Icipo 78 - Emakhuwa Bible

Ecipo ya Asafi. Ecipo ya miruku.

¹ Ii! Mulokwaaka, mwiiwe nihusihonaka ni masu a eyanowaaka.

² Kinoohula eyanowaaka kuulumaka mmaphwanaphwanihoni; kinimwaala ithale sa khalayi –

³ seiye niiwalaahu ni nixuttenraahu; seiye asitithihu yaanithalihenraaya.

⁴ Khanaakhuwa anamwaniihu; ninoothalihera ekhapira ya muhoolo miteko soottottopeleya sa Yave – ikurusawe ni sootikhinihasawe aapankaawe.

⁵ Aahaavaha ikano anamwane a Yakobe ni aakhaliha Nlamulo oYixrayeli, mwa nne naalamulela makholowaahu weera yaaxuttihe itthusene seiye anamwanaaya.

⁶ Hiiho ekhapira ya muhoolo enoosuwela Nlamulo nna – mpakatho anamwane eneera eyariwe, ni awosa wa mpattaaya, yaathalihere anamwanaaya.

⁷ Vano awosa eniyeereke omuroromela Muluku ehittiwalaka mitekosawe, mene yiiwelelaka malamulowaawe.

⁸ Awosa kheekhala ntoko makholowaaya – ekhapira yoottiyamaaru ni yoovaanya; muloko wa murima woohimuroromela Muluku; atthu a okumi woohimutthara Yoowo.

⁹ Asilopwana a wEfrayimi, yaarookuxaru nyuupa, yaatthawa munihukuni na ekhotto.

¹⁰ Awosa khayiiwelenle wiiraana wa Muluku ekhoottaka otthara entthuneya munlamulonimwawe.

¹¹ Yaattiwala seiye Muluku aapankaawe; sootikhiniha oonihenraawe.

¹² Owo aapaka sootikhiniha vamaithoni wa makholowaaya wExipitu, elapo ya oZowaani.

¹³ Owo aakawanya ephareiya weera awosa evire; aapakiha weera maahi yeemele ntoko exiri.

¹⁴ Aahaahoola ni nihutte othana ni ngwaarani wa mooro ohiyu.

¹⁵ Aamutotoxa mwala munikareni, anaavaha maahi oowaattaxa ntoko a mphareiyani.

¹⁶ Aakhumiha maahi vamwala oovira ntoko nyooloko.

¹⁷ Vaheera yannapwaherera omutthekela, emvaanyaka Muluku a Musulusulu munikareni.

¹⁸ Awosa yaamoota murima Muluku mwayiini emunyesererihaka sooca yaatthunaaya.

¹⁹ Yaamukhupanya Muluku yeeraka: “Weeraka Owo onoowera onirehererela yooca munikareni?”

²⁰ Ettiitthu Owo aammanaawe mwala, yaakhuma maahi oowaatta. Weeraka onoowera onivahatho yooca? Onoowera ovaha mulokwaawe inama?”

²¹ Yave awiiwakaru, aanyoonyaxiwa; aahaarumihela anamwane a Yakobe mooro, ni isarasawe saahaapattela aYixrayeli,

²² yeenre yahimuroromelaka Muluku, hata yahaakhelaka ovuluxawawe.

²³ Wa soothesene, Owo aalamulela mahutte, anahula milako sa wiirimu.

²⁴ Aarupihela muloko emana* wiirimu weera oce; aavaha yooca ya wiirimu.

²⁵ Atthu yaahooca sooca sa andyelo*; aahaarumihela sooca soowaattaxa.

²⁶ Ari wiirimu aarumiha epheyo yaaweela ninkhuma nsuwa anahoola epheyo ya ohitto ni ikurusawe.

²⁷ Aawuukelela enama ntoko ntthupi; ipalame soowaatta ntoko muhaava wa mukerekhere wa ephareiya.

²⁸ Aamoroxela waakonelingwe mukhwipi wa iheemasaya.

²⁹ Awosa yaahooca mpaka ovonaxa, niwoko Owo aahaavaha yeeyo yaatthunaayaxa.

³⁰ Vaheera awosa ehinaaye ovona, sooca nlelo siri mmwaano,

³¹ isara sa Muluku saahaaluttuwela; Owo aawiiva atthu oolipaxa variyariwaya, eyo tiiyo amiravo a aYixrayeli.

³² Hata hiiho, yannapwaherera ottheka; aaroopakaru sootikhiniha sincipale, khayaamuroromenle.

³³ Tivawo aapakinghaawe mahukwaaya weera eciphe ntoko iphumu ni yaaviriha iyaakhasaya ngwoovani.

³⁴ Khula emaara Muluku aattaruxelaawe okhwa, aYixrayeli ti yaapaceraaya omwaasaasa emuhokoleelakatho ni nthiti.

³⁵ Yannuupuwelela weera Muluku aari Mwalaaya ni weera Muluku a Musulusulu aari Mvuluxaaya.

³⁶ Vaheera ohoolo vakhaani awosa yannapacera omweepesa, emulokotthaka ni malumaaya.

³⁷ Mirimasaya khasaamukhalela ekhaikhai ni khayaaroromeleiye ni wiiraanawawe.

³⁸ Hata hiiho aahaamorela ikharari; aahaalevelela sootthekasaya ni khaaphwata. Emaara ti emaara annahuluxa isarasawe ni khaanyoonyeriwa.

³⁹ Aahuupuwelela weera yaari atthu paahi ankhwa; epheyo emvira woohihokolowa.

⁴⁰ Imaara sincipale yannamuvaanya munikareni, emuthananihaka mweelaponi ya meekhaaya!

⁴¹ Imaara imaarasene yannamoota murima Muluku, emutannyaka Ootteela a oYixrayeli.

⁴² Khayuupuwelela ikurusawe – ehuhuweene yeele aawooponlaawe mmatatani mwa anamahasula;

⁴³ nihuku nenenenne oonihenraawe ineneerosawe sootikhiniha wExipitu; mitekosawe sooweraxa oZowaani.

⁴⁴ Owo aatatuxa nyoolokosaya ni maxaapwaaya ephome; khayaawenre owura maaheene yaale.

⁴⁵ Aahaarumihela nasope a amunkaanga mwa yaale yaalumakanse ni anaphulu mwa yaale yaaphwante.

⁴⁶ Aahinnyerera soohephasaya misoope; sooruwera wa okuukule.

⁴⁷ Aaphwata imattasaya sa iwuuva* ni maralala ni nyirisaya sa ifiigu sa ntuphini ni ihuhu sooriiraxa.

⁴⁸ Aahinnyereratho mihuwosaya maralala ni sookukhulasaya overinya.

⁴⁹ Aahaakuruxela isarasawe sitokotoko, onyoonyiwawawe, othananawawe ni owiittawawe aarumihelaka nakupa a andyelo oophwata.

⁵⁰ Aarehererela isarasawe ephiro; khaawuurenle mookhwaani mene aahaaruuhela mahooxo.

⁵¹ Aahiiva matthaara ootheene a wExipitu; ooyariwa oopacera asilopwana a mmaheemani mwa Hami.

⁵² Vaheera aakhumiha mulokwaawe ntoko muhuwo; ahoolelaka ntoko ikhondoolo munikareni.

⁵³ Aaweettiha oolipeene moota wooweera khayoova; vaheera ephareiya yaahaakhuneela amwiittanaaya.

⁵⁴ Hiiho aarongha mulokwaawe omwiinanoni wa elapwaawe yootteela; mweelaponi ya nyaako ntatanawe noolopwana naakuxalaaya.

⁵⁵ Aahoomola miloko saakhalamo avahaka mulokwaaya ilaposaya ntoko yoohiyeriwa; aapakiha weera ipuumba sa oYixrayeli siitekihemo mmaheemanimwaya.

⁵⁶ Vaheera yaamoota murima Muluku emvaanyaka a Musulusulu; khayiiwelenle ikanosawe.

⁵⁷ Yaari oohiroromeleya ni ohiiwelela ntoko makholowaaya, yaapirituwa ntoko muupa woohimuteko.

⁵⁸ Yaamunyoonyiha ni mattumuxa ooteeliheriwa miluku sikina; yaamutannya ni milukusaya sikina.

⁵⁹ Muluku asuwelakaru yeeyo, aahaanyoonyeraxiwa woomalela anakhootto a muloko wa aYixrayeli.

⁶⁰ Aahiya etabarnaakulu oXilo – eheema ele aakungaawe eriyari ya atthu.

⁶¹ Aawinnyerera Arka* a ikurusawe mootthukiwani; ovuwawawe mmatatani mwa amwiittana.

⁶² Aatthunihera mulokwaawe wiiviwa ni ekatana, niwoko aanyoonyeriwa yoohiyeraawe.

⁶³ Mooro waahaahisa amirawaaya ni aximwalaaya khayiipeliwe icipo sa okwatti;

⁶⁴ asaserdotaaya yaahiiviwa ni ekatana ni asinaamukhwelaaya khayaawenre wiinla.

⁶⁵ Vano Yave aavenya ntoko mulipa ookona; ntoko mulopwana omvenya ahapaliweene eviinyu.

⁶⁶ Aahaawina amwiittanaawe; awuulihihaka muru wa mahuku ootheene.

⁶⁷ Vahoolowaya aakhootta iheema sa Yoseefe; khaathanlale epuumba ya Efrayimi;

⁶⁸ Ohiyanawaya aathanlale epuumba ya Yuda ni mwaako oSiyoni, mwa yoowo aasivenlaawe.

⁶⁹ Aateka Nipuronawe Nootteela* noorakamela ntoko erimu, ntoko elapo aakhalinghaawe wa mahuku ootheene.

⁷⁰ Aamuthanla murumeiyaawe Davide, anamurongha munikhoolani na ikhondoolo;

⁷¹ aamvenxa aakukhulaawewo ikhondoolo weera akhale mukukhuli a Yakobe mulokwaawe; a Yixrayeli, yoohiyeraawe.

⁷² Vano Davide aakosoopa yoowo ni murima woororomeleya; aahoolela moota wooweraxa.