Hoxeya 9 - Emakhuwa Bible

Ohapuwa mmunepani wa oYixrayeli

¹ Ii! oYixrayeli, muhitthape; muhihakalale ntoko miloko sikina, niwoko nyuwo mooraruwa munghiyaka Mulukwaanyu. Nyuwo munsivela nlivo na mooraruwani munipuroni nootheene nimveeriwaayawo etrigu.

² Mapuro amveeriwa etrigu ni munaameliwa iwuuva*, khayaaciha atthu; eviinyu enyowani eniyaathowe.

³ Awosa kheepwaherera okhala mulaponi mwa Yave; wEfrayimi onoohokoleela wExipitu, ni wAsiriya onimooca yooca yoohitteela.

⁴ Awosa kheempakela Yave yooveleela ya eviinyu, hata sooveleelasaya khasimusiveliha. Sooveleela iyo nsaakhalele ntoko yooca ya anamalalamika – eniimutatuxe oohitteela yoowo anaace. Yooca eyo eniikhale yawayeene paahi; kheevolowa Mpaani mwa Yave.

⁵ Mmwipakaseni vanihukuni na ifestasanyu soothanliwa, mmahukuni a ifesta sa Yave?

⁶ Munootthawaru ophwatiwa, wExipitu onimoothukumanyihani ni oMemfesi onimoovithani. Mihakhusanyu sa eparatha* sinoomeleliwa oyele ni miraambela sinoovitikelela woomalela iheemasanyu.

⁷ Mahuku a nttaruxo ahanle vakhaani ophiya; mahuku a nthorihelo animoowa. aYixrayeli esuweleke yeeyo. Seenre saatta sootthekasanyu ni ovaanyawanyu otokotoko, mprofeeti onooneliwa okhala nsikini, mutthu oosareya Munepa Wootteela ntoko naanepa.

⁸ Mprofeeti vamoha ni Mulukwaaka ti namalipelela ongwehaweha wEfrayimi; wa soothesene, miraakho siningweherera mphironimwawe moothemwene, ni wookhala wiittana Mpaani mwa Muluku.

⁹ Awosa aasareya soonanara soohiyanahiyana ntoko mmahukuni a oGibeya. Muluku onimuupuwelela sootakhalasaya ni onimwaattaruxela sootthekasaya.

¹⁰ “Kaaphwanyaaka aYixrayeli, waari ntoko ophwanya iwuuva* munikareni; koonaaka makholowaanyu, waari ntoko woona soowiima soopacera sa ifiigu. Vaheera awosa yaaphiyaaya oBahali-Peyori, yaahiitteeliherasa muluku owo oowuulihaxa muru, enathatuwa oohiira ntoko yeele yaasivelaaya.

¹¹ Ovuwa wa wErayimi onoovavela ottai ntoko mwaapalame. Khookhala oyara, naari orupala hata weemelela.

¹² Naari yaahuwaka anamwane, kinoomwiinaneliha khula mutthu a yaawosa. Ii! Wa yaawosa miyo kaarakamelaka!

¹³ Kohoona wEfrayimi otekiweene vanipuroni nooreerela ntoko oTiro. Vaheera wEfrayimi onoowinnyerera anamwanaaya owiiviwani.”

¹⁴ Ii! Yave, mmwaavahase eheeni? Mwaapakihe weera yaarupalaka, sitatheye ni mapelaaya yuumelele.

¹⁵ “Miyo kaahaathanyawo niwoko na sootakhalasaya sootheene sa oGiligali. Miyo kinoowoomola mulaponimwaka mwaha wa sootthekasaya. Nkaasivelatho; ahoolelaaya ootheene ti oottiyamaaru.

¹⁶ wEfrayimi woohomeya, mikwankhwaarisaya sohuuma, awosa khaaniima. Naari yaahuwaka anamwane, Miyo kinoowiiva anamwane anaasivelaaya.”

¹⁷ Mulukwaaka onimwaakhootta niwoko khaamwiiwale; anookhala anamaxoraxora eriyari ya miloko.