Icipo 139 - Emakhuwa Bible

Wa mutokweene a icipo ni ikaruma sa mikhoyi. Ecipo ya Davide.

¹ Ii! Yave, Nyuwo mohoota murimaaka ni mookisuwela.

² Munsuwela kaakilaathiki ni kaavenyaka. Ottai ottai munoona soowuupuwelasaka.

³ Munsuwela miyo keettaka ni kiixaatalelaka; munsuwela nnenesene iphirosaka sootheene.

⁴ Maswaaka ehinaaye ophiya vanlumini, Nyuwo Yave, munnasuwela nnenesene.

⁵ Nyuwo munkikhikidyera mipatta sootheene munakiikaathera ntatananyu.

⁶ Soosuwela iya ti sootikhiniheyaxa ni sookivikana miyo – ti soowalamela kihimpixeeraaka.

⁷ Khoongwereya otthawa Munepaanyu. Khoowowo wootthawela weera kisembe okhalawanyu.

⁸ Miyo kawela wiirimu – mookhalawo; miyo kiixaatalela ngwiixerani – mookhalamotho.

⁹ Miyo kawela ni mapupha a ekamaama, miyo kamaka ekotenle ephareiya,

¹⁰ naari weiwo ntatananyu noolopwana nnookihoolela; nnookikhavihera.

¹¹ Naari miyo keeraka: “Vekhaikhai epiphi enookikuttelela ni waara onoothatuwa ohiyu mukhwipimwaka,”

¹² kinimoona weera mpaka epiphi kheeniilihana wa Nyuwo; ohiyu onaara ntoko othana, niwoko wa Nyuwo epiphi enkhala ntoko waara.

¹³ Nyuwo mpanke okhalawaka xaxaxa; mookitthava mmirimani mwa amayaka.

¹⁴ Miyo kinoottottopelani niwoko mookipaka moota wooreerela ni wootikhiniheya; mitekosanyu ti sootikhiniheyaxa – miyo kinsuwela yeeyo nnenesene.

¹⁵ Yaapakiwaaya erutthwaaka muxiirini, eyo khayaahiyono yoowiipithiheya wa Nyuwo. Miyo kaatthaviwaaka moowiixera mwa etthaya,

¹⁶ maithwaanyu yaahoona kihinaaye omalela omutthu. Mahuku ootheene a okumaaka alempwale mulivurunimwanyu kihinaaye okhalanaru nihuku.

¹⁷ Ii! Muluku, soowuupuwelasanyu ti sootthuneyaxa wa miyo. Sootheene seiyo ti soohilikanxereya!

¹⁸ Miyo kaalikela seiyo, sinookwana soopwaha muhaava wa mphareiyani. Miyo kamaliha waalikela, nlelo kiri ni Nyuwo.

¹⁹ Ii! Muluku; kaatthunaxa weera ngwiive atakhali! Mukirakamihele anamwiiva!

²⁰ Awosa angwuulumelani moota woonanara; amwiittanaanyu anramusa Nsinananyu.

²¹ Ii! Yave, miyo kinaathanya yaale anoothanyani. Kinaaramusa yaale anoovaanyani Nyuwo.

²² Kinaathanya ni okumaaka wootheene; kingwaalikela ntoko amwiittanaaka.

²³ Ii! Muluku, mukoote ni musuwele murimaaka; mukiwehe ni moone soowuupuwelasaka sinkitthukuruwiha.

²⁴ Moone kaattharaka ephiro Nyuwo munthanyaanyu ni mukihoole mphironi yoohimala.