Icipo 80 - Emakhuwa Bible

Wa mutokweene a icipo, yiipiwa ettharihiwaka ecipo eniitthaniwa Ethutu ya wiiraana. Ecipo ya Asafi.

¹ Ii!, Mukukhuli a oYixrayeli, muniiwe – Nyuwo muninghoolela Yoseefe ntoko muhuwo; Nyuwo munkilaathi vahiceni ya emwene variyari wa akerubini* – moonihere ovuwawanyu

² ohoolo wa Efrayimi, Benyamini ni Manaxe. Mvenyererihe ikurusanyu; ngweeke ni munivuluxe.

³ Ii! Muluku, munirehereretho; moonihere murimaanyu wooreera weera nivuluxiwe.

⁴ Ii! Yave Muluku a ikuru sootheene, mpaka yaakhani isarasanyu sineeraaya sipattele mavekelo a mulokwaanyu?

⁵ Moociha mulokwaanyu ni sooca sa maithori; moowuriha ekoomixi ya maithori.

⁶ Moonikhaliha oohiiwanana ni aximwaattamanaahu ni amwiittanaahu anninitheya.

⁷ Ii! Muluku, munirehereretho; moonihere murimaanyu wooreera weera nivuluxiwe.

⁸ Mwaaruuha evideira* wExipitu; mwaahoomola miloko, munaphatteya owo.

⁹ Mwaarehererela woophatteya, mwiri owo woophuwa mikwankhwaari sinasareya mulaponi.

¹⁰ Nyaako saakhuneeliwano munttuusaaya ni nyiri sitokotoko sa oLibanu ni iphandisaya.

¹¹ Iphandisaya saaphiya mpaka ophareiya ni soophuwasaya mpaka omoolokoni Efratesi.

¹² Mphwatenleni ixirisaya mutthuniheraka weera ootheene amvirawo erukule iwuuvasaya?

¹³ Aphako a moothakoni annanariha mwiri owo ni soopattuxiwa sa ntuphini sinnacawo.

¹⁴ Ii! Muluku a ikuru sootheene, muhokoleele wa hiyo. Ngwehawehe wiirimu ni moone. Mukosoope mwiri ola wa iwuuva*,

¹⁵ nkwankhwaari ophatteiwale ni ntatananyu noolopwana, aani munkosoope mwaana mulopwana mmunnunghalaanyu.

¹⁶ Mwiraanyu wa iwuuva* wohuuhiwa; woohisiwa ni mooro; mulokwaanyu wooriheya niwoko na ohiihawanyu.

¹⁷ Mmwiikaathere ntatananyu mulopwana ori moonowaanyu woolopwana, mwaana a mutthu mwiixununghenraanyu.

¹⁸ Vano hiyo khanirwa nihapuwa wa Nyuwo; munirehereretho ni nnimwiitthana Nsinananyu.

¹⁹ Ii! Muluku, munirehereretho; moonihere murimaanyu wooreera weera nivuluxiwe.