Icipo 62 - Emakhuwa Bible

Wa muhusiha a icipo. Ecipo entthara moota woowiipa oniitthaniwa “Yedutuni” Ecipo ya Davide.

¹ Mwa Muluku paahi okumaaka onimwiitthuuwa; ovuluxiwawaka onrweela wa Yoowo paahi.

² Ti Owo paahi Mwalaaka ni Ovuluxiwawaka. Owo ti Olipawaka – nkirwaru kittikinyiwa.

³ Mpaka yaakhani muneeraanyu mukiwaneno, ootheene etthunaka okiiva – miyo kiri ntoko exiri yoothetemana ni ntoko etthu yootekeleliwa ehaleelaka omora?

⁴ Awosa antthunaxa okikuruxa vanipuroniwaka na osulu; awosa anghakalalela soowootha. Anreeliha ni iyanosaya, mene anlapha ni soowuupuwela. Sela*

⁵ Okumaaka, mwiitthuuwe mwa Muluku paahi; owehererawaka onrweela mwa Yoowo.

⁶ Ti Yoowo paahi Mwalaaka ni Ovuluxiwawaka. Owo ti Olipawaka – nkirwaru kittikinyiwa.

⁷ Ovuluxiwawaka ni ottittimiheyawaka onrweela wa Muluku; Owo ti Mwalaaka oolipa ni Wootthawelawaka.

⁸ Ii! Muloko, munroromele Yoowo mahuku ootheene; mmoonihere mirimasanyu sootheene, niwoko Muluku ti Wootthawelawahu.

⁹ Atthu a murima woowiiyeviha anlikana ni iphumu paahi; maneethi anlikana ni wootha. Awosa ootheene yaaphimiwaka vamiringoni, olemelawaya khoomphiyera vaphumuni.

¹⁰ Muhiroromele waahasula akina naari muhiixoone mwa itthu soowiiwa. Saandyeerereya mihakhusanyu, muhiroromele seiyo.

¹¹ Muluku aahuuluma, ni miyo kohiiwa nnenesene: Owera ti wawawe.

¹² Osivela woororomeleya ti wawinyu, Nyuwo, Yave. Vekhaikhai khula mutthu munoomutthuvela yeeyo omphwanelaawe.