Icipo 35 - Emakhuwa Bible

Ecipo ya Davide.

¹ Ii! Yave! Mukaakihe wa yaale ankoothera; mwaawanane yaawo ankiwanano.

² Mukuxe exikudwaanyu ekhaanene ni etokotoko; murwe, mukikhavihere.

³ Mwaatheteele nivakananyu nikhaani ni ntokotoko yaale ankittharatthara; mweerele okumaaka: “Miyo ti ovuluxiwawanyu.”

⁴ Yaale anaasa okumaaka yuulihiheye muru ni enyoosiwe. Yaale ankivaanelela okiphwata ehokoloweke yuulihiheiyeene muru.

⁵ Awosa ekhaleke ntoko makamba amvavihiwa ni epheyo, ndyelo a Yave aawoomolaka.

⁶ Ephirowaaya ekhaleke yoowiilihana ni yootherera, ndyelo a Yave aattharattharaka.

⁷ Nkaapakela yoonanara, hata hiiho aakireya muraakho woowiipithiheya; kiroohikhalanaru nthowa, aathipa nlitti weera kimorelemo.

⁸ Ophwata waaphwanye wootutuxereya; epharihiwe munraakhonimwaya ni emorele vanlittini athimpaaya, weera ephwateye.

⁹ Vano okumaaka onoomuhakalalela Yave okitteelaka murima niwoko na ovuluxawawe.

¹⁰ Kinoolaleiya ni okumaaka wootheene: “Khawowo onlikana ni Nyuwo, Yave. Nyuwo mungwoopola oohaawa wa yaale oolipaxa waapwaha yaawo; aani mungwoopola oohaawa ni oohooxiwa wa yaale angwiiyera.”

¹¹ Anamoona oonanara murima ankeemelela; awosa ankikohakoha sa itthu kihisuwenlaaka.

¹² Awosa ankaakakhanyihera yooreera ni yoonanara; miyo kihanle ttewu.

¹³ Vaheera, awosa yaavoreiwaaya, miyo kaawarela sa olalamika, kiiyevihaka ni otthuka, kaavekelelaxaka.

¹⁴ Kaahaalalamikela ntoko yaari asinthamwenaaka hoye hoye axunnaka. Kaathananaxa ntoko kaalalamikela amayaka.

¹⁵ Wa soothesene, miyo kikwattuliwakaru, awosa yaathukumana ni ohakalala. Miyo kihisuwelaka yaathukumana weera ekiwaneno. Woohihiyerera awosa yannakuuluma.

¹⁶ Yaakitheya ni murima woonanara; ntoko alavilavi enakikhuurihela maino.

¹⁷ Ii! Yave, mpaka yaakhani mpwahereraka oweha paahi? Moopole okumaaka mwa okiwananawaya; aani okumaaka woosiveleya mwa amwatto ale.

¹⁸ Kinoottottopelani munthukumanoni mutokotoko; kinootthapelani variyari wa atthu ancipale.

¹⁹ Ehitheye wuuliheyawaka muru amwiittanaaka oovariha; muhitthunihere weera yaale ankithanya kihinthowa, ekiwehe ncerekhule.

²⁰ Awosa khaanuuluma mmuretteleni, mene anaavaanelela soowoothera soowootha yaale ankhala oomaaleene mweelaponi.

²¹ Awosa ankiweha yeeraka: “Ahe! Nohoona ni maithwaahu!”

²² Ii! Yave, mohoona yeeyo; muhikhale emaalelo. Yave muhikirakamele!

²³ Mvenye ni mweemele weera mukaakihe! Ii! Mulukwaaka ni Apwiyaaka, mwaakihe mulattwaaka.

²⁴ Ii! Yave Mulukwaaka, moororomeleyanimwanyu moonihere ohikhalanawaka nthowa; muhaahiye ekitheyaka.

²⁵ Muhaahiye yuupuwelaka: “Ahe, ti yeeyo naatthunaahu,” hoye hoye eheere: “Noommaliha!”

²⁶ Erukureereye nyuru oowuulihiheyeene muru ootheene anghakalalela ohooxiwawaka. Epupurumiheye ni yuulihiheye muru ootheene aniixunnuwiha okipwaha miyo.

²⁷ Yaale anghakalalela ohikhalanawaka nthowa ekhuweleke ni ohakalala; awosa yeere mahuku ootheene: “Yave avuwihiwe, mwa Yoowo ontthuna weera murumeiyaawe akhale nnene.”

²⁸ Nluminaka nnuuluma sa ororomeleyawanyu ni ottottopeleyawanyu ehuhu yootheene!