Icipo 115 - Emakhuwa Bible

¹ Khoohiyono wa hiyo, Yave, khoohiyono wa hiyo, mene wa Nsinananyu okhale ovuwa niwoko na osivelawanyu ni ororomeleyawanyu.

² Heeni miloko sinkohaaya: “Ori woowi Mulukwaaya?”

³ Mulukwaahu ori wiirimu; Owo ongwera opaka sootheene sinimusivela.

⁴ Vaheera milukusaya siri sa eparatha* ni eyuuma yoorikaxa – soopakiwa ni matata a atthu.

⁵ Sookhalano iyano, mene khasingwera wuuluma; maitho, mene khasingwera woona.

⁶ Sookhalano maaru, mene khasingwera wiiwa; iphula, mene khasingwera wiimura.

⁷ Sookhalano matata, mene khasingwera waapapela; inaawo, mene khasingwera weetta hata wamilowaya kheeniiwanyeya etthu.

⁸ Yaale ampaka seiyo anoothatuwa ntoko seiyo ni hiihotho ootheene anroromela seiyo.

⁹ Ii! aYixrayeli, munroromele Yave – Owo ti ekhaviherowaanyu ni exikudwaanyu.

¹⁰ Ii! Asaserdoti*, munroromele Yave – Owo ti ekhaviherowaanyu ni exikudwaanyu.

¹¹ Nyuwosa mummoova Yave, munroromele Yoowo – Owo ti ekhaviherowaanyu ni exikudwaanyu.

¹² Yave onnanuupuwelela ni onoonireeliha; Owo onooreeliha ekhapira ya aYixrayeli ni asaserdoti*.

¹³ Owo onimwaareeliha yaale ammoova Yave – okhuma asikhaani mpaka asitokweene.

¹⁴ Yave awaattiheni – nyuwo ni anamwaniinyu.

¹⁵ Nyuwosa mureelihiwe ni Yave, Mpattuxa a wiirimu ni vathi.

¹⁶ Irimu sa osuluxa ti sa Yave, vaheera Owo oovaha omutthu elapo ya vathi.

¹⁷ Khaahiyono anamakhwa animuttottopela Yave, naari yaale ankhuruwela nipuro noomaaleleya.

¹⁸ Ti hiyo nnimuttottopela Yave okhuma vaanaanova mpaka khalayi. Munttottopele Yave!