Icipo 22 - Emakhuwa Bible

Wa mutokweene a icipo; yiipiwa ettharihiwaka ecipo eniitthaniwa Naahe a oxeexelo. Ecipo ya Davide.

¹ Mulukwaaka, Mulukwaaka, heeni mukihingyaanyu? Heeni munkhalaanyu ottai wa okivuluxa, muhipwatthaka maswaaka oowiikhupanyera?

² Ii! Mulukwaaka, miyo kinnakhuwela othana, mene khamunaakhula – moohiyuni, nkiniitthuuwa.

³ Hata hiiho Nyuwo ti Mwene Ootteela; ti Ottottopela wa oYixrayeli.

⁴ Makholowaahu yaahoororomelani Nyuwo; yaahoororomelani ni Nyuwo mwaawoopola.

⁵ Awosa yaahookhuwelelani ekhavihero, enavuluxiwa; yaahoororomelani enapwaneya.

⁶ Wa soothesene, miyo muungu, nkihiyono mutthu, koopuheriwa ni kooramusiwa ni atthu.

⁷ Ootheene ankoona anookitthebwa; awosa epukunyaka muru ankiruwana, yeeraka:

⁸ “Owo onimuroromela Yave – Yave amoopole. Owo amvuluxe eenre amusivela!”

⁹ Wa soothesene, Nyuwo mookikhumiha mmirimani mwa amayaka ni mookilipiha oomaaleleyeene miyo nlelo kaamwaaka.

¹⁰ Okhuma oyariwawaka kohinnyereriwa mmatatanimwanyu; kireene nlelo mmirimani mwa amayaka nyuwo mwaari Mulukwaaka.

¹¹ Muhikirakamele, niwoko othanana wookikhuveela ni khawowo ookikhavihera.

¹² Sookhala imombe ilopwana sincipale sinkirica; imombe ilopwana soolipa sa oBaxani sookirukureera.

¹³ Awosa ankaattamela ntoko mwatto oonyaanya oopaka murika.

¹⁴ Kimmiiniwa ntoko maahi ni makhuvaaka ootheene aakocakoca. Murimaaka woothatuwa nnyoma etothowelaka mmirimanimwaka.

¹⁵ Ikurusaka soomala ntoko nivali ni nluminaka nootthukana waahottokoroko. Nyuwo mookihiya muntthupini na okhwa.

¹⁶ Alapwa aakirica; atthu oonanaraxa aakirukureera; awosa aahoma matataaka ni inawosaka.

¹⁷ Ammooneya makhuvaaka ootheene. Atthu ankiweha ehikoonelakamo.

¹⁸ Aakawana soowarasaka epakelaka macitta ikuwosaka.

¹⁹ Vaheera Nyuwo, Yave, muhikirakamele; Ii!, Ikurusaka, murwe woowaakuveya weera mukikhavihere.

²⁰ Mukivuluxe wa ekatana; mutapuxe okumaaka kaakaraweliwaka ni alapwa.

²¹ Mukoopole mmwaano mwa amwatto ni wa manyaka a inari. Ni mookaakhula.

²² Kinimwaalaleera axunnaka Nsinananyu; mmuthukumanoni kinimoottottopelani.

²³ Nyuwo mummoova Yave, munttottopeleke! Nyuwo ekhapira yootheene ya Yakobe, munttittimihe. Mmoove, nyuwo ekhapira yootheene ya Yixrayeli.

²⁴ Owo khanramusa hata khaanyoosa oohaawa wa oohooxiwa; Khaamuhulungwe yoowo, mene ohiiwa okhuwelelawawe ekhavihero.

²⁵ Kinimoottottopelani mmuthukumanoni mutokotoko ni kinookwanihera soororomelihasaka vamaithoni wa yaale angwoovani.

²⁶ Oohaawa animooca mpaka ovona; yaale animwaasa Yave anoomuttottopela. Nyuwosa mukhaleke ni okumi mahuku mancipale!

²⁷ Atthu a elapo ya vathi yootheene anoomuupuwelela, ehokoleeleke wa Yave, ni imusi sootheene sa miloko sinoomukokhorela,

²⁸ niwoko omwene ti wa Yave ni Owo onlamula miloko sootheene.

²⁹ Anamapuha ootheene a mulaponi animooca ni anoottottopela. Ootheene eneera ehokoleele muntthupini anoomukokhorela – yaawo avithingwe.

³⁰ Anamwanaahu anoomurumeela Yave; ikhapira sa muhoolo nsileeliwe sa Yave.

³¹ Awo eniilaleere ororomeleyawawe muloko nlelo ohiyariwe, niwoko Owo ookwanihera yeeyo.’