Icipo 106 - Emakhuwa Bible

¹ Munttottopele Yave! Muntthapele Yave niwoko Owo ti ooreeraxa. Osivelawawe ompwaherera wa mahuku ootheene.

² Khawowo ongwera olaleiya nnenesene soopaka sa ikuru sa Yave hata othalihera ottottopeleyawawe moota omphwanelaaya.

³ Ooreelihiwa ti yaale anthokorora murima woororomeleya ni ampaka mahuku ootheene yeeyo eri ya ekhaikhai.

⁴ Ii! Yave, mukuupuwelele miyo mooniheraka mulokwaanyu murima wooreera; mukikhavihere Nyuwo mwaavuluxaka yoowo

⁵ weera kikhale mpatta wa oweettelawaya nnene oothanliwaanyu. Hiiho kinoohakalala vamoha ni mulokwaanyu, kittottopelaka vamoha ni yoohiyeraanyu.

⁶ Hiyo noottheka ntoko makholowaahu yaatthenkaaya; hiyo noopaka soonanara, nnakhala attiyamaaru.

⁷ Makholowaahu yaaraaya wExipitu, khayaapwantthe sootikhinihasanyu; khayuupuwelenle mitekosanyu sincipale sa murima wooreera ni yaavaanya mukerekhere ephareiya, eyo tiiyo Ephareiya Yooxeera.

⁸ Hata hiiho Owo aahaavuluxa eerelaka Nsinanawe weera oonihere ikurusawe sitokotoko.

⁹ Owo aahiiha Ephareiya Yooxeera ni eyo yaahuuma; Owo aahaahoolela mpuwa ntoko yaari munikareni.

¹⁰ Owo aahaavuluxa mmatatani mwa yaale yaathanya; aawoopola mmatatani mwa amwiittana.

¹¹ Maahi yaahaakhuneela amwiittanaaya ni khawoworu aahanle.

¹² Vano yaahaakhulela soororomelihasawe ni yaamwiipela icipo sa ottottopela.

¹³ Wa soothesene, yaattiwala woowaakuveya seiye aapankaawe ni khayaaweherenre osuwela mirukusawe.

¹⁴ Yeettihiwa ni soohaawelasaya munikareni, aani munikareni yaamoota murima Muluku.

¹⁵ Vano Owo aahaavaha yeeyo yaamvekenlaaya; mene aahaarumihelatho eretta yoowoopiha.

¹⁶ Waakonelingwe yaamukhalela nrima Moisesi ni Aharoni, mwa yaale yaatteelihiwe ni Yave.

¹⁷ Etthaya yaahuleya, enammira Datani; yaamvitha nakupa a Abirami.

¹⁸ Mooro waakhumelela eriyari ya anamattharaaya; malumaaya yaahaalaliha atakhali.

¹⁹ oHorebi yaampaka mwaamombe ni yaalapa muluku woolokottha waahaniwe ni iyuuma.

²⁰ Yaaceendya ovuwa yaarinaaya ni Muluku ni ecaambulo ya emombe elopwana mwa yeeyo enca malaxi.

²¹ Yaamuttiwala Muluku Mvuluxaaya, mwa Yoowo aapanke itthu sitokotoko wExipitu;

²² sootikhiniha mweelaponi ya oHami ni miteko sooweraxa mukerekhere Ephareiya Yooxeera.

²³ Vano Muluku aaheera weera onimwaaphwata, mene Moisesi, oothanliwaawe, aaheemela ohoolowawe vaniproniwaya weera isara sa Muluku sihaaphwate.

²⁴ Vahoolowaya awosa yaaramusa elapo yooreeraxa; khayaaroromenle yoororomelihaawe.

²⁵ Awosa yaattaandawula mmaheemanimwaya ehimwiiwelelaka Yave.

²⁶ Tivawo aawuumenlaawe eemenxeene ntata weera Owo onimwaamoroxela munikareni;

²⁷ ni onoomwaraxela ikhapirasaya variyari wa miloko ni ilapo sikinatho.

²⁸ Yaahiixinnyerera wa Bahali* a oPeyori enaca sooveleela saavahiwe miluku sookhwa.

²⁹ Yaatannya isara sa Yave ni mitekosaya ni naakhumelela nihooxo eriyaraaya.

³⁰ Vaheera Pinehasi aaheemela aweerelaka yaawo ni nihooxo naamala.

³¹ Eyo aakhaliheriwe ntoko muteko wa ekhaikhai weera yuupuweleliwe mahuku ootheene wa ikhapira sootheene.

³² Mmaahini a oMeriba aYixrayeli yaamunyoonyiha Muluku ni, niwoko na yaawo, Moisesi aavolowa mmakacamihoni mancipale;

³³ yaavaanya Munepa wa Muluku ni Moisesi aahuuluma woohitthokelela.

³⁴ Awosa khayaaphwante miloko ntoko Yave aalamulenlaawe;

³⁵ Ohiyanawaya yaahiitakansera ni miloko, ettharaka ikhovelelosaya.

³⁶ Yaalapa milukusaya soolokottha mwa seiye saathatungwe ntaphanaya.

³⁷ Yaapakela sooveleela minepa soonanara yaahisaka asinamwanaaya asilopwana ni asithiyana.

³⁸ Yaayeeha ephome yoohinthowa; ephome ya anamwanaaya asilopwana ni asithiyana yaaveleeleliwa miluku soolokottha sa oKanaani ni elapo ele yaanyoowihiwa ni ephomaaya.

³⁹ Yaahiitatuxa oohiitteela niwoko na yeeyo yaapankaaya; yaathatuwa mapuuta niwoko na mitekosaya.

⁴⁰ Tivawo Yave aanyoonyeringwaawe mulokwaawe, athanyaka yoohiyeraawe.

⁴¹ Aawinnyerera mmatatani mwa miloko ni amwiittanaaya yaahaalamula.

⁴² Amwiittanaaya yaahaahasula yaalamulaka ni ikurusaya soovihaxa.

⁴³ Yave annaatapuxa imaara sincipale, mene yannapwaherera ni mirima soovaanelela ni yannattharexexa sootthekasaya.

⁴⁴ Vaheera iiwaka okhuwelawaya, Owo aapwattha othananawaya.

⁴⁵ Aahuupuwelela owiiraananawawe ni niwoko na waasivelawawe otokotoko aahiya waattaruxa.

⁴⁶ Aapakiha weera anamawinaaya yaamorele ikharari.

⁴⁷ Ii! Yave Mulukwaahu, munivuluxe ni munithukumanyihe variyari wa miloko weera nitthapele Nsinananyu Nootteela* nivuwihaka ngwoottottopelanimwanyu.

⁴⁸ Yave, Muluku a aYixrayeli atthapeliwe wa mahuku ootheene. Miloko sootheene seere: Ame*! Munttottopele Yave.