Icipo 39 - Emakhuwa Bible

Wa mutokweene a icipo; Ecipo ya Davide wa Yedutuni.

¹ Keenre: “Kinoowehaweha mweettelowaaka ni nkinttheka ni maswaaka. Nkuuluma etthu atakhali ereene mukhwipimwaka.”

² Wa soothesene, kaaraaka emaalelo kihuulumakaru etthu, othananawaka waamutepa.

³ Murimaaka waamukivava. Miyo kitthokelelaka, waamutepa okivava. Vanonto kaapacera weera:

⁴ “Ii! Yave, mukoonihere ommaleloni wa okumaaka ni mahuku mahai ahanle; mukisuweliheke moota omviraaya okumaaka.

⁵ Waatta wa okumaaka ori vakhaani; mahuku a okumaaka khaveetthuwo vamaithoniwanyu. Vekhaikhai okumi wa mutthu onlikana ni ngwiya paahi.

⁶ Mutthu omvira, anahokolowa ntoko munttuusi paahi. Owo ontthukhuruwa siiyo athukumanyihaka mihakhu, mene khansuwela taani anaahaleno.

⁷ Mene vano Yave, kiwehererekeni? Ororomelawaka ti mwa Nyuwo.

⁸ Mukivuluxe mwa sootthekasaka sootheene; muhaahiye alolo ekitthebwaka.

⁹ Kiri emaalelo, kihihulaka eyanowaaka, niwoko ti Nyuwo mpanke yeeyo.

¹⁰ Mvenxeke wa miyo ohoxawanyu; koomoroxiwa ni okimanawanyu.

¹¹ Nyuwo munaattaruxa ni munaalaka atthu niwoko na sootthekasaya; mumphwata mihakhusaya ntoko tthumpwiha – mutthu onlikana ni ngwiya paahi.

¹² Mwiiwe nivekelonaka Yave; mwiiweke okhuwelelawaka ekhavihero. Muhimaale miyo kiinlaka. Vano kiri ntoko namarwaanyu omvira – ntoko yaaraaya makholowaaka.

¹³ Muhuluxe maithwaanyu wa miyo weera kihakalaletho kihinaaye miyo opwaha kihooneyaka.”