Hoxeya 2 - Emakhuwa Bible

¹ Ngwiitthane axunninyu ‘Mulokwaaka,’ ni axirokorinyu ‘Oosiveleyaaka.’”

Othoriheliwa ohiroromeleya wa oYixrayeli

² “Mwaahiihe amayinyu, mwaahiihe, niwoko awo khaahiyono amwaaraka, ni Miyo nkihiyono aiyaya. Awo ehiye mawehero oopuuta, ni evenxe ohiroromeleya eriyari ya mapele.

³ Ohiyanawaya, Miyo kinimwaarula ehaleke pwitipwiti ntoko nihuku yaayariwaaya; kinimwaapaka ntoko nikare, kaatatuxaka elapo yoowuumelela, ni kinoowiiva ni ntthona.

⁴ Anamwanaaya nkaapwattha ni osivela, niwoko ari anamwane ooraruwiwa.

⁵ Amayaya khayaaroromeleiye, yaarupalaka yaawosa ngwuulihiheyani muru. Vano awo yeenre: ‘Kinimwaatthara yaawo kinaakonanaaka ankivaha yooca, maahi, soowara sa mapururu a ikhondoolo, eliinyu*, makhura ni yoowura.’

⁶ Tivawo kineeraaka kittiyelele iphirosaya ni nyiiwa; kinimwaarica moota wooweera awo kheewera ophwanya ephiro.

⁷ Awo eniyaatthimakele yaawo anaasivelaaya, mene khayaaphwanyasa, eniiwaasaase, mene kheewoona. Hiiho awo eniyeere: ‘Kinoohokoleela okhala ni aiyaka ntoko woopacera, niwoko kaari nnenesene opwaha vano.’

⁸ Awo khaanoonelela weera ti Miyo kaavanghe etrigu, eviinyu enyowani ni makhura; kaavanghe eyuuma yoorikaxa ni eparatha* yoowaattaxa, mwa yeeyo yaavarenlaaya muteko woomurumeelano Bahali*.

⁹ Tivawo kineeraaka kikuxe etrigwaaka eyo yiitthwaka, ni eviinyuwaaka yaakhalaka yoolikaneene. Kinoowaakha yoowaraaya ya mapururu a ikhondoolo ni eliinyuwaaka, mwa yeeyo yaavarelaaya muteko wookuttelelano etiriyaaya.

¹⁰ Vano, kinoowuulihiha muru vamaithoni wa yaawo anaakonanaaya; khaawo anaawere waatapuxa mmatatanimwaka.

¹¹ Kinoomaliha ohakalalawaya wootheene: ifestasaya sa vayaakhani, sa nyeerisaya sinyowani, mahukwaaya a eSaabadu ni ifestasaya soothanliwa sootheene.

¹² Kinoohela nthala imattasaya sa iwuuva* ni ifiigu, mwa seiyo yaaliviwaayano ni yaawo anaakonanaaya; kinootatuxa maphuwa, ni axinama a ntuphini anoonyaanyasa.

¹³ Miyo kinimwaattaruxela mahuku yaahisenraaya aBahali* erubani*; awo yaahiiphwanelihano annela ni axiveeve, enaatthara yaawo anaakonanaaya, vaheera yaakittiwala Miyo,” onghima Yave.

¹⁴ “Vanonto, kinimwaaruuhatho; kinimwaarongha onikareni kawuulumekeno ni masu oosiveleya.

¹⁵ Weiwo, kinkela waahokoloxera imattasaya sa iwuuva*, ni kinookhaliha oreyareyani wa Akori mulako wa oweherera. Weiwo, awo eniyiipe ntoko mmahukuni a omiravowaaya, aani ntoko nihuku yaakhummaaya wExipitu.”

¹⁶ Yave onghima ha: “Nihuku nno, nyuwo munookiitthana ‘aiyinyu’; khamukiitthanatho ‘pwiiyaanyu.’

¹⁷ Kinoovenxa vayanoniwaya masina a aBahali*; masinaaya khayiitthaniwatho.

¹⁸ Vanihukuni nno, kiweerelakani nyuwo, kinoowiiraanano axinama a ntuphini, ipalame sa wiirimu, mpakatho axinama aniipurula. Kinoovenxa mulaponi muura, ekatana ni ekhotto, weera ootheene ewere okhala oolipeene.

¹⁹ Miyo kinimoothelani mahuku ootheene; Miyo kinimoothelani moororomeleyani ni ngwookoleleyani, moosivelani ni mukhararini.

²⁰ Miyo kinimoothelani moororomeleyani, ni nyuwo munoomusuwela Yave.

²¹ Nihuku nno, Miyo kinimwaakhula,” onghima Yave. “Kinimwaakhula irimu, ni iyo sinimwaakhula etthaya;

²² ni etthaya eniwaakhula irooro, eviinyu ni makhura, ni iyo sinimwaakhula oYizereyeli.

²³ Miyo kinimwiiphatteela muloko mulaponi; kinoompwattha ni osivela yoole kaamwiitthanaaka ‘Oohisiveleya.’ Kinoomweerela yoole iitthaniwa ‘Khahiyono mulokwaaka,’ ‘Nyuwo ti mulokwaaka’; ni awosa eniyeere: ‘Nyuwo ti Mulukwaaka.’”