Icipo 17 - Emakhuwa Bible

Nivekelo na Davide.

¹ Ii! Yave, mwiiwe mavekelowaaka ororomeleya ni okhuwelawaka; mwiiwe nivekelonaka, niwoko khaninrweela mmwaano moowootha.

² Mukipakele ekhaikhaiyaanyu; maithwaanyu yooneke yeeyo eri ya ekhaikhai.

³ Naari mootaka murimaaka ni mukiwehawehaka moohiyuni, hata mukisuwelaka nnenesene, khamuphwanya etthu yoottheka. Koolakela weera eyanowaaka kheettheka

⁴ ntoko ampakaaya atthu. Kittharaka maswaanyu, koosemba mweettelo wa anamapuhera.

⁵ Malipaaka anneetta mphironimwanyu oolipeene; inaawosaka khasinserenguwa.

⁶ Koowiitthanani Nyuwo, Muluku, niwoko munookaakhula. Mukipwatthe ni mwiiwe nivekelonaka.

⁷ Moonihere osivelawanyu otokotoko, Nyuwo mungwoopola ni ntatananyu noolopwana yaale anaasaasa ekhaviherowaanyu wa yaawo angwoopopiha.

⁸ Mukikosoope ntoko oosiveleyaxaanyu; mukiipithihe mmunttuusini mwa mapuphaanyu

⁹ wa atakhali ankiwanano; wa amwiittanaaka ankirica etthunaka okiiva.

¹⁰ Awosa ti a murima woowuumaxa ni eyanowaaya enuuluma moota woowiixoona.

¹¹ Awosa aakiphwanya ni vano aakirica ekiwehawehaka weera ekimoroxele vathi.

¹² Ari ntoko mwatto onghaawela ovara, ntoko mwatto mutokotoko iipithaka oolikaneene weera atuphele.

¹³ Mvenye, Yave! Mwaawanane ni mwaaphwate! Mukivuluxe ni ekatanaanyu mwa atthu oonanara.

¹⁴ Ii! Yave! Mukivuluxe mwa atthu ale; atthu a elapo ya vathi, mwa yaawosa nttuvelonaya nri mookumini ola. Nyuwo munaavoniha oosiveleyaanyu. Anamwanaaya asilopwana aavonaxa, yaahiyeraka anamwanaaya singhalahala.

¹⁵ Wa miyo – keenre kiroromeleya, kinimoona ekhovaanyu. Miyo kaavenyaka, kinoohakalala niwoko kohoona ekhalelowaanyu.