Icipo 61 - Emakhuwa Bible

Wa muhusiha a icipo ni ikaruma sa mikhoyi. Ecipo ya Davide.

¹ Ii! Muluku! Mwiiwe wiidyoonttelelawaka ni nivekelonaka.

² Okhuma ekotenle elapo kingwiitthanani Nyuwo ni murima woovalaveleya. Mukihoole wa mwala ori woorakamaxa okipwaha miyo.

³ Nyuwo muri wootthawelawaka; Nipuro Noolipaxa nootthawelamo wa amwiittana.

⁴ Kintthuna okhala muheemanimwanyu wa mahuku ootheene, kitthaweleka ngwaakihiwani wa mapuphaanyu. Sela*

⁵ Ii! Muluku! mohiiwa soororomelihasaka; mookivaha yoohiyeriwa ya yaale anoova Nsinananyu.

⁶ Mpwahererihe mahuku a okumi wa mwene weera akhale ni okumi iyaakha ni iyaakha.

⁷ Owo akilaathiki vahiceni ya emwene vamaithoni wa Yave wa mahuku ootheene. Murumihe osivelawanyu ni ororomeleyawanyu weera onkhapelele.

⁸ Vano kinoottottopela Nsinananyu wa mahuku ootheene, kikwaniheraka soororomelihasaka khula nihuku.