Icipo 30 - Emakhuwa Bible

Ecipo eniipeliwa okhalihiwa wa Empa ya Yave. Ya Davide.

¹ Kinoovuwihani Nyuwo, Yave, niwoko mookikhumiha ngwiixerani, muhaatthuniheraka amwiittanaaka okitheya.

² Ii! Yave Mulukwaaka, koowiitthanani weera mukikhavihere ni mookilamiha.

³ Ii! Yave, mookikhumiha mmahiyeni ni mookoopola weera kihivolowe mookhwaani.

⁴ Mmwiipele Yave, nyuwosa ootteelaawe; mutthapele Nsinanawe Nootteela.

⁵ Vano isarasawe simpwaherera vakhaani paahi, vaheera murimaawe wooreera ompwaherera wa mahuku ootheene. Wiinla onoowereya opwaherera moohiyuni, mene ohakalala onoophiya oxeexelo.

⁶ Miyo koonakaru weera kiri oolipeene, keenre: “Nkirwatho kittikinyeya.”

⁷ Ii! Yave, mwaakireereliwaanyu kaari oolipeene. Vaheera mwiipithihalaanyu ekhovaanyu, kaatteenguwa.

⁸ Wa Nyuwo Yave koowiitthanani; koomukhuwelela Yave ekhavihero.

⁹ Kaphwatiwa, hoye hoye kakhwa, ewinelo heeni? Apaale ntthupi nnimootthapelani? Nno nnoolaleiya ororomeleyawanyu?

¹⁰ Mwiiwe Yave ni mukimorele ikharari; ii! Yave, mukhaleke ekhaviherowaaka.

¹¹ Wiinlawaka mootatuxa wiina; mookirula sa wiinanela, munakiwariha sa ohakalala.

¹² Vano murimaaka ongwiipelani ohimaalaka. Ii! Yave, Mulukwaaka, kinootthapelani mahuku ootheene.