Iya ikano mwaha wa axinama, ipalame, ikhalelo sootheene siri mmaahini ni seiyo siniipurula.

⁴⁷ Mwaakawanyihe axinama ootteela ni oohitteela; yaawo mutthuniheriwaanyu waakhuura ni ohaakhuura.’”