Icipo 107 - Emakhuwa Bible

¹ Muntthapele Yave, niwoko Owo ti a murima wooreeraxa ni osivelawawe ompwaherera wa mahuku ootheene.

² Oovulixiwa a Yave anghima yeeyo – yaale Owo aatapunxaawe mmatatani mwa amwiittana;

³ yaale aathukumanyinghaawe mweelaponi – mpatta ninkhuma nsuwa; ninkela nsuwa; ottuttuwani ni ohitto.

⁴ Akina yeetteetta munikareni ni mweelaponi yoowuumelela ehiphwanyaka esidade weera yiitekihemo.

⁵ Yaakhalano etala ni ntthona ni okumaaya waahanle vakhaani olakaseya.

⁶ Moohaawanimwaya yaamukhuwelela Yave ni Owo aawoopola moothanananimwaya.

⁷ Owo aahaahoolela mphironi yoolipeene aaronghaka musidadeni yoomakeya.

⁸ Awosa emutthapele Yave niwoko na osivelawawe woohimala ni mitekosawe sootikhiniha aapakenlaawe atthu.

⁹ Vano Owo onaamaaliha anantthona ni onaavoniha anatala ni itthu sooreerela.

¹⁰ Akina yaakilaathi mpiphini ni mmunttuusini wa okhwa; oothananeene ni etthukiweene,

¹¹ niwoko yaavaanya masu a Muluku eramusaka olaka wa a Musulusulu.

¹² Tivawo Owo aavarihalaawe miteko soovihaxa; awosa ankwattuliwa, mene khawoworu oowaakhavihera.

¹³ Vano yaamukhuwelela Yave mmahooxonimwaya ni Owo aawoopola moothanananimwaya.

¹⁴ Aahaakhumiha mpiphini ni mmunttuusini wa okhwa anapasa onyooro yaatthukeliwaayano.

¹⁵ Awosa emutthapele Yave niwoko na osivelawawe woohimala ni mitekosawe sootikhiniha aapakenlaawe atthu,

¹⁶ niwoko Owo oopwexakasa masele a ebronze* anaakhula anampattika a eyuuma.

¹⁷ Akinatho aathatuwa masikini niwoko na iphirosaya soovaanya enahaawa niwoko na sootakhalasaya.

¹⁸ Khayaatthunaru oca ni yaahaattamela mulako wa okhwa.

¹⁹ Vano yaamukhuwelela Yave mmahooxonimwaya ni Owo aawoopola moothanananimwaya.

²⁰ Owo aarumiha maswaawe anaalamiha; Owo aahaavuluxa mookhwaani.

²¹ Awosa emutthapele Yave niwoko na osivelawawe woohimala ni mitekosawe sootikhiniha aapakenlaawe atthu.

²² Awosa epakeleke sooveleela sootthapela elaleiyaka mitekosaya ni icipo sa ohakalala.

²³ Akinatho yaarowa mphareiyani ni makula matokotoko; yaampaka nakoso mmaahini oowaatta.

²⁴ Yaahoona miteko sa Yave; soopakasawe sootikhiniha moowiixera.

²⁵ Vano Muluku aahuuluma, anatannya epheyo etokotoko yaawelinghe mitekuteku.

²⁶ Makula matokotoko yaavonyereya osulu, emorexeleyaka moowiixera; ngwoopihanimwaya yaatteenguwa.

²⁷ Yaaveveleyaxa ntoko anamuhapaliwa; owerawaya waahooceeleya.

²⁸ Vano yaamukhuwelela Yave mmakacamihonimwaya ni Owo aawoopola moohaawanimwaya.

²⁹ Aatatuxa ettheku epheyo yoomaaleleya; mitekuteku sa ephareiya saamaala.

³⁰ Awosa yaahakalala ephareiya yaamaaleleiyaaya ni Owo aahaarongha mmuxeloni yaatthunaaya.

³¹ Awosa emutthapele Yave niwoko na osivelawawe woohimala ni mitekosawe sootikhiniha aapakenlaawe atthu.

³² Emvuwihe munthukumanoni mwa atthu ni emuttottopele variyari wa asitokweene.

³³ Owo ontatuxa nyooloko nikare; ongwuumeleliha anaattuuttu,

³⁴ atatuxaka ya maakha etthaya yooruwereya niwoko na sootakhala sa yaale yaamankewo.

³⁵ Owo ontatuxa nikare maratta ni ilapo soowuumaxa anaattuuttu;

³⁶ Onaakilaathihawo anamavoliwa weera eteke esidade yoomakeya.

³⁷ Yaahaalawo irooro, enaphatteya imatta sa iwuuva* mwa seiye yaahemphaaya soowaatta;

³⁸ Aahaareeliha ni awosa yaahaattaxa; Owo khaatthunihera weera mihuwosaya sivukuwe.

³⁹ Wa soothesene, yaavukuliwaaya waattawaya, yaangyevihiwa, yaahasuliwa, mweerisani ni moothananani.

⁴⁰ Muluku mwa Yoowo onaakuruxela maneethi oramusiwa ohaaxoraxoriha munikareni moohikhalamo iphiro.

⁴¹ Vaheera wa oohaawa aahaavenxa moosiwani ni aahaattiha imusisaya ntoko mihuwo.

⁴² Oororomeleya ootheene animoona sootheene iyo enahakalala, mene atakhali ootheene anoomaala.

⁴³ Yaale arino miruku yiiweke itthu iya ni etthokelele osivela otokotoko wa Yave.