Icipo 82 - Emakhuwa Bible

Wa muhusiha a icipo. Ecipo ya Asafi.

¹ Ti Muluku oneemela mmuthukumanoni mutokweene; Owo onthoriha variyari wa ooweraxa.

² Mpaka yaakhani muneeraanyu ngwaakihe anamathowa mwaakhalelaka mpatta atakhali? Sela*

³ Ngwaakihe oohilipa ni akwaasuni; mpwatthe sootthuneya sa oohaawa ni oohasuliwa.

⁴ Ngwoopole oohilipa ni oohaawa; mwaavuluxe mmatatani mwa atakhali.

⁵ Awosa khaansuwela hata khaaniiwexexa etthu. Aneetta mpiphini; mathipelo ootheene a elapo ya vathi aatetereya.

⁶ Keenre: “Nyuwosa ti ‘miluku’; ootheene nyuwo ti anamwane a Muluku a Musulusulu.”

⁷ Vaheera nyuwosa munimookhwa ntoko onkhwelaawe mutthu; munoomora ntoko ommorelaawe akhalaru namalamula.

⁸ Ii! Muluku, mvenyeke; muthorihe elapo ya vathi, niwoko miloko sootheene ti sawinyu.