Icipo 83 - Emakhuwa Bible

Ecipo ya Asafi.

¹ Ii! Muluku, muhimaale; muhipwaherere muhuulumaka ni muhikhale ntoko oohiiwa.

² Moone moota amwiittanaanyu anramaramaaya; moota awosa anoovaanyaayani.

³ Awosa amvaanelela mulokwaanyu ni miruku; antthunaxa waapakela soonanara yaale ari oothanliwaanyu.

⁴ Awosa aneera: “Nrowe, nimalamalihe muloko ola weera nsina na oYixrayeli nihiiwanyeyetho.”

⁵ Amvaanelela ni murima mmoharu; angwiiwananelani Nyuwo,

⁶ yiiraanakano iheema sa awEdomi, aYixmayeli, aMowabi ni aHageriti,

⁷ aGebali, awAmoni ni awAmaleki vamoha ni amaki a oFilistiya ni oTiro.

⁸ Mpakatho atthu a wAsiriya ti a mpattaaya eruuhelaka ikuru ekhapira ya Loti. Sela*

⁹ Mwaapakele yaawo seiye mpakenlaanyu oMidiyani; ntoko mumpakenlaanyu Sisera ni Yabini omoolokoni Kixoni,

¹⁰ mwa yaale yaakhwenle wEnidori, ethatuwaka ethaadyira vatthayani.

¹¹ Mwaapakele maneethaaya yeeyo mwaampakenlaanyu Orebi ni Zehebi; mwaapakele anamwane a mwene yeeyo mwaampakenlaanyu Zeba ni Zalemuna,

¹² mwa yaawo yeenre: “Nrowe nikuxe moocihamo mwa Muluku.”

¹³ Ii! Mulukwaaka, mwaapake ntoko ihalahala, ntoko makamba amvavihiwa ni epheyo.

¹⁴ Mooteene yoowo mooro onghisaaya othako hoye hoye malumaaya amvarelaaya mpaka mmwaako,

¹⁵ mwaattharelele hiihotho ni etthekwaanyu ni ngwoopopihe ni epheyowaanyu etokotoko.

¹⁶ Ii! Yave, ngwuulihihe muru weera atthu yaasaase Nsinananyu.

¹⁷ Awosa eyevihiwe ni yoopopiheye wa mahuku ootheene; eriheyeke ngwuuliheyeyani muru.

¹⁸ Mwaasuwelihe weera Nyuwo muniitthaniwa Yave, aani weera Nyuwo paahi ti Muluku a Musulusulu mweelaponi yootheene.