Levitiku 1 - Emakhuwa Bible

Ekhalelo ya sooveleela soohisa

¹ Yave aamwiitthana Moisesi anuuluma ni yoowo Muheemani mwa Muthukumano. Aamweerela:

² “Mwaaleele aYixrayeli ha: ‘Yoole aneera ampakele Yave yooveleela, aruuheke ntoko yooveleela mwaamunama a imombe hoye hoye ikhondoolo.

³ Yooveleela yakhala yoohisa, mutthu owo amuruuheke mwaamunama mulopwana oohirakala. Owo amuruuheke vamulako wa Eheema ya Muthukumano* weera aakhuleliwe ni Yave.

⁴ Owo iikaathiki ntatanawe vamuru wa mwaamunama a yooveleela yoohisa, ni eyo enimwaakhuleliwa ntoko yoorehererela wiiwanana ni Yave.

⁵ Vano owo amwiiveke mwaamunama vamaithoni wa Yave ni asaserdoti*, anamwane asilopwana a Aharoni, erongheke ephome ni emisereke mipatta sootheene sa valtaarini* vamulako wa Eheema ya Muthukumano*.

⁶ Owo ampereke mwaamunama ni amuthikilaseke.

⁷ Asaserdoti*, anamwane asilopwana a Aharoni, epattiheke mooro valtaarini* ni ekukhumanyeke mooro owo.

⁸ Vahoolowaya asaserdoteene yaawo ethateke intthuri vamoha ni muru ni makhura vakhuunini siri vayikho valtaarini*.

⁹ Marupo ni nyetto sirapihiweke toko, ni musaserdoti* ahiseke sootheene iyo valtaarini*. Ti yooveleela yoohisa, yooveleela erehereriwe vayikho, yooveleela yoowunkhelaxa enimusiveliha Yave.

¹⁰ Yooveleela yakhala yooveleela yoohisa ya ikhondoolo, ekhalaka ekhondoolo hata epuri, mutthu owo amveleeleke mwaamunama oohirakala.

¹¹ Owo iiveliweke mpatta wa ottuttuwani wa altaari* vamaithoni wa Yave ni asaserdoti*, anamwane asilopwana a Aharoni, emisereke ephomaawe mipatta sootheene sa altaari*.

¹² Mutthu owo amuthikilaseke intthuri intthuri. Vano musaserdoti* athateke intthuri iyo vamoha ni muru ni makhura vakhuunini siri vayikho valtaarini*.

¹³ Marupo ni nyetto sirapihiweke toko, ni musaserdoti* aruuheke ntoko yoovaha ni ahiseke valtaarini*. Ti yooveleela yoohisa, yooveleela erehereriwe vayikho, yooveleela yoowunkhelaxa enimusiveliha Yave.

¹⁴ Yooveleela yakhala yooveleela yoohisa ya ipalame, owo aruuheke mwaansiya hoye hoye nikhinda.

¹⁵ Musaserdoti* amuruuheke mwaapalame, amuhiteke ni amuhiseke valtaarini*. Owo ahiyeke ephome ekhwalalelaka vaxirini ya altaari*.

¹⁶ Owo avenxeke ecohocoho ni seiyo siri mwemmo, avonyereke mpatta ninkhuma nsuwa wa altaari* enriheliwaayawo ettuura.

¹⁷ Owo amuthaleke mwaapalame eriyariru ahimukawanyiheke, ni vano musaserdoti* amuhiseke vayikho vakhuunini mooro ovarelaka. Ti yooveleela yoohisa, yooveleela erehereriwe vayikho, yooveleela yoowunkhelaxa enimusiveliha Yave.