Hoxeya 12 - Emakhuwa Bible

¹ Efrayimi onca epheyo; owo ontthara epheyo ya mpatta ninkhuma nsuwa nihuku nootheene, aandyeereraka soowootha ni nipuhero. Oniiraanano wAsiriya ni onrumihela makhura a sooliveira* wExipitu.

Nyaha soorakama sa ovaanya wa oYixrayeli

² Yave onimuhimahima Yuda, ni onoomuttaruxa Yakobe, attharihaka mweettelowaawe; aani onoomutthuvela attharihaka soopakasawe.

³ Aavarela etthottopwa ya munneiye areene mmirimani mwa amayawe; areene mulopwana aawana ni Muluku.

⁴ Owo aawana ni ndyelo, anavenya oowineene; aahiinla adyoonttelelaka nreeliho na Muluku. oBeteli aamukumanano Muluku, anamutthekulanowo.

⁵ Aani, Yave muneene, Muluku a ikuru sootheene, Yave ti Nsinanawe, mwa nenno aneeraawe uupuweleliweno!

⁶ Vanonto, muhokoleele wa Mulukwaanyu, ni mweettele ororomeleya ni ekhaikhai; mahuku ootheene mungweherere Mulukwaanyu.

⁷ Nanakoso omvarela muteko mphimo woohiroromeleya; ni ontthunaxa olokottha.

⁸ Efrayimi oniikuxerera, eeraka: “Moota kithadyireiyaaka, kinakwaneya! Mmitekoni sootheene kimvaraaka khaphwannyeru mwa miyo yootakhala hoye hoye yoottheka.”

⁹ “Vaheera Miyo ti Yave Mulukwaanyu ookhumihaleni mwa wExipitu; kinoopakiha weera muhokoleele muheemani ntoko mmahukuni ale a ifestasanyu soothanliwa.

¹⁰ Yoomeene kuuluma ni maprofeeti, kannaavaha nyoonelo sincipale, ni mwa yaawosa kuuluma mmaphwanaphwanihoni mancipale.”

¹¹ Moota otakhanlaaya oGileyadi! Amakaaya khaamuteko! Awosa ampakela sooveleela oGileyadi, vaheera altaaraaya anookhala ntoko mittunduruma sa maluku vatthayani yoottipuriwa.

¹² Yakobe aatthawela elapo ya wArami; Yixrayeli aavara muteko weera amphwanye muthiyana; aakosoopa ikhondoolo weera amuthume.

¹³ Yave aamvarela muteko mprofeeti weera aakhumihe aYixrayeli wExipitu, ni Owo aahaakosoopa mwa mprofeeti.

¹⁴ wEfrayimi waatannyaxa isara sa Yave; tivawo Yave aneeraawe amoroxele nthowa na ephome wEfrayimi oyeehalaaya, ni onoohokoloxera onyoosawaya.