Hoxeya 10 - Emakhuwa Bible

Soottheka ni otthukiwa wa oYixrayeli

¹ aYixrayeli yaari ntoko evideira* yookuttukutteya; yaahiima wusa wusa. Yiimaxaaya, ti Yaatekaaya altaari* ancipale; elapwaaya yeetteleyaaya nnene yaaphwanelihaxaaya amarimbwaaya ootteeliheriwa.

² Mirimasaya ti soolokottha, ni vano ontthuneya othatela nthowanaya. Yave onimwaakurumula altaaraaya ni onimwaaphwata amarimbwaaya ootteeliheriwa.

³ Vano awosa eniyeere: “Khaninonoru mwene niwoko khanimuttittiminghe Yave. Vaheera, hata naarino mwene, owo aahinipakele eheeni?”

⁴ Awosa anroromelihaxa, anlipela ni aniiraana moota woowootha; tivawo omphuwaaya wootherana ntoko maphuwa oohapala mmatta moottipuriwa.

⁵ Muloko onkhala oSamariya ommoova muluku opakiwe ntoko mwaamombe a oBeti-Aveni. Mulokwaaya onuumukhupanyere, vamoha ni asaserdotaaya a miluku yaahakalalela waarawaya, niwoko awo ahaakhiwa, onaronghiwa wootthukiwani.

⁶ Aani owotho onooronghiwa wAsiriya ntoko yoomvaha mwene mutokweene. wEfrayimi onuuhaawe oyevihiwa; ni oYixrayeli onimuulihiheya muru niwoko na mulukwaaya oopatthiwa.

⁷ Samariya ni mwenaawe anookumburuliwa ntoko nthatu.

⁸ Altaari* a Empa ya Sootakhala ari soottheka sa aYixrayeli, anoophwatiwa. Nyiiwa ni malaxi sinimunnuwa saakutteleleke altaaraaya*. Vano awosa eniyeerele nyaako: “Munikhuneele!” Ni wa mattumuxa: “Munipittuwele!”

⁹ “Ii! oYixrayeli, okhuma mmahukuni a Gibeya nyuwo mwannattheka, ni mumpwaherera hiiho. Ekhotto yaahaaphwanya atakhali oGibeiya.

¹⁰ Mweehuhuni ya othanliwawaka kinimwaattaruxa; miloko sinimwaathukumanela weera saatthuke niwoko na woopelelawaya soottheka.

¹¹ wEfrayimi ori mwaamombe ooxuttihiweene, ontthunaxa onyikalasa; tivawo kineeraaka kimuthatelihe murindi woolemela vaxikwawe wooreera. Kinimweettiha wEfrayimi, oYuda ontthuneya ottipura, ni Yakobe ontthuneya opittikuxa etthaya yoohittipuriwa.

¹² Mwiixaalele wookoleleya, muhephe yoowiima ya osivela woohimala, ni mpittikuxe etthaya yoohittipuriwa, niwoko ela ehuhu yoomwaasa Yave mpaka aneeraawe arwe ni oorupihelaseni waakhuleliwa ni Muluku.

¹³ Vaheera nyuwosa mphatteiye sootakhala; munahepha yoonanara; mohooca soowiima soolokottha. Mweenre muroromelaka ikurusanyu ni anakhottwaanyu oowaata,

¹⁴ munyakunyaku wa okhottoni onimoovenyerani moota wooweera moolipamwanyu moothemwene onoophwatiwa, ntoko Xalemani ophwantaawe oBeti-Arbeli vanihukuni na ekhotto – yaanyikalasiwaaya asimaayi vamoha ni anamwanaaya.

¹⁵ Ii! Beteli, enimookhumelelani hiihotho nyuwo, niwoko sootakhalasanyu ti sitokotoko. Waaxaaka nihuku nno, mwene a oYixrayeli, onoophwatiwa woomalela.”