Icipo 72 - Emakhuwa Bible

Ecipo ya Salomoni.

¹ Ii! Muluku, mungwarihe mwene ororomeleyawanyu; mwaana a mwene ni ekhaikhaiyaanyu

² weera owo athorihe mulokwaanyu mweekhaikhaiyini ni aathorihe oohasuliwaanyu moota woororomeleya.

³ Nyaako siruuhele mpuha muloko ni mattumuxa eruuhele soowiima sa ororomeleya.

⁴ Owo onnimwaakiha oohasuliwa variyari wa muloko ni onimwaavuluxa anamwane a oohaawa; onoomphwata namahasula.

⁵ Owo ooviwe nsuwa noopaka ni mweeri waaraka wa ikhapira sootheene.

⁶ Owo akhaleke ntoko epula enrupela mmatta yoohemphwa; ntoko epula etokweene ennaaniha etthaya.

⁷ Mmahukunimwawe oororomeleya anoottuva ni weetteleya nnene onimwaatta mpaka ommaleloni wa mweeri.

⁸ Owo onoolamula khula ephareiya ni okhuma mooloko Efratesi mpaka ekotenle elapo.

⁹ Ipuumba sa munikareni sinoomukokhorela ni amwiittanaawe anoomorela vathi.

¹⁰ Mamwene a oTaresisi ni a iphareiya soorakamela anoomuruuhela soovaha ni hiihotho mapwiyamwene a oXeba ni a oSeba.

¹¹ Mamwene ootheene anoomukokhorela ni miloko sootheene sinoomurumeela.

¹² Vano Owo onoowoopola oohaawa yaale amvekela ekhavihero; oohasuliwa yaale ahirino oowaakhavihera.

¹³ Owo onaamorela ikharari yaale oohilipa ni oohaawa ni onoowoopola oohaawa mookhwaani.

¹⁴ Owo onoowoopola moohasuliwani ni munipuheroni, niwoko okumaaya ti wootthuneyaxa vamaithoniwawe.

¹⁵ Owo akhaleno okumi woowaatta! Eyuuma yoorikaxa ya oXeba avahiweke. Atthu emvekelele woohihiyerereya ni emureeliheke mahiku ootheene.

¹⁶ Etrigu yaatte mweelaponi yootheene – mpaka mmatthomelani mwa mattumuxa; soowiimasaya sittuve ntoko sa oLibanu ni ntoko malaxi a ntuphini.

¹⁷ Nsinanawe nipwaherereke wa mahuku ootheene ni epilaawe elekele nsuwa noopaka. Miloko sootheene sinooreelihiwa mwa yoowo ni awosa anoomweerela ooreelihiwa.

¹⁸ Yave Muluku, Muluku a oYixrayeli attottopeliwe, niwoko Owo paahi ompaka itthu sootikhiniheya.

¹⁹ Nsinanawe noovuwa nittottopeliweke wa mahuku ootheene; elapo yootheene esareyeke ni ovuwawawe. Ame* ni Ame*.

²⁰ Mpaka va mavekelo a Davide, mwaana mulopwana a Yixai.