Icipo 50 - Emakhuwa Bible

Ecipo ya Asafi.

¹ Yave, Muluku ooweraxa, onuuluma alattulaka elapo ya vathi okhuma ninkhuma nsuwa mpaka ninkelaayawo.

² oSiyoni, ophwaneliwa wookwanela, Muluku onnaaraxa.

³ Mulukwaahu onimoowa ni khamaala; mooro omvarela ohoolowawe arukureeriweene ettheku.

⁴ Oniitthana wiirimu osulu ni elapo ya vathi weera athorihe mulokwaawe:

⁵ “Mwaathukumanyihe ohoolowaka oororomeleyaaka, nyuwo mumpaka wiiraana ni Miyo, mookipakelani sooveleela.”

⁶ Wiirimu onlaleiya ekhaikhaiyaawe, niwoko Muluku muneenaawe ti Mphuki. Sela*

⁷ Mwiiwe mulokwaaka niwoko kinimuuluma; mwiiwe oYixrayeli ni kinimookhalelani onamoona: Miyo ti Muluku, Mulukwaanyu!

⁸ Nkinoohiihani niwoko na sooveleelasanyu naari sooveleelasanyu soohisa mwa seiyo munkiveleelelaanyu mahuku ootheene.

⁹ Nkinghaawela emombe elopwana naari ipuri sa munikhoolanimwanyu,

¹⁰ niwoko asinama ootheene a mutuphini ti awaka nitho mihuwo sa mmattumuxani oohaalikeleya.

¹¹ Koosuwela ipalame sootheene sa mmanyaakoni ni soopattuxiwa sootheene sa ntuphini ti sawaka.

¹² Kaavoliwe etala, nkooleelani niwoko elapo ya vathi ni sootheene sirimo ti sawaka.

¹³ Weeraka Miyo kinookhuura imombe hoye hoye kinoowura ephome ya ipuri?

¹⁴ Mumpakele Muluku sooveleela sootthapela, mukwanihere soomuroromelihasanyu a Musulusulu.

¹⁵ Mukikhuwelele nihuku na othanana – Miyo kinoowopolani ni nyuwo munookittittimiha.

¹⁶ Vaheera wa atakhali Muluku oneera: “Khoontthunihereya weera nyuwo mulaleiye malamulowaaka naari muulume sa wiiraanawaka.”

¹⁷ Nyuwo munthanya soolakasaka mureraka ettuli maswaaka.

¹⁸ Mwaamoonaka namwiiya, munoomutthara; muniithukumanyiha ni anamararuwa.

¹⁹ Mumvarela muteko eyanowaanyu wuuluma soonanara ni muneettiha nuulumonanyu weera mulokotthe.

²⁰ Emaara ti emaara mummuuluma munninyu, mmwaapaka munninyu xaxaxa.

²¹ Moopaka sootheene iyo ni koomaala. Muupuwela weera Miyo kinoolikana ni nyuwo, mene kinimoohiihani ni kinimoothorihelani ttunda-ttunda.

²² Muupuwele sa seiya, nyuwosa munimuttiwala Muluku. Ohiyanawaya kinimoophwatani woomalela, ahikhalaka oowoopolani.

²³ Yoole ompaka sooveleela sootthapela onkittittimiha Miyo ni owo onreherera ephiro weera kimoonihere ovuluxa wa Muluku.