Icipo 59 - Emakhuwa Bible

Wa muhusiha a icipo. Ecipo entthara moota woowiipa oniitthaniwa “Muhiphwate.” Ecipo ya Davide eniitthaniwa Mikitami*.

¹ Ecipo ela yaalempwale ehuhuweene yeele Sawuli aaruminghaawe atthwaawe owehaweha vaate wa Davide weera emwiive. Ii! Muluku, mukoopole mwa amwiittanaaka; mukaakihe mwa yaale ankiwanano.

² Mukoopole mwa atakhali ni mukivuluxe mwa anamwiiva.

³ Moone moota awosa ankithurumelaaya! Atthu oowuuma murima ankivaanelela kiroohipahularu naari kiroohitthekaru.

⁴ Nkipanke etthu yoonanara; hata hiiho awosa antthuna okiwanano. Mvenye weera mukikhavihere ni moone moota kiraaka!

⁵ Ii! Muluku a ikuru sootheene, Muluku a aYixrayeli, mvenye weera muttaruxe miloko sootheene. Muhaamorele ikharari anamavariha oonanara. Sela*

⁶ Awosa anghokolowa oxekuwa ewuwaka ntoko alapwa eviraviraka musidade.

⁷ Moone soowoopopiha sinkhuma mmwaanomwaya – iyanosaya siri ntoko ikatana yeeraka: “Taani anaaniiwe?”

⁸ Vaheera Nyuwo, Yave, munimwaatheya, munoonyemula miloko sootheene seiye.

⁹ Ii! Ikurusaka, kinimoowehererani; Nyuwo, Muluku ti wiixaakihawaka.

¹⁰ Ii! Mulukwaaka oororomeleya, Owo onimoorwa wa miyo ni onootthunihera weera kaawine amwiittanaaka.

¹¹ Wa soothesene, muhiwiive yaale, Yave, Yoowiixaakiheraahu, weera mulokwaaka ohittiwale. Mukurunimwanyu mwaamwaramwaxe ni mwaavonye.

¹² Awosa evariweke ngwiixoonanimwaya niwoko na soottheka sa iyanosaya ni na maswaaya oonanara. Niwoko na soolaphasaya ni soowoothasaya

¹³ mwaalalihe musaranimwanyu; mwaalalihe mpaka ehooneyetho. Hiiho enimwiiwanyeya mweelaponi yootheene weera Muluku onlamula oYakobe. Sela*

¹⁴ Awosa anghokolowa oxekuwa ewuwaka ntoko alapwa eviraviraka musidade.

¹⁵ Amviravira yaasaka sooca ni yaahivona, ankhuwela ohiyuweene owo.

¹⁶ Vaheera miyo kinimwiipa sa ikurusanyu; oxeexelo kinimwiipa sa osivelawanyu, niwoko Nyuwo ti Olipawaka ni Nipuronaka nootthawelamo mweehuhuni ya makacamiho.

¹⁷ Ii! Ikurusaka, kinimootthapelani; Nyuwo, Muluku ti Olipawaka ni Mulukwaaka onkisivela.