Icipo 147 - Emakhuwa Bible

¹ Munttottopele Yave. Moota onreeraaya wiipa icipo soomutthapela Mulukwaahu – ti wootthuneyaxa ni woophwaneleya!

² Yave onrasela oYerusaleemu; Owo onaathukumanyiha ooroihiwa wootthukiwani a oYixrayeli.

³ Owo onaalamiha a murima wootaphuwa ni onkosoopa makhwattaaya.

⁴ Owo ookhaliha waatta wa ithenyeeri, khula ethenyeeri ootteha nsinanaya.

⁵ Mutokweene ti Namalamulaahu ni ikurusawe ti soothukumeliha; khoongwereya ophima wiiwexexawawe.

⁶ Yave onaakhavihera oohasuliwa, mene onaamoroxela vathi atakhali.

⁷ Mmwiipele Yave ni icipo sootthapela; mmwiipele Mulukwaahu ni oruma wa icipo sa makita.

⁸ Owo onkuttelela erimu ni mahutte; onrupihela epula etthaya ni onunnuwiha malaxi mmattumuxani.

⁹ Owo onciha mihuwo ni axaana a anakhuku, awosa yiinlaka etala.

¹⁰ Yave khanghakalalela ikuru sa ikavalu* hata nyetto sa atthu;

¹¹ Yave onaahakalalela yaale ammoova; yaale anroromela osivelawawe woohimala.

¹² Ii! Yerusaleemu, munttottopele Yave; Ii! Siyoni, munttottopele Mulukwaanyu,

¹³ niwoko Owo onaalipiha anampattika a maselaanyu ni onaareeliha atthwaanyu ankhala mwa nyuwo.

¹⁴ Ti Yoowo ompwahereriha olipa nyiinanosanyu ni onaandyeerera etrigu yooreerela.

¹⁵ Onrumihela Nlamulonawe mulaponi, ni maswaawe antthimaka woowaakuveya.

¹⁶ Onkukuttha etthabwe ntoko mapururu a ikhondoolo ni ommwaramwaxa maralala ntoko ettuura.

¹⁷ Ommoroxa maralalaawe ntoko maluku. Khawowo ongwera ovilela oriirawaya.

¹⁸ Onrumiha nsunawe ni maralala anootothowa; Owo onrumiha epheyowaawe ni maahi anoopacera okhwalala.

¹⁹ Ommoonihera Nsunawe Yakobe; malamulowaawe ni ikanosawe wa Yixrayeli.

²⁰ Owo khampakelaru yeeyo miloko sikina; iyo khasisuwenle malamulowaawe. Munttottopele Yave.